କାହିରା/ନୂଆଦିଲ୍ଲୀ,୧୬ା୪: ସୁଦାନର ରାଜଧାନୀ ଖାର୍ତୁମରେ ଜଣେ ଭାରତୀୟ ନାଗରିକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି। ଏଠାରେ ହିଂସା ସମୟରେ ଗୁଳି ଚଳାଇବାରୁ ଭାରତୀୟ ନାଗରିକଙ୍କର ମୃତ୍ୟୁ ଘଟିଛି। ଖାର୍ତୁମରେ ଥିବା ଭାରତୀୟ ଦୂତାବାସ କହିଛି ଯେ, ମୃତ ଆଲବର୍ଟ ଅଗଷ୍ଟିନ ସୁଦାନର ଏକ କମ୍ପାନୀରେ କାମ କରୁଥିଲେ। ଅଧିକ ବ୍ୟବସ୍ଥା କରିବାକୁ ଦୂତାବାସ ପରିବାର ଏବଂ ଡାକ୍ତରୀ ଟିମ୍ ସହ ଯୋଗାଯୋଗରେ ରହିଛି।
ଏନେଇ ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଶୋକ ପ୍ରକାଶ କରିଛନ୍ତି। ସେ ଟୁଇଟ୍ କରି କହିଛନ୍ତି, ଖାର୍ତୁମରେ ଜଣେ ଭାରତୀୟ ନାଗରିକଙ୍କ ମୃତ୍ୟୁ ହେବା ଅତ୍ୟନ୍ତ ଦୁଃଖଦାୟକ। ମୃତକଙ୍କ ପରିବାରକୁ ସମସ୍ତ ସହାୟତା ଯୋଗାଇବା ପାଇଁ ଦୂତାବାସ ଯଥାସମ୍ଭବ ଉଦ୍ୟମ କରୁଛି। ସେ ଆହୁରି ମଧ୍ୟ କହିଛନ୍ତି, ଖାର୍ତୁମରେ ପରିସ୍ଥିତି ବହୁ ଚିନ୍ତାର ବିଷୟ ପାଲଟିଛି। ଆମେ ସେହି ଦେଶର ବିକାଶ ଉପରେ ନଜର ରଖିବା ଜାରି ରଖିବୁ।