ନୂଆଦିଲ୍ଲୀ,୨୦।୧: ଭାରତୀୟ ନୌସେନାର ଶକ୍ତି କ୍ରମାଗତ ଭାବେ ବୃଦ୍ଧି ପାଉଛି। ଆସନ୍ତା ଜାନୁୟାରୀ ୨୩ରେ ନୌସେନାରେ ସାମିଲ ହେବ ଆଧୁନିକ ଡିଜେଲ-ଇଲେକ୍ଟ୍ରିକ ଆକ୍ରମଣ ବୁଡ଼ାଜାହାଜ ‘ଆଇଏନ୍ଏସ୍ ଭାଗିର୍’। ପ୍ରୋଜେକ୍ଟ ପି-୭୫ ଅଧୀନରେ ଏହାକୁ ନିର୍ମାଣ କରାଯାଇଛି। ଏହା ସାମିଲ ହେବା ପରେ ନୌସେନାର ଶକ୍ତି ବୃଦ୍ଧି ପାଇବ। କାରଣ ଏହା ବିପଜ୍ଜନକ କ୍ଷେପଣାସ୍ତ୍ର ଏବଂ ଟର୍ପେଡୋ ସହ ସଜ୍ଜିତ ହେବ।
‘ଆଇଏନ୍ଏସ୍ ଭାଗିର୍’ ହେଉଛି ସମ୍ପୂର୍ଣ୍ଣ ସ୍ବଦେଶୀ ବୁଡାଜାହାଜ। ଏହାର ଲମ୍ବ ୨୨୧ ଫୁଟ, ବିମ୍ ୨୦ ଫୁଟ, ଉଚ୍ଚତା ୪୦ ଫୁଟ୍ ଏବଂ ଡ୍ରାଫ୍ଟ ୧୯ ଫୁଟ୍ ଅଟେ। ଏହାକୁ ମାଜାଗନ ଡକ୍ ଲିମିଟେଡ୍ ନିର୍ମାଣ କରିଛି। ଏହା ସମୁଦ୍ର ମଧ୍ୟରେ ଲ୍ୟାଣ୍ଡମାଇନ ବିଛାଇବାରେ ସକ୍ଷମ। ଏହାକୁ ୩୫୦ମିଟର ଗଭୀରରେ ନିୟୋଜିତ କରାଯାଇପାରିବ। ସ୍ବତନ୍ତ୍ର କୌଶଳରେ ନିର୍ମିତ ହୋଇଥିବାରୁଏହାକୁ ଶତ୍ରୁ ଚିହ୍ନଟ କରିବାରେ ସକ୍ଷମ ହେବେ ନାହିଁ। ଏଥିରେ ମଧ୍ୟ ଆଣ୍ଟି-ସିପ୍ ମିସାଇଲ ସ୍ଥାପନ କରାଯାଇଛି। ବିଶେଷକରି ଶତ୍ରୁର ରାଡାରରେ ନ ଆସିବା ଏହାର ସବୁଠାରୁ ବଡ଼ ବୈଶିଷ୍ଟ୍ୟ।
୨୦୨୦ ନଭେମ୍ବର ୧୨ରେ ଏହାର ନିର୍ମାଣ ଆରମ୍ଭ ହୋଇଥିଲା। ଏହି ବୁଡ଼ାଜାହାଜରେ ଅମ୍ଳଜାନ ତିଆରି କରିବାର କ୍ଷମତା ରହିଛି। ଏଥିଲାଗିଏହା ଦୀର୍ଘ ସମୟ(୫୦ ଦିନ) ପର୍ଯ୍ୟନ୍ତ ପାଣିରେ ରହିପାରେ। ସମୁଦ୍ର ତରଙ୍ଗରେ ଘଣ୍ଟାପ୍ରତି ଏହା ୨୦ କିମି ବେଗରେ ଚାଲିଥାଏ। କିନ୍ତୁ ସମୁଦ୍ର ମଧ୍ୟରେ ବୁଡ଼ିଯିବା ପରେ ଏହାର ବେଗ ଘଣ୍ଟାପ୍ରତି ୩୭ କିମି ହୋଇଥାଏ। ଥରକରେ ଏହା ୧୨ ହଜାର କିମି ଯାତ୍ରା କରିପାରେ। ଏଥିରେ ୮ ନୌସେନା ଅଧିକାରୀ ଏବଂ ୩୫ ସୈନିକ ରହିପାରିବେ।