ଥିରୁଭାନନ୍ତପୁରମ,୨୬।୧୧(ପି.ଟି.): ଅଷ୍ଟ୍ରେଲିଆ ବିପକ୍ଷ ପ୍ରଥମ ଟି୨୦ ମ୍ୟାଚ୍ରେ ସଂଘର୍ଷପୂର୍ଣ୍ଣ ୨ ଉଇକେଟ ଜିତିବା ପରେ ରବିବାର ଥିରୁଭାନନ୍ତପୁରମ୍ରେ ଖେଳାଯିବ ଦ୍ୱିତୀୟ ମ୍ୟାଚ୍। ଏହି ମ୍ୟାଚ୍ରେ ଭାରତୀୟ ବୋଲର ନିଜ ଫର୍ମ ସୁଧାରିବାକୁ ଚେଷ୍ଟା କରିବେ। ପ୍ରଥମ ମ୍ୟାଚ୍ରେ ଭାରତ ବିଜୟୀ ହୋଇଥିଲେ ମଧ୍ୟ ଏଥିରେ ବ୍ୟାଟରଙ୍କ ଅବଦାନ ଅଧିକ ରହିଥିଲା। ଭାରତୀୟ ବୋଲର ୨୦୮ ରନ୍ ବ୍ୟୟ କରିଥିବା ବେଳେ କେବଳ ମୁକେଶ କୁମାର ଓ ଅକ୍ଷର ପଟେଲ ପ୍ରଭାବ ବିସ୍ତାର କରିପାରିଥିଲେ। ଉଭୟ ବୋଲର ଅଷ୍ଟ୍ରେଲୀୟ ବ୍ୟାଟରଙ୍କ ରନଗତି ରୋକିବାରେ ସମର୍ଥ ହୋଇଥିଲେ। ତେବେ କେରଳର ଗ୍ରୀନ୍ ଫିଲ୍ଡ ଷ୍ଟାଡିୟମରେ ଖେଳା ଯିବାକୁ ଥିବା ମ୍ୟାଚ୍ରେ ମଧ୍ୟ ଆଉ ଏକ ରନ୍ ଭୋଜି ଦେଖିବାକୁ ମିଳିବ। ତେଣୁ ଭାରତୀୟ ବୋଲର ଏହି ମ୍ୟାଚ୍ରେ ଫର୍ମକୁ ଫେରିବାକୁ ପ୍ରୟାସ କରିବେ। ମୁକେଶ କୁମାର ଯେଉଁଭଳି ଭାବେ ନିଜର ଲାଇନ୍, ଲେନ୍ଥ ପରିବର୍ତ୍ତନ କରୁଥିଲେ ଓ ୟର୍କର ପକାଉଥିଲେ ଅନ୍ୟ ଭାରତୀୟ ବୋଲର ତାଙ୍କଠାରୁ ଶିଖିବା ଆବଶ୍ୟକ। ତେବେ ଏହି ଦଳର ଥିବା ଏକାଧିକ ବୋଲର ଦୀର୍ଘ ଦିନ ପରେ ଅନ୍ତର୍ଜାତୀୟ କ୍ରିକେଟକୁ ଫେରୁଥିବାରୁ ଏଭଳି ସମସ୍ୟା ଦେଖିବାକୁ ମିଳିଛି। ଖାସ୍ କରି ରବି ବିଷ୍ଣୋଇଙ୍କ ବୋଲିଂରେ ଏହା ସ୍ପଷ୍ଟ ନଜର ଆସୁଛି।
ଭାରତୀୟ ବ୍ୟାଟିଂ ଲାଇନ୍ଅପ୍ ମଧ୍ୟ ଅପରିବର୍ତ୍ତିତ ରହିବ। ପ୍ରଥମ ମ୍ୟାଚ୍ରେ ଜୟସ୍ବାଲ ଦ୍ରୁତ ଆରମ୍ଭ କରିଥିଲେ ମଧ୍ୟ ଏହାକୁ ବଡ ସ୍କୋରରେ ପରିଣତ କରି ପାରି ନ ଥିଲେ। ଅନ୍ୟପକ୍ଷରେ ଋତୁରାଜ ଗାଏକ୍ୱାଡ୍ ଦୁର୍ଭାଗ୍ୟଜନକ ଭାବରେ ରନ୍ ଆଉଟ ହୋଇଥିଲେ। ତେବେ ଦ୍ୱିତୀୟ ମ୍ୟାଚ୍ରେ ଭାରତ ସମାନ ଲାଇନଅପ୍ ସହିତ ଓହ୍ଲାଇବାର ସମ୍ଭାବନା ଅଧିକ। ସୂର୍ଯ୍ୟକୁମାର ଯାଦବ ଓ ଇଶାନ କିଶନ୍ଙ୍କ ବ୍ୟାଟିଂ ଚମତ୍କାର ରହିଥିବା ବେଳେ ରିଙ୍କୁ ସିଂଙ୍କ ଫିନିଶ ଅତ୍ୟନ୍ତ ଚମତ୍କାର ରହିଥିଲା। ଅନ୍ତିମ ଓଭରରେ ୩ ବ୍ୟାଟର ରନ୍ ଆଉଟ ହୋଇଥିଲେ ମଧ୍ୟ ରିଙ୍କୁ ଯେଉଁଭଳି ଭାବରେ ବ୍ୟାଟିଂ କରିଥିଲେ ତାହା ପ୍ରଶଂସନୀୟ। ଅନ୍ୟପକ୍ଷରେ ପ୍ରଥମ ମ୍ୟାଚରେ ଅଷ୍ଟ୍ରେଲିଆ ପକ୍ଷରୁ ଦ୍ରୁତତମ ଶତକ ହାସଲ କରିଥିବା ଜୋଶ ଇଂଲିଶଙ୍କ ଉପରେ ସମସ୍ତଙ୍କ ନଜର ରହିବ। ଷ୍ଟିଭ୍ ସ୍ମିଥ୍ଙ୍କୁ ଓପନ କରାଇବାର ରଣନୀତି ଫେଲ୍ ମାରିଥିବା ବେଳେ ଅନ୍ୟ ବିକଳ୍ପ ଉପରେ ନଜର ପକାଇବ ଅଷ୍ଟ୍ରେଲିଆ। ସେହିପରି ତନଭୀର ସାଂଘାଙ୍କ ସ୍ଥାନରେ ଆଡାମ ଜାମ୍ପାଙ୍କୁ ଖେଳାଇପାରେ ଅଷ୍ଟ୍ରେଲିଆ।