ନୂଆଦିଲ୍ଲୀ,୨୨।୧୦: ପାକିସ୍ତାନ ବିପକ୍ଷରେ ଅକ୍ଟୋବର ୨୪ରେ ଟି-୨୦ ବିଶ୍ୱକପ୍ର ପ୍ରଥମ ମ୍ୟାଚ୍ ଖେଳିବ ଭାରତ। ଏହି ମୁକାବିଲାକୁ ନେଇ ଏବେଠାରୁ ଜୋରଦାର ଚର୍ଚ୍ଚା ହେବାରେ ଲାଗିଛି। ଗୋଟିଏ ପଟେ ଦୁଇଟିଯାକ ଅଭ୍ୟାସ ମ୍ୟାଚ୍ରେ ବିଜେତା ହୋଇ ଭାରତର ମନୋବଳ ଦୃଢ଼ ରହିଥିବା ବେଳେ ପାକିସ୍ତାନ ଗୋଟିଏରେ ବିଜେତା ହୋଇଥିବା ବେଳେ ଗୋଟିଏରେ ପରାସ୍ତ ହୋଇଛି। ଏବେ ପାକିସ୍ତାନ ଦଳର ପ୍ରଦର୍ଶନକୁ ନେଇ ମୁହଁ ଖୋଲିଛନ୍ତି ବିବାଦୀୟ ମନ୍ତବ୍ୟ ଦେଇ ଆସୁଥିବା ପୂର୍ବ ଦ୍ରୁତ ବୋଲର ଶୋଏବ ଅଖତର।
ଶୋଏବ କହିଛନ୍ତି, ପାକିସ୍ତାନ ଟିମ୍କୁ ଲୟ ହାସଲ କରିବାକୁ ଟିକିଏ ସମୟ ଲାଗେ। ଟୁର୍ନାମେଣ୍ଟ ଜିତିବା ପୂର୍ବରୁ ଦଳ ଖରାପ ପ୍ରଦର୍ଶନ କରେ। ହେଲେ ପରବର୍ତ୍ତୀ ସମୟରେ ବିରୋଧୀ ଟିମ୍କୁ ଦଳ ଅଡ଼ୁଆରେ ପକାଇଥାଏ। ବିଶ୍ୱକପ୍ରେ ମଧ୍ୟ ଦଳ ଆକ୍ରାମକ କ୍ରିକେଟ ଖେଳିବ। ଖେଳାଳିମାନଙ୍କୁ ଭାରତ ବିପକ୍ଷ ମୁକାବିଲାକୁ ନେଇ ଚିନ୍ତା ନ କରିବାକୁ ପରାମର୍ଶ ଦେବି। ମ୍ୟାଚ୍ ହାରନ୍ତୁ ଅବା ଜିତନ୍ତୁ, ତାହା ସାଧାରଣ ରହିବ। ଅନ୍ୟ ମ୍ୟାଚ୍ ଭଳି ଏହାକୁ ନେବାକୁ ସେ କହିଛନ୍ତି।
ଏହାଛଡ଼ା ଭାରତୀୟ ଟିମ୍କୁ ନେଇ ଶୋଏବ କହିଛନ୍ତି, ଟିମ୍ ଇଣ୍ଡିଆ ଖରାପ ସ୍ଥିତିରେ ଅଛି। ତାଙ୍କ ଉପରେ ଚାପ ଅଧିକ। ଗଣମାଧ୍ୟମରେ ମ୍ୟାଚ୍କୁ ନେଇ ବହୁତ ଚର୍ଚ୍ଚା ହେଉଛି। ଏଥିପାଇଁ ଖେଳାଳିଙ୍କ ଉପରେ ଚାପ ଅଧିକ। ସେମାନେ ନିଜର ମନୋବଳ ସଠିକ ରଖିବାକୁ ଚେଷ୍ଟା କରୁଛନ୍ତି। ଦେଖିବାକୁ ଗଲେ ମ୍ୟାଚ୍ରେ ହାରିବା ଲାଗି ପାକିସ୍ତାନ ପାଖରେ କିଛି ନାହିଁ। ଦଳକୁ ଗୋଟିଏ-ଦୁଇଟି ମ୍ୟାଚ୍ ଜିତିବାକୁ ପଡ଼ିବ। ଏହାପରେ ସେ ସେମିଫାଇନାଲ ପାଇଁ କ୍ୱାଲିଫାଏ କରିବ ବୋଲି ସେ କହିଛନ୍ତି।
