ଓଭାଲ,୩।୯: ଚଳିତ ଓଭାଲ ଟେଷ୍ଟରେ ପ୍ରମୁଖ ବ୍ୟାଟ୍ସମ୍ୟାନ ବିଫଳ ହେବା ସତ୍ତ୍ୱେ ଇଂଲଣ୍ଡ ପ୍ରଥମ ଇନିଂସରେ ଅଗ୍ରଣୀ ହାସଲ କରିଛି। ଭାରତ ୧୯୧ ରନ୍ କରିଥିବା ବେଳେ ୨୯୦ ରନ୍ରେ ଅଲଆଉଟ୍ ହୋଇଛି ଘରୋଇ ଇଂଲଣ୍ଡ ଦଳ। ଫଳରେ ଇଂଲଣ୍ଡ ପ୍ରଥମ ଇନିଂସରେ ୯୯ ରନ୍ର ଗୁରୁତ୍ୱପୂର୍ଣ୍ଣ ଅଗ୍ରଣୀ ହାସଲ କରିଛି।
ପୂର୍ବଦିନର ସ୍କୋର ୫୩/୩ରୁ ବ୍ୟାଟିଂ ଆରମ୍ଭ କରିଥିବା ଇଂଲଣ୍ଡକୁ ଦ୍ୱିତୀୟ ଦିନ ଆରମ୍ଭରୁ ଡବଲ ଝଟକା ଦେଇଥିଲେ ଭାରତୀୟ ପେସର ଉମେଶ ଯାଦବ। ଦଳ ମାତ୍ର ୬୨ ରନ୍ ମଧ୍ୟରେ ଅଧା ଉଇକେଟ ହରାଇ ସାରିଥିଲା। ଲାଗୁଥିଲା ଇଂଲଣ୍ଡ ଦଳ ଖୁବ୍ ଶୀଘ୍ର ଅଲଆଉଟ୍ ହୋଇଯିବ। କିନ୍ତୁ ଜନ୍ନି ବେଆରଷ୍ଟୋ (୩୭) ଓ ଓଲି ପୋପ (୮୧)ଙ୍କ ଯୋଡ଼ି ୬ଷ୍ଠ ଉଇକେଟ ପାଇଁ ୮୯ ରନ୍ ଯୋଡ଼ିଥିଲେ। ପରେ ମୋଇନ ଅଲି (୩୫) ଓ କ୍ରିସ ଓ୍ବେକ୍ସ (୫୦)ଙ୍କ ଉଇକେଟ ନେବା ପାଇଁ ଭାରତୀୟ ବୋଲରଙ୍କୁ ଖୁବ୍ ଝାଳ ବୁହାଇବାକୁ ପଡ଼ିଥିଲା। ଶେଷରେ ୨୯୦ ରନ୍ରେ ଅଟକି ଥିଲା ଘରୋଇ ଦଳର ପ୍ରଥମ ଇନିଂସ। ଭାରତ ଲାଗି ଉମେଶ ୩ ଉଇକେଟ ନେଇଥିବା ବେଳେ ଯଶପ୍ରୀତ ବୁମରା ଓ ରବୀନ୍ଦ୍ର ଜାଡେଜା ୨ ଲେଖାଏ ଉଇକେଟ ହାତେଥିଲେ।
