ପର୍ଥ,୧୦।୧୦: ଅଷ୍ଟ୍ରେଲିଆରେ ୨୦୨୨ ଟି-୨୦ ବିଶ୍ୱକପ ପାଇଁ ପ୍ରସ୍ତୁତ ହେଉଥିବା ଭାରତ ସୋମବାର ପର୍ଥରେ ପଶ୍ଚିମ ଅଷ୍ଟ୍ରେଲିଆ ବିପକ୍ଷରେ ପ୍ରଥମ ଅଭ୍ୟାସ ମ୍ୟାଚ ଖେଳିଛି। ଏହି ମ୍ୟାଚରେ ଭାରତ ପଶ୍ଚିମ ଅଷ୍ଟ୍ରେଲିଆକୁ ୧୩ ରନରେ ପରାସ୍ତ କରିଛି। ସୁର୍ଯ୍ୟକୁମାର ଯାଦବ ଏବଂ ଅର୍ଶଦୀପ ସିଂ ଭାରତ ପାଇଁ ଚମତ୍କାର ପ୍ରଦର୍ଶନ କରିଥିଲେ।
ଭାରତ ପ୍ରଥମେ ଖେଳିବା ପରେ ୨୦ ଓଭରରେ ୬ ଉଇକେଟ ପାଇଁ ୧୫୮ ରନ ସଂଗ୍ରହ କରିଥିଲା। ଏହାର ଜବାବରେ ପଶ୍ଚିମ ଅଷ୍ଟ୍ରେଲିଆ ଦଳ ନିର୍ଦ୍ଧାରିତ ଓଭରରେ ୮ ଉଇକେଟ ହରାଇ ମାତ୍ର ୧୪୫ ରନ ସ୍କୋର କରିଥିଲା।
ଭାରତ ପାଇଁ ମାତ୍ର ୩୫ ବଲରେ ସୂର୍ଯ୍ୟକୁମାର ୫୨ ରନ ସଂଗ୍ରହ କରିଥିଲେ। ଏଥି ସହିତ ହାର୍ଦ୍ଦିକ ପାଣ୍ଡ୍ୟା ଗୁରୁତ୍ୱପୂର୍ଣ୍ଣ ୨୯ ରନ ସ୍କୋର କରିଥିଲେ। ଏହା ବ୍ୟତୀତ ଦୀପକ ହୁଡା ୨୨ ଏବଂ ଦୀନେଶ କାର୍ତ୍ତିକ ୧୯ ରନ କରିଥିଲେ।
ଏହି ମ୍ୟାଚ୍ରେ ରୋହିତ ଶର୍ମା ଏବଂ ଉଇକେଟ କିପର ବ୍ୟାଟ୍ସମ୍ୟାନ ରିଷଭ ପନ୍ତ ଭାରତ ପାଇଁ ଇନିଂସ ଓପନ କରିଥିଲେ। ତେବେ ଦୁହେଁ ବ୍ୟାଟିଂରେ ବିଫଳ ହୋଇଥିଲେ। ରୋହିତ ୩ ଏବଂ ପନ୍ତ ୯ ରନ ସ୍କୋର କରିଥିଲେ। ବୋଲିଂରେ ଅର୍ଶଦୀପ ସିଂ ଚମତ୍କାର ପ୍ରଦର୍ଶନ କରିଥିଲେ। ଅର୍ଶଦୀପ ମୋଟ ତିନିଟି ଉଇକେଟ ନେଇଥିଲେ। ଭୁବନେଶ୍ୱର କୁମାର ଦୁଇଟି ସଫଳତା ପାଇଥିଲେ।
ରୋହିତ ଶର୍ମା ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ। କେଏଲ ରାହୁଲ ଏବଂ ବିରାଟ କୋହଲି ଏହି ମ୍ୟାଚରେ ଅଂଶଗ୍ରହଣ କରିନାହାଁନ୍ତି। ଦୀପକ ହୁଡା ୧୪ ବଲରେ ୨୨ ରନ ଏବଂ ହାର୍ଦ୍ଦିକ ପାଣ୍ଡ୍ୟା ୨୦ ବଲରେ ୨୯ ରନ ସଂଗ୍ରହ କରିଥିଲେ।