ନୂଆଦିଲ୍ଲୀ,୧୪।୧୦: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ୨୦୨୩ ରୁ ୨୦୨୭ ପର୍ଯ୍ୟନ୍ତ ଏହାର କାର୍ଯ୍ୟକ୍ରମ ପ୍ରକାଶ କରିଛି। ଏହା ଅନୁଯାୟୀ, ଆସନ୍ତା ପାଞ୍ଚ ବର୍ଷ ମଧ୍ୟରେ ଭାରତୀୟ ଦଳ ପାକିସ୍ତାନ ବିପକ୍ଷରେ କୌଣସି ଦ୍ୱିପାକ୍ଷିକ ସିରିଜ ଖେଳିବ ନାହିଁ। ତେବେ ଆଇସିସି ଟୁର୍ନାମେଣ୍ଟରେ ଉଭୟ ଦଳ ପରସ୍ପର ବିପକ୍ଷରେ ଖେଳିବେ। ଆସନ୍ତା ବର୍ଷ କେବଳ ପାକିସ୍ତାନ ବିଶ୍ୱକପ ଖେଳିବାକୁ ଭାରତ ଆସିବ। ଏହା ପରେ ୨୦୨୫ରେ ଭାରତକୁ ମଧ୍ୟ ଚାମ୍ପିଅନ୍ସ ଟ୍ରଫି ଖେଳିବାକୁ ପାକିସ୍ତାନ ଯିବାକୁ ପଡିବ।
ଆଇସିସି କିମ୍ବା ଏସିସି ଟୁର୍ନାମେଣ୍ଟ ଖେଳିବା ବ୍ୟତୀତ ଭାରତୀୟ ଦଳ ୩୮ଟି ଟେଷ୍ଟ ଖେଳିବ। ଏଥିରେ ଭାରତରେ ୨୦ଟି, ୧୮ଟି ବିଦେଶରେ ଖେଳାଯିବ। ଏହି ପାଞ୍ଚ ବର୍ଷରେ ଭାରତ ମଧ୍ୟ ୪୨ଟି ଦିନିକିଆ ଖେଳିବ। ଏଥିମଧ୍ୟରୁ ୨୧ଟି ମ୍ୟାଚ ଘରେ ଏବଂ ୨୧ଟି ମ୍ୟାଚ ବାହାରେ ଖେଳାଯିବ। ୨୦୨୩-୨୦୨୭ ମଧ୍ୟରେ ଭାରତ ମୋଟ ୬୧ ଟି-୨୦ ମ୍ୟାଚ ଖେଳିବ। ୩୧ ଟି-୨୦ ଘରେ ଏବଂ ୩୦ଟି ବାହାରେ ଖେଳାଯିବ।
ଗତ ପାଞ୍ଚ ବର୍ଷ ତୁଳନାରେ ଦ୍ୱିପାକ୍ଷିକ ସିରିଜରେ ଭାରତର ମ୍ୟାଚ ହ୍ରାସ ପାଇଛି। ୨୦୧୮-୨୦୨୨ ମଧ୍ୟରେ ଭାରତ ଦ୍ୱିପାକ୍ଷିକ ସିରିଜରେ ୧୬୩ ମ୍ୟାଚ ଖେଳିଛ। ଏଥି ସହିତ ଆସନ୍ତା ପାଞ୍ଚ ବର୍ଷ ମଧ୍ୟରେ ଭାରତ ଦ୍ୱିପାକ୍ଷିକ ସିରିଜରେ ମାତ୍ର ୧୪1୧ ମ୍ୟାଚ ଖେଳିବ। ୨୨ଟି ମ୍ୟାଚ କମ ହେଲେ ଖେଳାଳିଙ୍କ ଉପରେ କାର୍ଯ୍ୟଭାର ଚାପ ସାମାନ୍ୟ କମ ହେବ। ତେବେ ପ୍ରତିବର୍ଷ ଅତି କମରେ ଗୋଟିଏ ଆଇସିସି ଟୁର୍ନାମେଣ୍ଟ ହୁଏ। ଏହି କାରଣରୁ ଦ୍ୱିପାକ୍ଷିକ ସିରିଜର ମ୍ୟାଚ ମଧ୍ୟ ସ୍ବଳ୍ପ ରଖାଯାଇଛି। ଏହା ବ୍ୟତୀତ ପ୍ରତିବର୍ଷ ଆଇପିଏଲ ପାଇଁ ୭୫-୮୦ ଦିନ ରଖାଯାଇଛି। ଖେଳାଳିମାନଙ୍କୁ ମଧ୍ୟ ଏହି ଲିଗରେ ଖେଳିବାକୁ ପଡିବ।
