ନୂଆଦିଲ୍ଲୀ,୭।୧- ଜଣାଶୁଣା ଭାରତୀୟ ମୋଟରସାଇକେଲ ରେସର ସି. ଏସ୍. ସନ୍ତୋଷ ସୌଦି ଆରବରେ ଚାଲିଥିବା ଡାକରା ରାଲିରେ ମର୍ମନ୍ତୁଦ ଦୁର୍ଘଟଣାର ସମ୍ମୁଖୀନ ହୋଇଛନ୍ତି। ଏୟାରଲିଫ୍ଟ ଯୋଗେ ରିୟାଦସ୍ଥିତ ମେଡିକାଲରେ ତାଙ୍କୁ ଭର୍ତ୍ତି କରାଯାଇଛି। କିନ୍ତୁ ସେ କୋମାକୁ ଚାଲିଯାଇଥିବା ଡାକ୍ତର କହିଛନ୍ତି।
ହିରୋ ମୋଟୋସ୍ପୋଟର୍ସ ପାଇଁ ପ୍ରତିନିଧିତ୍ୱ କରୁଥିବା ୩୭ ବର୍ଷୀୟ ସନ୍ତୋଷ ବୁଧବାର ବିଶ୍ୱର ଅନ୍ୟତମ ବୃହତ୍ ରାଲିର ୪ର୍ଥ ପର୍ଯ୍ୟାୟରେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ଦୁର୍ଘଟଣାବେଳେ ତାଙ୍କ ବାଇକ୍ର ଗତି ଘଣ୍ଟା ପ୍ରତି ୧୩୫ କି.ମି. ଥିଲା। ତାଙ୍କ ମୁଣ୍ଡରେ ଆଘାତ ଲାଗିଥିବା ସନ୍ଦେହ କରାଯାଉଛି। ପାରାମେଡିକ୍ସ ଟିମ୍ ଘଟଣା ସ୍ଥଳରେ ପହଞ୍ଚିବାବେଳକୁ ସେ ହୋସରେ ଥିଲେ।
ଉଲ୍ଲେଖଥାଉ କି, ଗତବର୍ଷ ରାଲିର ସମାନ ପର୍ଯ୍ୟାୟରେ ହିରୋ ମୋଟୋସ୍ପୋଟର୍ସ ରାଇଡର ପାଉଲୋ ଗୋନକାଲଭେସଙ୍କ ମୃତ୍ୟୁ ଘଟିଥିଲା। ତାଙ୍କ ମୃତ୍ୟୁ ପରେ ହିରୋ ମୋଟୋସ୍ପୋଟର୍ସ ୨୦୨୦ ଡାକରା ରାଲି ସଂସ୍କରଣରୁ ଓହରିଯାଇଥିଲା।