ନୂଆଦିଲ୍ଲୀ, ୧୦।୫: ଭାରତୀୟ କ୍ରିକେଟ ଦଳ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଏବଂ ଇଂଲଣ୍ଡ ବିପକ୍ଷରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବା ପାଇଁ ଜୁନ୍ ୨ ତାରିଖରେ ୟୁକେ ଗସ୍ତ କରିବ। ଏହି ସିରିଜରେ ଟିମ୍ ଇଣ୍ଡିଆ ୩-୨ରେ ସିରିଜ ଜିତିବାର ଯଥେଷ୍ଟ ସମ୍ଭାବନା ରହିଛି ବୋଲି ପୂର୍ବାନୁମାନ କରିଛନ୍ତି ପୂର୍ବତନ ଭାରତୀୟ ଅଧିନାୟକ ରାହୁଲ ଡ୍ରାଭିଡ। ଡ୍ରାଭିଡଙ୍କ ନେତୃତ୍ୱରେ ଭାରତ ଶେଷଥର ପାଇଁ ୨୦୦୭ରେ ଇଂଲଣ୍ଡରେ ଟେଷ୍ଟ ସିରିଜ ଜିତିଥିଲା। ଅଗଷ୍ଟ-ସେପ୍ଟେମ୍ବରରେ ହେବାକୁଥିବା ଏହି ସିରିଜ ସଂଘର୍ଷପୂର୍ଣ୍ଣ ହେବ ଏବଂ ଏହାକୁ ଦେଖିବା ପାଇଁ ଉତ୍କଣ୍ଠା ରହିବ ବୋଲି ସେ ପ୍ରକାଶ କରିଛନ୍ତି।
”ଇଂଲଣ୍ଡର ବୋଲିଂ ଶକ୍ତିକୁ ନେଇ ପ୍ରଶ୍ନ କରାଯାଇପାରିବ ନାହିଁ। ଏହି ଦଳର ସିମ୍ ବୋଲିଂ ଆକ୍ରମଣ ବେଶ୍ ଶାଣିତ। ଏଭଳି କେତେଜଣ ଖେଳାଳି ଅଛନ୍ତି ଯେଉଁମାନଙ୍କୁ ସୁଯୋଗ ମିଳିଲେ ସିରିଜ ରୋମାଞ୍ଚକ ହେବ। ଏହାସତ୍ତ୍ୱେ ଭାରତ ପାଇଁ ସୁଯୋଗ ରହିବ ବୋଲି ମୋର ଅନୁଭବ ହେଉଛି। କାରଣ ଇଂଲଣ୍ଡର ଟପ୍-୬ କିମ୍ବା ସେଭେନ ଲାଇନ୍ଅପ୍କୁ ଦେଖିଲେ ମାତ୍ର ଜଣେ ବିଶ୍ୱସ୍ତରୀୟ ବ୍ୟାଟ୍ସମ୍ୟାନ ଦେଖିବାକୁ ମିଳିବେ। ସେ ହେଲେ ଜୋ ରୁଟ୍। ଆଉଜଣେ ହେଲେ ବେନ୍ ଷ୍ଟୋକ୍ସ, ସେ ଜଣେ କ୍ୱାଲିଟି ଅଲରାଉଣ୍ଡର। ମାତ୍ର ରବିଚନ୍ଦ୍ରନ ଅଶ୍ୱିନ ତାଙ୍କ ବିପକ୍ଷରେ ଭଲ କରିବେ ବୋଲି ଆଶା କରାଯାଉଛି। ଭାରତରେ ଷ୍ଟୋକ୍ସ ଯଦିଓ ଅଶ୍ୱିନଙ୍କୁ ଖେଳିବାରେ ଅସୁବିଧା ଅନୁଭବ କରି ନ ଥିଲେ ତେବେ ଆଗାମୀ ସିରିଜରେ ଉତ୍କଣ୍ଠା ରହିବ। ଅଷ୍ଟ୍ରେଲିଆ ବିପକ୍ଷରେ ବିଜୟ ପରେ ଭାରତୀୟ ଖେଳାଳିଙ୍କ ମଧ୍ୟରେ ଆତ୍ମବିଶ୍ୱାସ ବୃଦ୍ଧି ପାଇଛି। କେତେକ ଭାରତୀୟ ଖେଳାଳି ପୂର୍ବରୁ ଇଂଲଣ୍ଡ ଗସ୍ତ କରି ସାରିଛନ୍ତି। ତେଣୁ ଚଳିତ ଥର ବ୍ୟାଟିଂ ଅର୍ଡର ଅଭିଜ୍ଞତାରେ ଭରପୂର ରହିବ। ତେଣୁ ଭାରତ ୩-୨ରେ ସିରିଜ ଜିତିବା ପରି ଅନୁଭବ ହେଉଛି“ ବୋଲି ଏକ ଓ୍ବେବିନାରରେ ଭାଗନେଇ ଡ୍ରାଭିଡ କହିଛନ୍ତି।
ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ପରେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ଆରମ୍ଭ ମଧ୍ୟରେ ଏକମାସର ବ୍ୟବଧାନ ରହିବ। ଟେଷ୍ଟ ସିରିଜ ପୂର୍ବରୁ କୌଣସି ଦଳ ଏତେ ସମୟ ପାଇଥିବ ବୋଲି ମୁଁ ଅନୁଭବ କରୁନି। ତେଣୁ ଭାରତ ଭଲଭାବେ ପ୍ରସ୍ତୁତି ସହ ଟେଷ୍ଟ ସିରିଜକୁ ଓହ୍ଲାଇବାକୁ ସୁଯୋଗ ପାଇବ ବୋଲି ଡ୍ରାଭିଡ କହିଛନ୍ତି। ଇଂଲଣ୍ଡରେ ରହଣି ମଧ୍ୟରେ ଭାରତୀୟ ଖେଳାଳିମାନେ ପରିବେଶ ସହିତ ଭଲଭାବେ ନିଜକୁ ଖାପଖୁଆଇ ପାରିବେ। ଇଂଲଣ୍ଡ ଗସ୍ତ କରିବା ପରେ ଭାରତୀୟ ଦଳ ନ୍ୟୁଜିଲାଣ୍ଡ ବିପକ୍ଷରେ ଜୁନ୍ ୧୮ରୁ ସାଉଥାମ୍ପଟନଠାରେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଖେଳିବ। ଏହାପରେ ଅଗଷ୍ଟ ୪ରୁ ନଟିଂହାମରେ ପ୍ରଥମ ଟେଷ୍ଟରେ ଇଂଲଣ୍ଡକୁ ଭେଟିବ। ତେଣୁ ଅଭ୍ୟାସ ପାଇଁ ଦୀର୍ଘ ସମୟ ପାଉଥିବାରୁ ଏଥର ଇଂଲଣ୍ଡ ବିପକ୍ଷରେ ଭଲ କରିବ ବୋଲି ଡ୍ରାଭିଡ ଆଶା କରୁଛନ୍ତି।