ଭୁବନେଶ୍ୱର, ୮।୬ (କ୍ରୀଡ଼ା ପ୍ରତିନିଧି): ହିରୋ ଇଣ୍ଟରକଣ୍ଟିନେଣ୍ଟାଲ କପ୍ ଫୁଟବଲ ଟୁର୍ନାମେଣ୍ଟ ଆୟୋଜନ ପାଇଁ କଳିଙ୍ଗ ଷ୍ଟାଡିୟମ ପ୍ରସ୍ତୁତ। ପୂର୍ବରୁ ଭାରତୀୟ ଦଳ ଏଠାରେ ଅଭ୍ୟାସ ଚଳାଇଥିବାବେଳେ ଅନ୍ୟ ୩ ଦଳ ପର୍ଯ୍ୟାୟକ୍ରମେ ବୁଧବାର ପହଞ୍ଚତ୍ବାରେ ଲାଗିଛନ୍ତି। ଭାରତ ବ୍ୟତୀତ ଲେବାନନ, ଭାନୁଆଟୁ ଓ ମଙ୍ଗୋଲିଆ ଏଥିରେ ଅଂଶଗ୍ରହଣ କରୁଛନ୍ତି। ପ୍ରତିଯୋଗିତା ୯ ତାରିଖରେ ଆରମ୍ଭ ହୋଇ ୧୮ରେ ଶେଷ ହେବ। ସମସ୍ତ ମ୍ୟାଚ କଳିଙ୍ଗ ଷ୍ଟାଡିୟମରେ ଖେଳାଯିବ। ୨୦୧୯ରେ ଅନୁଷ୍ଠିତ ଗତ ସଂସ୍କରଣରେ ଉତ୍ତର କୋରିଆ ଚାମ୍ପିୟନ ହୋଇଥିଲା। ଫାଇନାଲରେ ଏହି ଦଳ ତାଜିକସ୍ତାନକୁ ପରାସ୍ତ କରିଥିଲା। ଏଥର ଆୟୋଜକ ଦଳଭାବେ ଭାରତ ଖେଳିବାକୁ ସୁଯୋଗ ପାଇଥିବାବେଳେ ଏସିଆନ୍ ଫୁଟବଲ କନ୍ଫେଡେରେଶନ (ଏଏଫ୍ସି)ରୁ ଲେବାନନ ଓ ମଙ୍ଗୋଲିଆ ଏବଂ ଓସେନିଆ ଫୁଟବଲ କନ୍ଫେଡେରେଶନ(ଓଏଫ୍ସି)ରୁ ଭାନୁଆଟୁ ପ୍ରତିନିଧିତ୍ୱ କରିବାକୁ ଯାଉଛି। ରାଉଣ୍ଡ ରବିନ ପର୍ଯ୍ୟାୟରେ ପ୍ରତି ଦଳ ପରସ୍ପର ସହିତ ଖେଳିବାପରେ ଦୁଇ ଶ୍ରେଷ୍ଠ ଦଳ ମଧ୍ୟରେ ଫାଇନାଲ ଅନୁଷ୍ଠିତ ହେବ।
୨୦୧୮ରେ ଭାରତ ଅପରାଜେୟ
ଇଣ୍ଟରକଣ୍ଟିନେଣ୍ଟାଲ କପ୍ର ପ୍ରଥମ ସଂସ୍କରଣ ୨୦୧୮ରେ ମୁମ୍ବାଇରେ ଅନୁଷ୍ଠିତ ହୋଇଥିଲା। ଏଥିରେ ଭାରତ ଚାମ୍ପିୟନ ହୋଇଥିଲା। ସେତେବେଳେ ଷ୍ଟିଫେନ୍ କନ୍ଷ୍ଟାଣ୍ଟିନ୍ ଭାରତୀୟ ଦଳର ମୁଖ୍ୟ କୋଚ୍ ଥିଲେ। ଅହମଦାବାଦରେ ଅନୁଷ୍ଠିତ ପରବର୍ତ୍ତୀ ସଂସ୍କରଣ ବେଳକୁ ଇଗର ଷ୍ଟିମାକ୍ ଦଳର ଦାୟିତ୍ୱରେ ଥିଲେ। ଏହି ପ୍ରତିଯୋଗିତାକୁ ନେଇ ଭାରତର ଅନେକ ସ୍ମରଣୀୟ ସ୍ମୃତି ରହିଛି। ୨୦୧୮ରେ ଚାଇନିଜ୍ ତାଇପେ ବିପକ୍ଷ ଓପନିଂ ମ୍ୟାଚରେ ଭାରତୀୟ ଦଳ ଆଧିପତ୍ୟ ବିସ୍ତାର କରି ୫-୦ ଗୋଲରେ ବିଜୟୀ ହୋଇଥିଲା। ଏହି ମ୍ୟାଚରେ ସୁନୀଲ ଛେତ୍ରୀ ହ୍ୟାଟ୍ରିକ ଗୋଲ ସ୍କୋର କରିଥିଲେ। ଏହି ସଂସ୍କରଣରେ ଖେଳିଥିବା