କାନପୁର,୨୬।୧୧: ପ୍ରଥମ ଟେଷ୍ଟର ଦ୍ୱିତୀୟ ଦିନରେ ୫୭ ଓଭର ବୋଲିଂ କରିବା ପରେ ମଧ୍ୟ ନ୍ୟୁଜିଲାଣ୍ଡର ଗୋଟିଏ ହେଲେ ଉଇକେଟ ନେଇପାରିନାହାନ୍ତି ଭାରତୀୟ ବୋଲର। ତାହା ପୁଣି ରବିଚନ୍ଦ୍ରନ ଅଶ୍ୱିନ, ରବୀନ୍ଦ୍ର ଜାଡେଜା ଓ ଇଶାନ୍ତ ଶର୍ମାଙ୍କ ଭଳି ଅଭିଜ୍ଞ ବୋଲରଙ୍କ ଉପସ୍ଥିତିରେ। ଏଥିଲାଗି ନ୍ୟୁଜିଲାଣ୍ଡର ଦୁଇ ଓପନର ଟମ୍ ଲଥାମ ଓ ଓ୍ବିଲ ୟଙ୍ଗଙ୍କୁ ଶ୍ରେୟ ଦେବାକୁ ପଡ଼ିବ। ଦୁହେଁ ଭାରତୀୟ ବୋଲରଙ୍କୁ ଉଇକେଟ ନେବାକୁ ସୁଯୋଗ ନ ଦେଇ ପୂରା ଦିନ ବ୍ୟାଟିଂ କରିଥିଲେ। ଲଥାମ ୫୦ (୪ ଚୌକା) ଓ ୟଙ୍ଗଙ୍କ ଅପରାଜିତ ୭୫ (୧୨ ଚୌକା) ରନ୍ ପାଳି ଯୋଗୁ ନ୍ୟୁଜିଲାଣ୍ଡ ବିନା କ୍ଷତିରେ ୧୨୯ ରନ୍ କରିବାକୁ ସକ୍ଷମ ହୋଇଛି। ଭ୍ରମଣକାରୀ ଦଳକୁ ଇନିଂସ ଅଗ୍ରଣୀ ପାଇଁ ବଳକା ୧୦ ଉଇକେଟରେ ୨୧୭ ରନ୍ ଦରକାର।
ପୂର୍ବରୁ ୩୪୫ ରନ୍ରେ ଅଲଆଉଟ୍ ହୋଇଯାଇଥିଲା ଟିମ୍ ଇଣ୍ଡିଆ। ପୂର୍ବ ଦିନର ସ୍କୋର (୨୫୮/୪)ରୁ ବ୍ୟାଟିଂ କରିଥିବା ଘରୋଇ ଦଳ ବଳକା ୬ ଉଇକେଟରେ ମାତ୍ର ୮୭ ରନ୍ ଯୋଡ଼ି ପାରିଥିଲା। ପଦାର୍ପଣକାରୀ ବ୍ୟାଟର ଶ୍ରେୟାସ ଆୟାର (୧୦୫ ରନ୍, ୧୩ ଚୌକା ଓ ୨ ଛକା) ଶତକକୁ ଛାଡ଼ି ଦେଲେ ମ୍ୟାଚ୍ର ଦ୍ୱିତୀୟ ଦିନ ସମ୍ପୂର୍ଣ୍ଣ ରୂପେ ନ୍ୟୁଜିଲାଣ୍ଡ ନିୟନ୍ତ୍ରଣରେ ଥିଲା। ଟିମ୍ ସୌଦି ୫ ଉଇକେଟ ସଫଳତା ପାଇଥିଲେ।
