ଥିରୁଭାନନ୍ତପୁରମ୍/ଓ୍ବାଶିଂଟନ,୩।୧ : ମୂଳ ଭାରତୀୟ ଜୁଲି ଏ. ମାଥ୍ୟୁ କ୍ରମାଗତ ଦ୍ୱିତୀୟ ଥର ପାଇଁ ଆମେରିକାର ଫୋର୍ଟ ବେଣ୍ଡ କାଉଣ୍ଟି କୋର୍ଟରେ ବିଚାରପତି ଭାବରେ ଚୟନ ହୋଇଛନ୍ତି। ସେ ମୂଳତଃ କେରଳର ଥିରୁଭାଲା ସହରର ବାସିନ୍ଦା। କେରଳର ଏକ ଗ୍ରାମ ବିଦ୍ୟାଳୟ ଛାଡି ପିତାମାତାଙ୍କ ସହ ଆମେରିକା ଯାଇଥିବା ଜୁଲି ଏ ମାଥ୍ୟୁ କହିଛନ୍ତି ଯେ ସେ କେବେ ଆଇନଜୀବୀ କିମ୍ବା ବିଚାରପତି ହେବାକୁ ଚାହିିଁ ନ ଥିଲେ।
ଜୁଲିଙ୍କ ପିତା ବ୍ୟବସାୟ କରୁଥିଲେ ଯେଉଁଥିରେ ତାଙ୍କୁ ଅନେକ ଥର ଆଇନଗତ ଅସୁବିଧାର ସମ୍ମୁଖୀନ ହେବାକୁ ପଡୁଥିଲା। ଯାହା ପରେ ଜୁଲି ଆଇନ ଅଧ୍ୟୟନ କରିବାକୁ ଚିନ୍ତା କରିଥିଲେ। ସେ ଆମେରିକାରେ ୧୫ ବର୍ଷ ଆଇନଜୀବୀ ଭାବରେ କାର୍ଯ୍ୟ କରିଥିଲେ ଏବଂ ଚାରି ବର୍ଷ ପୂର୍ବେ ସେଠାରେ ଜଜ ବେଞ୍ଚରେ ଚୟନ ହୋଇ ପ୍ରଥମ ଭାରତୀୟ-ଆମେରିକୀୟ ମହିଳା ଭାବେ ଇତିହାସ ସୃଷ୍ଟି କରିଥିଲେ।
ବର୍ତ୍ତମାନ ସେ ଅନୁଭବ କରୁଛନ୍ତି ଯେ ଏହା ହେଉଛି ସର୍ବୋତ୍ତମ କାର୍ଯ୍ୟ ଏବଂ ସେ ଏହି ବୃତ୍ତିକୁ ଅଧିକ ଭଲ ପାଆନ୍ତି। ଭିଡିଓ କନଫରେନ୍ସିଂ ମାଧ୍ୟମରେ ସୋମବାର ଟେକ୍ସାସର କାଉଣ୍ଟି କୋର୍ଟର ବିଚାରପତି ଭାବରେ ମାଥ୍ୟୁ ଶପଥ ଗ୍ରହଣ କରିଛନ୍ତି।
ଜୁଲି ବର୍ତ୍ତମାନ ତାଙ୍କ ସ୍ବାମୀଙ୍କ ଗାଁ ଭୀମନାଡି (ଶାଶୁଘର) ଘରେ କେରଳର କାସରଗୋଡ ଜିଲାରେ ଅଛନ୍ତି। ସେ ପିଟିଆଇକୁ କହିଛନ୍ତି ଯେ ଏଥର ମୋର ଇଚ୍ଛା ମୋ ଶାଶୁଘରୁ ଶପଥ ନେବା। ନଚେତ ମୋ ଶ୍ୱଶୁର ଘର ଲୋକମାନେ ଏହି କାର୍ଯ୍ୟରେ ଭାଗ ନେବାକୁ ସମର୍ଥ ହେବେ ନାହିଁ। ମୁଁ ବହୁତ ଖୁସି ଯେ ମୋ ଶ୍ୱଶୁର ଘର ଲୋକ ଏବଂ ଅନ୍ୟ ପରିବାର ସଦସ୍ୟ ଏହି ଶପଥ ଗ୍ରହଣର ସାକ୍ଷୀ ହୋଇପାରିଛନ୍ତି।
ଜୁଲି ମାଥ୍ୟୁ କହିଛନ୍ତି ଯେ ଯେତେବେଳେ ସେ ଚାରି ବର୍ଷ ପୂର୍ବେ ପ୍ରଥମେ ବିଚାରପତି ହୋଇଥିଲେ, ସେତେବେଳେ ତାଙ୍କ ମାତାପିତା ତାଙ୍କୁ ଦେଖିବା ଏବଂ ଆଶୀର୍ବାଦ ଦେବା ପାଇଁ ସେଠାରେ ଉପସ୍ଥିତ ଥିଲେ। ତାହା ମୋ ପାଇଁ ବହୁତ ଭଲ ସ୍ମୃତି। ଏଥର ତାଙ୍କ ମାତାପିତା ଏବଂ ବଡ ଝିଅ ଆମେରିକାରେ ଥିବାରୁ ଏହି ଉତ୍ସବରେ ଯୋଗ ଦେଇପାରି ନ ଥିଲେ।