ଅନ୍ୟ ୨ ଦଳ ନ୍ୟୁଜିଲାଣ୍ଡ ଓ କେନିୟା ବିପକ୍ଷରେ ମଧ୍ୟ ଭାରତ ପ୍ରଭାବୀ ପ୍ରଦର୍ଶନ କରିଥିଲା। ଭାରତ ଏହାର ଦ୍ୱିତୀୟ ମ୍ୟାଚରେ କେନିୟାକୁ ୩-୦ ଓ ତୃତୀୟ ଗେମ୍ରେ ନ୍ୟୁଜିଲାଣ୍ଡକୁ ୨-୧ ଗୋଲରେ ହରାଇଥିଲା। ଫାଇନାଲରେ କେନିୟାକୁ ୨-୦ ଗୋଲରେ ହରାଇ ଭାରତ ଟାଇଟଲ ଅର୍ଜନ କରିଥିଲା। ଏହାଥିଲା ଛେତ୍ରୀଙ୍କ ୧୦୦ତମ ମ୍ୟାଚ। ଲିଗ୍ ପର୍ଯ୍ୟାୟରେ ବିଶେଷ ଦର୍ଶକ ଷ୍ଟାଡିୟମକୁ ଆସି ନ ଥିଲେ। ମାତ୍ର ଫାଇନାଲ ଦେଖିବାକୁ ବହୁ ସଂଖ୍ୟାରେ ଆସିବାକୁ ଛେତ୍ରୀ ଟୁଇଟ୍ କରି ଅନୁରୋଧ କରିବା କାମ ଦେଇଥିଲା। ଅନେକ ଦର୍ଶକ ଷ୍ଟାଡିୟମରେ ଫାଇନାଲ ଉପଭୋଗ କରିଥିଲେ। ୪ ମ୍ୟାଚରେ ଛେତ୍ରୀ ମୋଟ ୯ଟି ଗୋଲ ଦେଇଥିଲେ।
୨୦୧୯: ସିରିଆ ବିପକ୍ଷରେ ପଏଣ୍ଟ ଭାଗ
୨୦୧୯ରେ ଦ୍ୱିତୀୟ ସଂସ୍କରଣରେ ଭାରତର ପ୍ରଦର୍ଶନ ଆଶାନୁରୂପ ହୋଇ ନ ଥିଲେ ମଧ୍ୟ ଉଚ୍ଚ ର଼୍ୟାଙ୍କ୍ପ୍ରାପ୍ତ ସିରିୟା ବିପକ୍ଷରେ ପଏଣ୍ଟ ଭାଗ କରିବା ଉଲ୍ଲେଖନୀୟ ଥିଲା। ଭାରତ ଏହାର ପ୍ରଥମ ମ୍ୟାଚରେ ତାଜିକିସ୍ତାନଠାରୁ ୨-୪ ଗୋଲରେ ହାରି ଅଭିଯାନ ଆରମ୍ଭ କରିଥିଲା। ପରବର୍ତ୍ତୀ ମ୍ୟାଚରେ ଉତ୍ତର କୋରିଆଠାରୁ ୨-୫ ଗୋଲରେ ପରାସ୍ତ ହୋଇଥିଲା। ତେବେ ତୃତୀୟ ମ୍ୟାଚକୁ ଶକ୍ତିଶାଳୀ ସିରିୟା ବିପକ୍ଷରେ ଡ୍ର କରିବାରୁ ପଏଣ୍ଟ ଭାଗ କରିଥିଲା। ତାଜିକିସ୍ତାନ ଓ ଉତ୍ତର କୋରିଆ ୬ ପଏଣ୍ଟ ଲେଖାଏ ପାଇଥିବାରୁ ଫାଇନାଲ ଖେଳିଥିଲେ। ସଂଘର୍ଷପୂର୍ଣ୍ଣ ଫାଇନାଲରେ ଉତ୍ତର କୋରିଆ ଏକମାତ୍ର ଗୋଲରେ ତାଜିକିସ୍ତାନକୁ ହରାଇ ଟାଇଟଲ ଜିତିଥିଲା। ୭ଟି ମ୍ୟାଚରୁ ମୋଟ ୨୬ଟି ଗୋଲ ହୋଇଥିଲା। ଭାରତର ସୁନୀଲ ଛେତ୍ରୀ, ଉତ୍ତର କୋରିଆର ଜଙ୍ଗ ଇ-ଗ୍ବାନ୍ ଓ ରି ହ୍ୟୋଙ୍ଗ୍ ଜିନ୍ ସର୍ବାଧିକ ୩ଟି ଲେଖାଏ ଗୋଲ ସ୍କୋର କରିଥିଲେ। ନିକଟ ଅତୀତରେ ଭାରତ ଭଲ ପ୍ରଦର୍ଶନ କରିଥିବାରୁ ଦୀର୍ଘ ୫ ବର୍ଷ ବ୍ୟବଧାନରେ ପୁଣି ଟାଇଟଲ ଜିତିବାର ସୁଯୋଗ ରହିଛି।