ବିଳାସପୂର୍ଣ୍ଣ ଟ୍ରେନ୍ର ନାଁ ଆସିଲେ ପ୍ରଥମେ ମନରେ ଦୁରନ୍ତୋ, ଶତାବ୍ଦି ଓ ରାଜଧାନୀ ଟ୍ରେନ୍ର ନାଁ ମନକୁ ଆସିଥାଏ। କିନ୍ତୁ ଏଭଳି ଏକ ଭାରତୀୟ ଟ୍ରେନ୍ର ନା ଶୁଣିଛନ୍ତି, ଯେଉଁଠାରେ ୫ଷ୍ଟାର ହୋଟେଲ ଭଳି ସମସ୍ତ ସୁବିଧା ମିଳିଥାଏ। ହେଲେ ଏହାର ଟିକେଟର ଦାମ୍ ରହିଛି ଆକାଶଛୁଅଁା। ଯେଉଁ ଟଙ୍କାରେ ଯେକେହି ବିମାନରେ ବିଦେଶ ବୁଲି ଆସିପାରିବେ। ଆଜ୍ଞା ହଁ ଆମେ କହିବାକୁ ଯାଉଛୁ ରାଜକୀୟ ସୁବିଧା ପାଇଁ ପ୍ରସିଦ୍ଧ ଥିବା ଭାରତର ଗୋଲଡେନ ଚାରିଅଟ୍ ଟ୍ରେନ୍ ବିଷୟରେ। ଯାହାକୁ ସ୍ବର୍ଣ୍ଣ ରଥ ବୋଲି ମଧ୍ୟ କୁହାଯାଇଥାଏ।
ପୂର୍ବରୁ ଏହି ବିଳାସପୂର୍ଣ୍ଣ ଟ୍ରେନ୍ର ନାମ ଷ୍ଟୋନ ଚାରିଅଟ୍ ଅଫ୍ ହାମ୍ପି ରହିଥିଲା। ପରେ ଏହାକୁ ଗୋଲଡେନ ଚାରିଅଟ୍ ନାମରେ ନାମିତ କରାଯାଇଥିଲା। ଏହାର ଟିକେଟର ଦାମ୍ ହେଉଛି ୩ଲକ୍ଷ ୨୦ ହଜାର ଟଙ୍କା। ସମୟ ଅନୁସାରେ ଟିକେଟର ଦାମ୍ ମଧ୍ୟ ପରିବର୍ତ୍ତନ ହୋଇଥାଏ। ତେବେ ଏହି ଭବ୍ୟ ଟ୍ରେନ୍କୁ ଦେଖିଲେ ଯାକାହାରି ବି ଆଖି ଲାଖିଯିବ। ୨୦୦୮ରେ କର୍ନାଟକ ରାଜ୍ୟ ପର୍ଯ୍ୟଟନ ବିକାଶ ନଗମ(କେଏସ୍ଟିଡିଏସ୍) ପକ୍ଷରୁ ଗୋଲଡେନ ଚାରିଅଟ୍ ଟ୍ରେନ୍ର ଆରମ୍ଭ ହୋଇଥିଲା। ଏହି ଟ୍ରେନ୍ରେ ୨୧ଟି ବଗି ଥିବା ବେଳେ ଏଥିରେ ୨୯ଟି କୋଚ୍ ଓ ୨ଟି ରେଷ୍ଟୁରାଣ୍ଟ କୋଚ୍ ରହିଛି। ଏଥିସହ ଏଠାରେ ୧୧ଟି ସେଲୁନ ରହିଛି। ଯେଉଁଥିରେ ୪୪ ଏସି କ୍ୟାବିନ, ୨୬ଟୁଇନ ବେଡ୍ କ୍ୟାବିନ, ୧୭ ଡବଲ ବେଡ କ୍ୟାବିନ ଓ ଗୋଟିଏ ଫିଜିକାଲି ଚ୍ୟାଲେଞ୍ଜଡ୍ କ୍ୟାବିନ ରହିଛି।
ଟ୍ରାକ୍ ଉପରେ ଚାଲୁଥିବା ରାଜମହଲ ସଦୃଶ ଏହି ଟ୍ରେନ୍ରେ ଯାତ୍ରୀଙ୍କ ପାଇଁ ୨ଟି ରେଷ୍ଟୁରାଣ୍ଟ, ଗୋଟିଏ ବାର, କନ୍ଫରେନ୍ସ ରୁମ୍ ଓ ୨ଟି ପାରମ୍ପରିକ ମସାଜ ରୁମ୍ର ସୁବିଧା ରହିଛି। ଉକ୍ତ ଟ୍ରେନ୍ରେ ଥିବା ୨ଟି ରେଷ୍ଟୁରାଣ୍ଟର ନାମ ହେଉଛି ନଲ ଓ ରୁଚି। ଏଥିରେ ନିରାମିଷ ଓ ଆମିଷ ଭୋଭନ ମିଳିଥାଏ। ଏହି ଟ୍ରେନ୍ରେ ୭ରାତି ଓ ୮ଦିନର ଯାତ୍ରା ପ୍ୟାକେଜ ରହିଛି। ଏହି ଯାତ୍ରାରେ ଯାତ୍ରୀଙ୍କୁ ବେଙ୍ଗାଲୁରୁ, ମହୀଶୂର, ହମ୍ପି, ବେଲୁର, କାବିନି, ବଦାମି, ଗୋଆର ଭବ୍ୟ ଦୃଶ୍ୟ ଦେଖିବାକୁ ମିଳିଥାଏ। ୨୦୧୩ରେ ଏହି ଟ୍ରେନ୍କୁ ଏସିଆର ଅଗ୍ରଣୀ ବିଳାସମୟ ଟ୍ରେନ୍ର ପୁରସ୍କାର ମିଳିଥିଲା।