ବର୍ମିଂହାମ୍,୬ା୮: ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତୀୟ ରେସ୍ଲରମାନେ ଶୁକ୍ରବାର ୩ ସ୍ବର୍ଣ୍ଣ ଏବଂ ଗୋଟିଏ ରୌପ୍ୟ ଓ ୨ ବ୍ରୋଞ୍ଜ ସହ ୬ ପଦକ ପଦକ ଜିତିଛନ୍ତି। ଷ୍ଟାର ରେସ୍ଲର ବଜରଙ୍ଗ ପୁନିଆ ତାଙ୍କ ଟାଇଟଲ ବଜାୟ ରଖିବାରେ ସମର୍ଥ ହୋଇଛନ୍ତି। ମହିଳା ରେସଲର ସାକ୍ଷୀ ମଲିକ ମହିଳା ୬୨କେଜି ଫ୍ରିଷ୍ଟାଇଲ ଶ୍ରେଣୀରେ ସ୍ବର୍ଣ୍ଣ ପଦକ ଲାଭ କରିଛନ୍ତି। ଫାଇନାଲରେ ସେ କାନାଡାର ଗୋଡିନେଜ୍ ଗୋଞ୍ଜାଲେଜ୍ଙ୍କୁ ହରାଇ ଦେଇଛନ୍ତି। ଦୀପକ ପୁନିଆ ପୁରୁଷ ୮୬କେଜି ଫ୍ରିଷ୍ଟାଇଲ ଶ୍ରେଣୀ ଫାଇନାଲରେ ପାକିସ୍ତାନର ମହମ୍ମଦ ଇନାମଙ୍କୁ ୩-୦ରେ ହରାଇ ଦେଇଛନ୍ତି। ଅଂଶୁ ମଲିକ ତାଙ୍କ ୨୧ତମ ଜନ୍ମ ଦିବସରେ ରୌପ୍ୟ ପଦକ ଜିତିଛନ୍ତି। ଟୋକିଓ ଅଲିମ୍ପିକ୍ସ ବ୍ରୋଞ୍ଜ ପଦକ ବିଜେତା ବଜରଙ୍ଗ ୬୫ କେଜି ଶ୍ରେଣୀ ପ୍ରତିଯୋଗିତାରେ ସମ୍ପୂର୍ଣ୍ଣ ପ୍ରାଧାନ୍ୟ ବିସ୍ତାର କରିଥିଲେ। ପ୍ରଥମ ରାଉଣ୍ଡ ଗୁଡ଼ିକରେ ସେ ୪ଟି ବାଉଟରୁ ୩ଟିରେ ବିଜୟ ହାସଲ କରିଥିଲେ। ଫାଇନାଲରେ ସେ କାନାଡାର ଲାଚ୍ଲାନ ମ୍ୟାକ୍ନିଲ୍ଙ୍କୁ ୯-୨ରେ ହରାଇ ଦେଇଥିଲେ। ଏହି ୨୮ ବର୍ଷୀୟ ଟୋକିଓ ଅଲିମ୍ପିକ୍ସ ବ୍ରୋଞ୍ଜ ପଦକ ବିଜେତା ଫାଇନାଲ ପଥରେ ନାଉରୁର ଲୋଓ୍ବି ବିଙ୍ଗହାମ୍ ଓ ମରିସସ୍ର ଜୁନ୍ ଗଏଲିଏନ୍ କୋରିସ ବନ୍ଦୋ ଏବଂ ଇଂଲଣ୍ଡର ଜର୍ଜ ରାମ୍ଙ୍କୁ ପରାସ୍ତ କରିଥିଲେ। ଅନ୍ୟପକ୍ଷରେ ପ୍ରତିଯୋଗିତାରେ ପ୍ରଭାବୀ ପ୍ରଦର୍ଶନ କରିଆସିଥିବା ଅଂଶୁ ୫୭କେଜି ଫାଇନାଲରେ ନାଇଜେରିଆର ଫୋଲାସେଡ୍ ଆଡେକୁରୋଏଙ୍କଠାରୁ ୩-୭ରେ ହାରିଯାଇଥିଲେ। ଫାଇନାଲ ପଥରେ ସେ ଅଷ୍ଟ୍ରେଲିଆ ଓ ଶ୍ରୀଲଙ୍କା ପ୍ରତିଦ୍ୱନ୍ଦ୍ୱୀଙ୍କୁ ହରାଇ ଦେଇଥିଲେ। ଅନ୍ୟପକ୍ଷରେ ଦିବ୍ୟା କାକରନ ମହିଳା ୬୮କେଜି ଫ୍ରିଷ୍ଟାଇଲ ଏବଂ ମୋହିତ ଗ୍ରଓ୍ବୋଲ ପୁରୁଷ ୧୨୫ କେଜି କାଟେଗୋରିରେ ଶ୍ରେଣୀରେ ବ୍ରୋଞ୍ଜ ଜିତିଛନ୍ତି।