ନୂଆଦିଲ୍ଲୀ, ୨୬।୭ (ପି.ଟି.): ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ୨୦୨୩-୨୪ ଘରୋଇ ସିଜନ ପାଇଁ ଟିମ୍ ଇଣ୍ଡିଆର କାର୍ଯ୍ୟସୂଚୀ ପ୍ରକାଶିତ ହୋଇଛି। ଏହି ସମୟ ମଧ୍ୟରେ ଭାରତୀୟ କ୍ରିକେଟ ଦଳ ୫ ଟେଷ୍ଟ, ୮ ଟି୨୦ ଓ ୩ଟି ଦିନିକିଆ ମ୍ୟାଚ ଖେଳିବ। ଅଷ୍ଟ୍ରେଲିଆ ବିପକ୍ଷରେ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜ ଥିବାରୁ ଭାରତର ବିଶ୍ୱକପ ପ୍ରସ୍ତୁତି ଭଲଭାବେ ହୋଇପାରିବ। ଇଂଲଣ୍ଡ ବିପକ୍ଷରେ ଭାରତ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ। ବିଶ୍ୱକପ ମ୍ୟାଚ ଆୟୋଜନରୁ ବଞ୍ଚତ୍ତ ହୋଇଥିବା ମୋହାଲି, ନାଗପୁର, ରାଜକୋଟ, ଇନ୍ଦୋର, ଥିରୁଭାନନ୍ତପୁରମ ଭେନ୍ୟୁକୁ ଘରୋଇ ସିଜନରେ ଗୁରୁତ୍ୱ ଦିଆ ଯାଇଛି ବୋଲି ବିସିସିଆଇ ସମ୍ପାଦକ ଜୟ ଶାହା ପ୍ରକାଶ କରିଛନ୍ତି।
ସେପ୍ଟେମ୍ବର ୨୨ରେ ଅଷ୍ଟ୍ରେଲିଆ ବିପକ୍ଷରେ ଭାରତ ମୋହାଲିରେ ପ୍ରଥମ ଦିନିକିଆ ଖେଳିବ। ଆସନ୍ତା ବର୍ଷ ଆମେରିକା ଓ ଓ୍ବେଷ୍ଟଇଣ୍ଡିଜରେ ଟି୨୦ ବିଶ୍ୱକପ ହେବାର ଥିବାରୁ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱାଧୀନ ଭାରତୀୟ ଦଳକୁ ଘରୋଇ ପରିବେଶରେ ୮ଟି ଟି୨୦ ଖେଳିବା ସୁଯୋଗ ଦିଆଯାଇଛି। ଏହା ମଧ୍ୟରେ ଅଷ୍ଟ୍ରେଲିଆ ବିପକ୍ଷରେ ୫ଟି ଓ ଆଫଗାନିସ୍ତାନ ବିପକ୍ଷରେ ୩ ଟି୨୦ ସାମିଲ। ଆଫଗାନିସ୍ତାନ ପୂର୍ବରୁ ୨୦୧୮ରେ ଭାରତରେ ଏକ ଟେଷ୍ଟ ମ୍ୟାଚ ଖେଳିଥିଲା। ମାତ୍ର ସୀମିତ ଓଭର ସିରିଜ ଖେଳିବା ଏହା ପ୍ରଥମ ହେବ। ଭାରତ ଓ ଇଂଲଣ୍ଡ ମଧ୍ୟରେ ଆନ୍ଥୋନୀ ଡି ମେଲା ଟ୍ରଫି ପାଇଁ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଅନୁଷ୍ଠିତ ହେବ। ମ୍ୟାଚ ଗୁଡ଼ିକ ହାଇଦ୍ରାବାଦ, ବିଶାଖାପାଟଣା, ରାଜକୋଟ, ରାଞ୍ଚତ୍ ଓ ଧର୍ମଶାଳାରେ ଖେଳାଯିବ। ଚଳିତ ବର୍ଷ ପ୍ରାରମ୍ଭରେ ଠିକ୍ ସମୟରେ ପଡ଼ିଆ ପ୍ରସ୍ତୁତ ହୋଇପାରି ନ ଥିବାରୁ ଧର୍ମଶାଳା ବର୍ଡର-ଗାଭାସ୍କର ଟ୍ରଫିର ଏକ ମ୍ୟାଚ ଆୟୋଜନରୁ ବଞ୍ଚତ୍ତ ହୋଇଥିଲା। ତେଣୁ ଭାରତ-ଇଂଲଣ୍ଡ ସିରିଜର ଏକ ଟେଷ୍ଟ ଧର୍ମଶାଳାରେ ରଖାଯାଇଛି। ଇଂଲଣ୍ଡ ବିପକ୍ଷ ସିରିଜର ୩ ସପ୍ତାହ ବ୍ରେକ୍ ପରେ ଇଣ୍ଡିଆନ ପ୍ରିମିୟର ଲିଗ୍ ଆରମ୍ଭ ହେବ।