କାଠମାଣ୍ଡୁ,୨୪ା୪: ନେପାଳର ଅନ୍ନପୂର୍ଣ୍ଣା ପର୍ବତର ଏକ ଗଭୀର ଖାତ ମଧ୍ୟକୁ ଖସିଯିବା ପରେ ଉଦ୍ଧାର ହୋଇଥିବା ଭାରତୀୟ ପର୍ବତାରୋହୀ ଅନୁରାଗ ମାଲୁଙ୍କ ଅବସ୍ଥା ଗୁରୁତର ରହିଛି। ଏନେଇ ତାଙ୍କ ଭାଇ ଆଶିଷ ଏହି ସୂଚନା ଦେଇଛନ୍ତି। ତାଙ୍କ ଭାଇ କହିଛନ୍ତି, କାଠମାଣ୍ଡୁରେ ଡାକ୍ତରଙ୍କ ତତ୍ତ୍ୱାବଧାନରେ ତାଙ୍କ ଜୀବନ ବଞ୍ଚିଗଲା ଏବଂ ତାଙ୍କ ଅବସ୍ଥାରେ ସୁଧାର ଯଦିଓ ଆସୁଛି ତଥାପି ବିପଦକୁ ଏଡ଼ାଇ ହେବନି ବୋଲି ସେ କହିଛନ୍ତି।
ରାଜସ୍ଥାନର କିଶନଗଡ଼ର ବାସିନ୍ଦା ୩୪ ବର୍ଷୀୟ ଅନୁରାଗ ଏପ୍ରିଲ ୧୭ରେ ତୃତୀୟ ଶିବିରରୁ ଓହ୍ଲାଇଥିବା ବେଳେ ପ୍ରାୟ ୬୦୦୦ମିଟର ଉଚ୍ଚତାରୁ ଏକ ଘାଟିକୁ ଖସିପଡ଼ିଥିଲେ। ତିନି ଦିନ ପରେ ତାଙ୍କୁ ଉଦ୍ଧାର କରାଯାଇଥିଲା। ସେବେଠାରୁ ଅନୁରାଗ କାଠମାଣ୍ଡୁର ଏକ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଅବସ୍ଥା ପୂର୍ବ ଅପେକ୍ଷା ଯଦିଓ ଟିକେ ଭଲ ରହିଛି ତଥାପି ବିପଦ ମୁକ୍ତ ନୁହନ୍ତି ବୋଲି ତାଙ୍କ ଭାଇ କହିଛନ୍ତି।
ଏହି ଅଭିଯାନ ସମୟରେ ଅନୁରାଗଙ୍କ ସହ ଆସିଥିବା ବରିଷ୍ଠ ପର୍ବତାରୋହୀ ଚିପାଲ ଶେର୍ପା କହିଛନ୍ତି, ଅନୁରାଗ ଭୁଲ ଦଉଡ଼ି ଧରିଦେବାରୁ ଗଭୀର ଖାଲ ମଧ୍ୟକୁ ଖସିପଡ଼ିଥିଲେ। ସେ କହିଛନ୍ତି, ପର୍ବତ ଉପରକୁ ଚଢ଼ିବା କିମ୍ବା ଓହ୍ଲାଇବା ପାଇଁ ବ୍ୟବହୃତ ଦଉଡ଼ି ଧରିବା ପରିବର୍ତ୍ତେ ସେ ଲଗେଜ ନେବା ପାଇଁ ବ୍ୟବହୃତ ଦଉଡ଼ିଟିକୁ ଧରିଥିଲେ, ଯାହା ବହୁତ ଛୋଟ ଅଟେ। ତେଣୁ ସେ ଖସିପଡ଼ିଥିଲେ।