ସାଣ୍ଟିଗୋ(ଚିଲି),୨୪।୧: ଭାରତୀୟ ମହିଳା ଜୁନିୟର ହକି ଦଳ ଅପରାଜେୟ ଧାରା ବଜାୟ ରଖି ସିନିୟର ଚିଲି ଦଳକୁ ହରାଇ ଦେଇଛି। ପ୍ରିନ୍ସ ଅଫ୍ ଓ୍ବେଲ୍ସ କାଉଣ୍ଟି କ୍ଲବଠାରେ ଖେଳାଯାଇଥିବା ମ୍ୟାଚ୍କୁ ୨-୦ ଗୋଲରେ ଜିତି ନେଇଛି ଭାରତ। ଗସ୍ତର ପଞ୍ଚମ ମ୍ୟାଚ୍ ଖେଳୁଥିବା ଭାରତୀୟ ଦଳ ପାଇଁ ଅନ୍ତିମ କ୍ୱାର୍ଟରରେ ସଙ୍ଗିତା କୁମାରୀ ଓ ସୁଷମା କୁମାରୀ ଗୋଲ ସ୍କୋର କରିଥିଲେ।
ପ୍ରଥମ ୩ କ୍ୱାର୍ଟରରେ ଉଭୟ ଦଳ ମଧ୍ୟରେ ଖୁବ୍ ସଂଘର୍ଷ ହୋଇଥିଲା। ହେଲେ କୌଣସି ଦଳ ସ୍କୋର କରିବାକୁ ସକ୍ଷମ ହୋଇ ନ ଥିଲେ। ଚିଲିକୁ ବହୁ ସୁଯୋଗ ମିଳିଥିଲା, ହେଲେ ଭାରତୀୟ ଦଳର ଶକ୍ତିଶାଳୀ ଡିଫେନ୍ସକୁ ଭେଦ କରିବା ସଜ ନ ଥିଲା। ଏହାପରେ ଅନ୍ତିମ ତଥା ଚତୁର୍ଥ କ୍ୱାର୍ଟରରେ ୪୮ତମ ମିନିଟ୍ରେ ଗୋଲ ଦେଇ ଭାରତକୁ ଅଗ୍ରଣୀ ଆଣି ଦେଇଥିଲେ ସଙ୍ଗିତା କୁମାରୀ। ଟିମ୍ ଇଣ୍ଡିଆର ଅଗ୍ରଣୀ ବ୍ୟବଧାନକୁ ଦ୍ୱିଗୁଣିତ କରିଥିଲେ ସୁଷମା କୁମାରୀ (୫୬ତମ ମିନିଟ୍ )।