ନୂଆଦିଲ୍ଲୀ,୨।୧୨: ଭାରତୀୟ ଦଳ ପାଞ୍ଚ ମ୍ୟାଚ ବିଶିଷ୍ଟ ସିରିଜର ଚତୁର୍ଥ ଟି -୨୦ରେ ଅଷ୍ଟ୍ରେଲିଆକୁ ପରାସ୍ତ କରି ଏହି ସିରିଜ ଜିତିଛି ଏବଂ ଟି -୨୦ ଇଣ୍ଟରନ୍ୟାଶନାଲରେ ସର୍ବାଧିକ ମ୍ୟାଚ ଜିତିବାର ରେକର୍ଡ ମଧ୍ୟ କରିଛି। ସର୍ବାଧିକ ଟି -୨୦ ଅନ୍ତର୍ଜାତୀୟ ମ୍ୟାଚ ଜିତିବା ଦୃଷ୍ଟିରୁ ଭାରତୀୟ ଦଳ ପାକିସ୍ତାନକୁ ପଛରେ ପକାଇ ଦେଇଛି। ଭାରତୀୟ ଦଳ ସୂର୍ଯ୍ୟକୁମାର ଯାଦବଙ୍କ ଅଧିନାୟକତ୍ୱରେ ଏହି ସ୍ବତନ୍ତ୍ର ରେକର୍ଡ ହାସଲ କରିଛି।
ବର୍ତ୍ତମାନ ଟିମ ଇଣ୍ଡିଆ ସର୍ବାଧିକ ଟି -୨୦ ଅନ୍ତର୍ଜାତୀୟ ମ୍ୟାଚ ଜିତିବାର ରେକର୍ଡ ସୃଷ୍ଟି କରିଛି। ଭାରତ ଏ ପର୍ଯ୍ୟନ୍ତ ମୋଟ ୨୧୩ ଟି -୨୦ ଅନ୍ତର୍ଜାତୀୟ ମ୍ୟାଚ ଖେଳିଛି, ଯେଉଁଥିରେ ସେମାନେ ୧୩୬ ଟି ଜିତି ୬୭ଟି ହାରିଛନ୍ତି। ସେହିପରି ପାକିସ୍ତାନ ୨୨୬ ମ୍ୟାଚ ମଧ୍ୟରୁ ୧୩୫ଟି ଜିତିଛି ଏବଂ ୮୨ ଟି ହାରିଛି। ଅଷ୍ଟ୍ରେଲିଆ ବିପକ୍ଷ ଭାରତ ସିରିଜ ପୂର୍ବରୁ ପାକିସ୍ତାନ କ୍ରିକେଟ ଦଳ ଏହି ରେକର୍ଡରେ ଥିଲା। କିନ୍ତୁ ସିରିଜର ଚାରୋଟି ମ୍ୟାଚ ମଧ୍ୟରୁ ତିନିଟିରେ ଅଷ୍ଟ୍ରେଲିଆକୁ ପରାସ୍ତ କରି ଭାରତ ରେକର୍ଡରେ ନିଜର ନାମ ଲେଖିଛି।