ନ୍ୟୁୟର୍କ,୮।୯ (ପି.ଟି.): ଚଳିତ ୟୁଏସ୍ ଓପନ୍ରୁ ଭାରତୀୟ ତାରକା ରୋହନ ବୋପାନ୍ନା ଓ ତାଙ୍କ କାନାଡ଼ା ପାର୍ଟନର ଡେନିସ୍ ଶାପୋଭାଲୋଭ ବିଦାୟ ନେଇଛନ୍ତି। ଏହି ଯୋଡି କ୍ୱାର୍ଟର ଫାଇନାଲ ମ୍ୟାଚ୍ରେ ପରାସ୍ତ ହୋଇଛନ୍ତି। ଏଥି ସହିତ ୟୁଏସ୍ ଓପନ୍ରୁ ଭାରତୀୟ ଅଭିଯାନ ଶେଷ ହୋଇଛି। ବୋପାନ୍ନା ଓ ସାପୋଭାଲୋଭ ୫-୭, ୫-୭ ସେଟ୍ରେ ନେଦରଲାଣ୍ଡ୍ସର ଜିନ୍- ଜୁଲିଏନ୍ ରୋଜର ଓ ରୋମାନିଆର ହାରିଆ ଟେକାଓଙ୍କଠାରୁ ଏକଘଣ୍ଟା ୨୬ ମିନିଟ୍ରେ ପରାସ୍ତ ହୋଇ ବିଦାୟ ନେଇଛନ୍ତି। ୨୦୧୮ ପରଠାରୁ ବୋପାନ୍ନାଙ୍କ ପାଇଁ କୌଣସି ଗ୍ରାଣ୍ଡସ୍ଲାମ ଟୁର୍ନାମେଣ୍ଟରେ ଏହା ଶ୍ରେଷ୍ଠ ପ୍ରଦର୍ଶନ ସାବ୍ୟସ୍ତ ହୋଇଛି। ସେ ୨୦୧୮ରେ ଉଭୟ ୟୁଏସ୍ ଓପନ ଓ ଫ୍ରେଞ୍ଚ୍ ଓପନ୍ର କ୍ୱାର୍ଟର ଫାଇନାଲରେ ପ୍ରବେଶ କରିଥିଲେ। ପୂର୍ବରୁ ଅନ୍ୟତମ ଭାରତୀୟ ଖେଳାଳି ଡିଭିଜ ଶରନ ଓ ସୁମିତ ନାଗାଲ ମଧ୍ୟ ସେମାନଙ୍କ ବିଭାଗରେ ପରାସ୍ତ ହୋଇ ବିଦାୟ ନେଇଛନ୍ତି।