ନୂଆଦିଲ୍ଲୀ,୧୫ ।୧୨: ଚାଇନା ସହ ଲାଗି ରହିଥିବା ସୀମା ବିବାଦ ମଧ୍ୟରେ ଗୁରୁବାର ଭାରତୀୟ ବାୟୁସେନାର ଶକ୍ତି ଆହୁରି ମଜଭୁତ ହୋଇଛି । ଭାରତୀୟ ବାୟୁସେନାରେ ଆଉ ଏକ ରାଫାଲ ବିମାନ ସାମିଲ ହୋଇଛି । ଫ୍ରାନ୍ସ ସହ ହୋଇଥିବା ରାଫାଲ ଚୁକ୍ତି ଅନୁଯାୟୀ ଶେଷ ତଥା ୩୬ ତମ ରାଫାଲ ବିମାନ ଭାରତ ପହଞ୍ଚିଛି ।
ଫ୍ରାନ୍ସରୁ ୩୬ ତମ ରାଫାଲ ଯୁଦ୍ଧ ବିମାନ ଗୁରୁବାର ଅର୍ଥାତ୍ ୧୫ ଡିସେମ୍ବରରେ ଭାରତରେ ପହଞ୍ଚିଛି । ଭାରତୀୟ ବାୟୁସେନା ଟୁଇଟ କରି ଏହି ସୂଚନା ଦେଇଛି । ପଶ୍ଚିମବଙ୍ଗର ହାସିମାରା ଏୟାର ବେସରେ ଏହି ରାଫାଲକୁ ଲ୍ୟାଣ୍ଡ କରାଯାଇଛି । ଏହାସହ ଫ୍ୟାନ୍ସ ସହିତ ହୋଇଥିବା ରାଫାଲ ଚୁକ୍ତି ଶେଷ ହୋଇଛି । ସୂଚନାଯୋଗ୍ୟ, ପ୍ରଥମ ରାଫାଲ ଯୁଦ୍ଧ ବିମାନ ଗତବର୍ଷ ଜୁଲାଇରେ ଭାରତ ଆସିଥିଲା ।
ସମାଚାର ଏଜେନ୍ସି ଏଏନଆଇର ସୂଚନା ଅନୁଯାୟୀ, ୩୬ ତମ ତଥା ଶେଷ ରାଫାଲ ବିମାନ ଭାରତ ପହଞ୍ଚିବା ପାଇଁ ଫ୍ରାନ୍ସରୁ ଉଡାଣ ଆରମ୍ଭ କରିବା ପରେ ୟୁଏଇ ଏୟାରକ୍ରାପ୍ଟରୁ ଆକାଶରେ ଇନ୍ଧନ ଭରିଥିଲା ଓ ଏହାପରେ ଭାରତରେ ଲ୍ୟାଣ୍ଡ କରିଥିଲା । ସୂଚନାଯୋଗ୍ୟ, ମୋଦି ସରକାର ୨୦୧୬ରେ ଫ୍ରାନ୍ସ ସହ ୫୯,୦୦୦ କୋଟି ଟଙ୍କାର ଚୁକ୍ତି ସହ ଫ୍ରାନ୍ସ ନିକଟରୁ ୩୬ଟି ରାଫାଲ ଯୁଦ୍ଧ ବିମାନ କ୍ରୟ କରିବାକୁ ଚୁକ୍ତି କରିଥିଲେ ।
ଭାରତକୁ ତା’ଣ ଶେଷ ରାଫାଲ ବିମାନ ସେତେବେଳେ ମିଳିଛି ଯେତେବେଳେ ଚାଇନା ସହ ସୀମା ବିବାଦକୁ ନେଇ ଉଭୟ ଦେଶ ମଧ୍ୟରେ ଉତ୍ତେଜନା ପରିସ୍ଥିତି ଲାଗି ରହିଛି । ଅରୁଣାଚଳ ପ୍ରଦେଶର ତୱାଂଗରେ ହୋଇଥିବା ମୁହାଁମୁହିଁ ପରେ ଭାରତୀୟ ବାୟୁସେନାର ପୂର୍ବ କମାଣ୍ଡ ଏଲଏସି ନିକଟରେ ଶକ୍ତି ପ୍ରଦର୍ଶନ କରୁଛନ୍ତି । ଭାରତୀୟ ବାୟୁସେନାର ୨ ଦିବସୀୟ ଯୁଦ୍ଧାଭ୍ୟାସରେ ରାଫାଲ ଯୁଦ୍ଧ ବିମାନ ବି ସାମିଲ ହୋଇଛି । ଏହାସହ ସୁଖୋଇ ଓ ଅନ୍ୟ କେତେକ ହେଲିକପ୍ଟର ଯୁଦ୍ଧ କୌଶଳ ପ୍ରଦର୍ଶନ କରିଛି ।