ମେଲବୋର୍ନ, ୨୫।୧୨(ପି.ଟି.)-
ଅଷ୍ଟ୍ରେଲିଆ ବିପକ୍ଷ ପ୍ରଥମ ଟେଷ୍ଟର ବିପର୍ଯ୍ୟୟ ପରେ ଦ୍ୱିତୀୟ ଟେଷ୍ଟ ପାଇଁ ଟିମ୍ ଇଣ୍ଡିଆର ପ୍ରସ୍ତୁତି ଜୋରଦାର ହୋଇଛି। ଗୁରୁବାର ଖେଳାଳିମାନେ କୁସ୍ତି ଲଢ଼େଇରେ ଯେପରି ଟ୍ରେନିଂ ଡ୍ରିଲ୍ କରାଯାଏ ସେପରି କରିଥିବା ପରିଲକ୍ଷିତ ହୋଇଛି। ଦୁଇ ଖେଳାଳି ପରସ୍ପରକୁ ହରାଇବା ପାଇଁ ପ୍ରୟାସ କରିଥିଲେ। ପୂର୍ବରୁ କ୍ରିକେଟରେ ଏପରି ଟ୍ରେନିଂ ପ୍ରାୟତଃ ଦେଖାଯାଇ ନ ଥିଲା। ଅଲ୍ରାଉଣ୍ଡର ରବୀନ୍ଦ୍ର ଜାଡେଜା ନେଟ୍ସକୁ ପ୍ରଥମେ ଆସି ଫିଟ୍ନେସ ଟେଷ୍ଟ କରିଥିଲେ। ହାତରେ ଏକ ବ୍ୟାଟ୍ ଧରି ସେ ଉଇକେଟ ମଝିରେ ଦୌଡ଼ିଥିଲେ। ଶନିବାରଠାରୁ ମେଲବୋର୍ନ କ୍ରିକେଟ ଗ୍ରାଉଣ୍ଡରେ ଆରମ୍ଭ ହେବ ବକ୍ସିଂ ଡେ’ ଟେଷ୍ଟ।
୪୯ଟି ଟେଷ୍ଟ ଖେଳି ୨୧୩ ଉଇକେଟ ନେବାସହ ୧୮୬୯ ରନ କରିଥିବା ଜାଡେଜା ଟି୨୦ ସିରିଜର ଅନ୍ତିମ ୨ ମ୍ୟାଚ ଏବଂ ପ୍ରଥମ ଟେଷ୍ଟରେ ଖେଳିପାରି ନ ଥିଲେ। ପ୍ରଥମ ଟି୨୦ ଅବସରରେ ସେ କନକସନ ଓ ହାମ୍ଷ୍ଟ୍ରିଙ୍ଗ୍ ଇଞ୍ଜୁରିରେ ପୀଡ଼ିତ ହୋଇଥିଲେ। ଯୁବ ଦ୍ରୁତ ବୋଲର ଟି. ନଟରାଜନ ନେଟ୍ସରେ ଚମତ୍କାର ବୋଲିଂ କରି କାମଚଳା ଅଧିନାୟକ ଅଜିଙ୍କ୍ୟ ରାହାନେ ଓ ଚେତେଶ୍ୱର ପୂଜାରାଙ୍କୁ ଅସୁବିଧାରେ ପକାଇଥିଲେ। ଦ୍ୱିତୀୟ ଟେଷ୍ଟ ଖେଳିବା ସମ୍ଭାବନା ଥିବା ଲୋକେଶ ରାହୁଲ ଏବଂ ରିଷଭ ପନ୍ତ ନେଟ୍ସରେ ଅନେକ ସମୟ ବିତାଇଥିଲେ। ଓ୍ବାର୍ମଅପ୍ ପରେ ଖେଳାଳିମାନେ ନେଟ୍ସରେ ବ୍ୟସ୍ତ ଥିବାବେଳେ ମୁଖ୍ୟ କୋଚ୍ ରବି ଶାସ୍ତ୍ରୀ, ବୋଲିଂ କୋଚ୍ ଭରତ ଅରୁଣ, ବ୍ୟାଟିଂ କୋଚ୍ ବିକ୍ରମ ରାଠୋର ଦୀର୍ଘ ସମୟଧରି ଆଲୋଚନାରତ ଥିଲେ। ପ୍ରଥମ ସନ୍ତାନର ବାପା ହେବାକୁ ଯାଉଥିବା ଅଧିନାୟକ ବିରାଟ କୋହଲି ଭାରତ ଫେରିଛନ୍ତି। ତାଙ୍କ ଅନୁପସ୍ଥିତିରେ ନେତୃତ୍ୱ ନେବାକୁ ଯାଉଥିବା ଅଜିଙ୍କ୍ୟ ରାହାନେଙ୍କ ସହ ମଧ୍ୟ କୋଚ୍ମାନେ ବାର୍ତ୍ତାଳାପ କରିଥିଲେ। ଖରାପ ଫର୍ମରେ ଥିବା ପୃଥ୍ବୀ ଶ’ ଚାଇନାମ୍ୟାନ ବୋଲର କୁଲଦୀପ ଯାଦବଙ୍କ ବୋଲିଂକୁ ଅଭ୍ୟାସ କରିଥିଲେ।
ଅନ୍ୟପକ୍ଷରେ କୋଚ୍ ଜଷ୍ଟିନ ଲାଙ୍ଗରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଷ୍ଟିଭ୍ ସ୍ମିଥ, ମାର୍ନସ ଲାବୁସ୍କାନ ବ୍ୟାଟିଂ ଅଭ୍ୟାସ କରିଥିଲେ। ପୂର୍ବତନ ଶ୍ରୀଲଙ୍କା ଅଫ୍ସ୍ପିନର ସୁରଜ ରଣଦିବ ଏ ଦୁହିଁଙ୍କୁ ବୋଲିଂ କରିଥିଲେ। ଅଷ୍ଟ୍ରେଲିଆ ଏହାର ପ୍ଲେଇଂ ଇଲେଭେନ ଦ୍ୱିତୀୟ ଟେଷ୍ଟପାଇଁ ଅପରିବର୍ତ୍ତିତ ରଖିବ ବୋଲି ଲାଙ୍ଗର ସୂଚନା ଦେଇଛନ୍ତି। ପ୍ରକାଶ ଯୋଗ୍ୟ ପ୍ରଥମ ଟେଷ୍ଟ ହାରି ଭାରତ ୦-୧ରେ ସିରିଜ ପଛୁଆ ରହିଛି। ଆଡିଲେଡ୍ ଟେଷ୍ଟର ଦ୍ୱିତୀୟ ଇନିଂସରେ ଭାରତ ଲଜ୍ଜାଜନକଭାବେ ସର୍ବନିମ୍ନ ୩୬ ରନ ସ୍କୋର କରି ଚାପରେ ରହିଛି।