ଇସଲାମାବାଦ୍,୧୫।୨: ଭାରତୀୟ ଏୟାର ଆମ୍ବୁଲାନ୍ସ୍ ପାକିସ୍ତାନରେ ଜରୁରି ଅବତରଣ କରିଛି। ମଝି ଆକାଶରେ ଇନ୍ଧନ ସରିଯିବାରୁ ଭାରତୀୟ ଏୟାର ଆମ୍ବୁଲାନ୍ସ୍ ପକ୍ଷରୁ ପାକିସ୍ତାନ ବେସାମରିକ ବିମାନ ଚଳାଚଳ କର୍ତ୍ତୃପକ୍ଷଙ୍କ ସହିତ ଯୋଗାଯୋଗ କରାଯାଇଥିଲା। ଅନୁମତି ମିଳିବା ପରେ ଏହା ରବିବାର ଇସଲାମାବାଦ୍ ବିମାନ ବନ୍ଦରରେ ଅବତରଣ କରିଥିଲା। ଏହି ବିମାନ କୋଲକାତାରୁ ତାଜିକିସ୍ତାନ ରାଜଧାନୀ ଦୁଶନାବେ ଅଭିମୁଖେ ଯାତ୍ରା କରୁଥିଲା। ବିମାନରେ ଜଣେ ବ୍ରିଟିଶ୍ ରୋଗୀ, ଜଣେ ଡାକ୍ତର ଏବଂ ୨ ଜଣ ନର୍ସଙ୍କ ସହିତ ବିମାନ କର୍ମଚାରୀମାନେ ଥିଲେ। ଇନ୍ଧନ ଭରି ୨ ଘଣ୍ଟା ପରେ ବିମାନଟି ଗନ୍ତବ୍ୟ ପଥରେ ଯାତ୍ରା ଆରମ୍ଭ କରିଥିଲା।