ଆଙ୍କାରା,୧୧ା୨: ତୁର୍କୀରେ ହୋଇଥିବା ଭୟଙ୍କର ଭୂକମ୍ପରେ ଭାରତୀୟ ନାଗରିକମାନେ ଫସି ରହିଥିବାର କୌଣସି ଖବର ନାହିଁ। ଏନେଇ ତୁର୍କୀରେ ଥିବା ଭାରତୀୟ ରାଷ୍ଟ୍ରଦୂତ ବୀରେନ୍ଦ୍ର ପାଲ ସୂଚନା ଦେଇଛନ୍ତି। ସେ କହିଛନ୍ତି, ଏପର୍ଯ୍ୟନ୍ତ ଭୂକମ୍ପ ପ୍ରଭାବିତ ତୁର୍କୀରେ କୌଣସି ଭାରତୀୟ ଫସିଥିବା ସୂଚନା ନାହିଁ। ତୁର୍କୀରେ ୩୦୦୦ ଭାରତୀୟ ଅଛନ୍ତି ଏବଂ ସେମାନଙ୍କ ମଧ୍ୟରୁ ଅଧିକାଂଶ ଭୂକମ୍ପ ପ୍ରଭାବିତ ଅଞ୍ଚଳଠାରୁ ଦୂରରେ ଅଛନ୍ତି। ଏପର୍ଯ୍ୟନ୍ତ କୌଣସି ଭାରତୀୟଙ୍କର କିଛି କ୍ଷତି ହୋଇଥିବା ଖବର ଆମ ପାଖରେ ନାହିଁ।
ତୁର୍କୀ-ସିରିଆ ଭୂକମ୍ପରେ ଭାରତର ସହାୟତା ପ୍ରୟାସ ସମ୍ପର୍କରେ ଭାରତୀୟ ରାଷ୍ଟ୍ରଦୂତ ସୂଚନା ଦେଇଛି, ହାଟେ ପ୍ରଦେଶରେ ଭାରତୀୟ ସେନା ଦ୍ୱାରା ଏକ ଫିଲ୍ଡ ହସ୍ପିଟାଲ ସ୍ଥାପନ କରାଯାଇଛି। ଏହି ୩୦ ଶଯ୍ୟା ବିଶିଷ୍ଟ ଡାକ୍ତରଖାନା ନିର୍ମାଣ ପାଇଁ ଡାକ୍ତରୀ କର୍ମଚାରୀଙ୍କୁ ଦୁଇଟି ସି-୧୭ ବିମାନରେ ଭାରତ ତୁର୍କୀ ପଠାଇଥିଲା। ସେ ଆହୁରି ମଧ୍ୟ କହିଛନ୍ତି, ତୁର୍କୀରେ ପରିସ୍ଥିତି ଅତ୍ୟନ୍ତ ଅସ୍ଥିର ଅଟେ। ପ୍ରତିଦିନ ନୂଆ ଆବଶ୍ୟକତା ଆମକୁ ଦେଖାଯାଉଛି। ଭାରତ ସ୍ଥାନୀୟ ଆବଶ୍ୟକତା ପ୍ରତି ବେଶ୍ ସମ୍ବେଦନଶୀଳ ରହିଛି।