ବମ୍ବେ: ଇଣ୍ଡିଆନ ଆଇଡଲ-୧୨ରେ ଚର୍ଚ୍ଚିତ ଯୋଡ଼ି ପାଲଟିଥିଲେ ଅରୁଣୀତା କାଞ୍ଜିଲାଲ ଏବଂ ପଓ୍ବନଦୀପ ରାଜନ। ପ୍ରଥମେ ଏମାନେ ପ୍ରେମରେ ପଡ଼ିଥିବା କୁହାଯାଉଥିବା ବେଳେ ଉଭୟ ଭଲ ବନ୍ଧୁ ବୋଲି ସ୍ପଷ୍ଟ କରିଥିଲେ। ଏହାକୁ ନେଇ ପ୍ରଶଂସକମାନେ ଶୋ’ ନିର୍ମାତାଙ୍କ ଉପରେ ଖପ୍ପା ହୋଇଥିଲେ। ଏବେ କିନ୍ତୁ କଥାଟି ସତ ହେବା ଭଳି ଲାଗୁଛି। ଉଭୟ ଗାୟକ ପରସ୍ପରର ନିକଟତର ହେଉଛନ୍ତି। ପଓ୍ବନଦୀପ ମୁମ୍ବାଇରେ ଏକ ଆପାର୍ଟମେଣ୍ଟ କିଣିଛନ୍ତି। ଉକ୍ତ କୋଠାରେ ଅରୁଣୀତା ମଧ୍ୟ ଘର କିଣିଥିବା ଜଣାପଡ଼ିଛି। ନିଜର ଆଗାମୀ ଗୀତର ଟିଜର ଲଞ୍ଚ କରିବା ସମୟରେ ପଓ୍ବନଦୀପ ଏହା ସ୍ପଷ୍ଟ କରିଛନ୍ତି।
ପୂର୍ବରୁ ପଓ୍ବନଦୀପ ଅରୁଣୀତାଙ୍କ କେବଳ ଜଣେ ଭଲ ବନ୍ଧୁ ବୋଲି କହିଥିଲେ। ଉଭୟଙ୍କ ଭିତରେ ସେଭଳି କିଛି ନାହିଁ ବୋଲି ମଧ୍ୟ କହିଥିଲେ। ହେଲେ ସେମାନେ ପାଖାପାଖି ଘର କିଣିବା ପରେ ପୁଣି ଥରେ ଚର୍ଚ୍ଚା ବଢ଼ିବାରେ ଲାଗିଛି। ତେବେ ଇଣ୍ଡିଆନ୍ ଆଇଡଲର ବିଜେତା ପାଲଟିଛନ୍ତି ପଓ୍ବନଦୀପ। ଅରୁଣୀତା ଦ୍ୱିତୀୟ ସ୍ଥାନରେ ଅଛନ୍ତି।
