ନୂଆଦିଲ୍ଲୀ,୧୨।୫: ଉପରକୁ ସହଜ ନଜର ଆସୁଥିଲେ ହେଁ ଖେଳାଳିଙ୍କ ଜୀବନ ସେତେଟା ସହଜ ନୁହେଁ। ଶୀର୍ଷସ୍ତରୀୟ ଖେଳାଳି ହେବାକୁ ହେଲେ କଠିନ ପରିଶ୍ରମଠାରୁ ଆରମ୍ଭ କରି ମାନସିକସ୍ତରରେ ସେମାନଙ୍କୁ ସୁଦୃଢ଼ ହେବାକୁ ପଡ଼ିଥାଏ। ସେଭଳି ଜଣେ ହେଉଛନ୍ତି ଭାରତୀୟ କ୍ରିକେଟର ମହମ୍ମଦ ସିରାଜ। ନିଜ ପ୍ରଚେଷ୍ଟା ବଳରେ ଏହି ଯୁବ ଦ୍ରୁତ ବୋଲର ଜାତୀୟ ଟିମ୍ରେ ନିଜର ସ୍ଥାନ ପକ୍କା କରିଛନ୍ତି। ଅଷ୍ଟ୍ରେଲିଆ ଗସ୍ତ ବେଳେ ଏକ ସମୟ ଏପରି ଥିଲା, ଯାହା ତାଙ୍କୁ ଭାଙ୍ଗି ଦେଇଥିଲା। କାରଣ ସେତେବେଳେ ସିରାଜଙ୍କ ବାପାଙ୍କ ପରଲୋକ ଘଟିଥିଲା। ଏଭଳି ସମୟରେ ମଇଦାନକୁ ଓହ୍ଲାଇବାକୁ ହେଲେ ମାନସିକ ଭାବେ ମଜଭୂତ ହେବାର ଆବଶ୍ୟକତା ଥିଲା। ବିରାଟ କୋହଲି ଏଭଳି କଠିନ ସମୟରେ ଅଧିନାୟକ ଭାବେ ନୁହେଁ ବରଂ ବଡ଼ ଭାଇର ଭୂମିକା ନିର୍ବାହ କରିଥିଲେ।
ଗତ ଅଷ୍ଟ୍ରେଲିଆ ଗସ୍ତ ସମୟରେ ଅନେକ ଭାରତୀୟ ଖେଳାଳି ଆହତ ହୋଇଥିଲେ। ଫଳରେ ସିରାଜଙ୍କୁ ଦଳରେ ସ୍ଥାନ ମିଳିଥିଲା। ସେ ମଇଦାନକୁ ଓହ୍ଲାଇ ଉଲ୍ଲେଖନୀୟ ପ୍ରଦର୍ଶନ କରିଥିଲେ। ହେଲେ ବିଦେଶରେ ପହଞ୍ଚିବା ପରେ ହିଁ ଭାରତରେ ତାଙ୍କ ବାପାଙ୍କ ଦେହାନ୍ତ ହୋଇଥିବା ଖବର ମିଳିଥିଲା। ହେଲେ ପରିବାରଲୋକେ ସେଠାରେ ରହି ଦେଶ ପାଇଁ ଖେଳିବାକୁ କହିଥିଲେ।
ସିରିଜର ପ୍ରଥମ ଟେଷ୍ଟ ମ୍ୟାଚ୍ରେ ବିରାଟ ଅଷ୍ଟ୍ରେଲିଆରେ ଥିଲେ। ସିରାଜଙ୍କ ବାପାଙ୍କ ପରଲୋକ କଥା ଶୁଣି ସେ କ୍ରିକେଟରଙ୍କ ପାଖକୁ ଯାଇ ଖୁବ୍ ଜୋର୍ରେ ଆଲିଙ୍ଗନ କରିଥିଲେ। ବ୍ୟସ୍ତ ହୁଅ ନାହିଁ। ମୁଁ ତୁମ ସହ ଅଛି ବୋଲି କହିଥିଲେ। ଏହି ଶବ୍ଦ ବହୁତ ସାହସ ଦେଇଥିଲା। ଏହାଛଡ଼ା ବିରାଟଙ୍କ ପାଇଁ ତାଙ୍କ କ୍ୟାରିୟର ବୋଲି ସେ କୁହନ୍ତି।
କେବଳ ବିରାଟ ନୁହନ୍ତି ରବି ଶାସ୍ତ୍ରୀ ମଧ୍ୟ ସିରାଜଙ୍କୁ ସବୁବେଳେ ଦଳର ଚାମ୍ପିୟନ ବୋଲର ବୋଲି କୁହନ୍ତି। କଠିନ ପରିସ୍ଥିତିରେ କିଭଳି ବୋଲିଂ କରିବାକୁ ହେବ ସେ ନେଇ ପ୍ରଶିକ୍ଷଣ ଦେଇଥାନ୍ତି ବୋଲି କ୍ରିକେଟର କହିଛନ୍ତି।
