ଜଳବାୟୁ ପରିବର୍ତ୍ତନ ଏବେ ସାରା ବିଶ୍ୱ ପାଇଁ ଆହ୍ବାନ ସୃଷ୍ଟି କରିଛି। ଏହାର ମୁକାବିଲା କ୍ଷେତ୍ରରେ ଯୁବପିଢ଼ିଙ୍କ ବଡ଼ ଭୂମିକା ରହୁଛି। ସେମାନେ କିପରି ସଚେତନ ହୋଇ ଅନ୍ୟମାନଙ୍କୁ ଏକ୍ଷେତ୍ରରେ ସହଭାଗୀ କରାଇପାରିବେ ସେଥିପାଇଁ ‘ଧରିତ୍ରୀ’ ଆୟୋଜନ କରୁଛି ‘ଯୁବ ସମ୍ମିଳନୀ’ ବା ‘ୟୁଥ୍ କନ୍କ୍ଲେଭ୍’। ଚଳିତବର୍ଷର ପ୍ରସଙ୍ଗ ରହିଛି ‘କ୍ଲାଇମେଟ୍ ଚେଞ୍ଜ:ବିଲ୍ଡିଂ ରିଜିଲିଆନ୍ସ’। ଆସନ୍ତା ୨୪ ତାରିଖରେ ଭୁବନେଶ୍ୱରରେ ଧରିତ୍ରୀର ୫୧ତମ ଜନ୍ମବାର୍ଷିକୀ ପାଳନ ଅବସରରେ ଯୁବ ସମ୍ମିଳନୀର ଚତୁର୍ଥ ସଂସ୍କରଣ ଅନୁଷ୍ଠିତ ହେବ। ଏହି ୟୁଥ୍ କନ୍କ୍ଲେଭ୍ରେ ରାଜ୍ୟ ଓ ଦେଶର ବିଭିନ୍ନ ପ୍ରାନ୍ତରୁ ଯୁବ ପରିବେଶବିତ୍ ଏବଂ ପରିବେଶ ସୁରକ୍ଷା ପାଇଁ କାର୍ଯ୍ୟ କରୁଥିବା ସଂସ୍ଥା ଯୋଗଦେବେ। ସେଥିମଧ୍ୟରେ ରହିଛି ରକ୍ବ୍ୟାଣ୍ଡ୍ ମାଧ୍ୟମରେ ପରିବେଶ ସୁରକ୍ଷାର ବାର୍ତ୍ତା ବାଣ୍ଟୁଥିବା ଭାରତୀୟ ସଙ୍ଗୀତ ଜଗତର ଚର୍ଚ୍ଚିତ ‘ଅଗ୍ନି’ ବ୍ୟାଣ୍ଡ୍ ।
ଆମ ଦେଶରେ ମନୋରଞ୍ଜନ ପାଇଁ ଫିଲ୍ମ ସଙ୍ଗୀତର ଅଧିକ ଚାହିଦା ରହିଆସିଥିବାବେଳେ ନିଜସ୍ବ ଉଦ୍ୟମରେ ଆରମ୍ଭ ହୋଇଥିବା ବିଭିନ୍ନ ବ୍ୟାଣ୍ଡ ଏବେ ସଙ୍ଗୀତକୁ ଏକ ନୂଆ ଦିଗ ଦେଇଛି। ସେହି ବ୍ୟାଣ୍ଡଗୁଡ଼ିକ ମଧ୍ୟରୁ ଅନ୍ୟତମ ‘ଅଗ୍ନି’ ବ୍ୟାଣ୍ଡ। ଭାରତୀୟ ରକ୍ ବ୍ୟାଣ୍ଡ ଭାବେ ଏହା ସ୍ବତନ୍ତ୍ର ପରିଚୟ ସୃଷ୍ଟି କରିଛି । ଏହା ଭାରତୀୟ ଶାସ୍ତ୍ରୀୟ ସଙ୍ଗୀତ, ଲୋକଗୀତ ଏବଂ ରକ୍ ମ୍ୟୁଜିକ ମଧ୍ୟରେ ଏକ ସେତୁ ଭଳି କାର୍ଯ୍ୟ କରୁଛି। ୨୦୦୬ରେ ମୁମ୍ବାଇରେ ସଙ୍ଗୀତଜ୍ଞ କାନନ ମୋହନ ଏବଂ ଗିଟାର ବାଦକ କୌସ୍ତୁଭ ଧାଭାଲେ ଓରଫ କୋକୋଙ୍କ ଦ୍ୱାରା ଏହି ବ୍ୟାଣ୍ଡ ପ୍ରତିଷ୍ଠା ହୋଇଥିଲା। ଏହାର ପ୍ରଥମ ଆଲ୍ବମ୍ ୨୦୦୭ ମେ’ ୧୫ରେ ପୁଣେଠାରେ ସୋନୀ ବିଏମ୍ଜିରେ ପ୍ରଦର୍ଶିତ ହୋଇଥିଲା। ଅଗ୍ନି ବ୍ୟାଣ୍ଡ ଦେଶର ସର୍ବାଧିକ ପ୍ରଶଂସା ସାଉଁଟିଥିବା ଗୁରୁତ୍ୱପୂର୍ଣ୍ଣ ରକ୍ ବ୍ୟାଣ୍ଡମାନଙ୍କ ମଧ୍ୟରୁ ଅନ୍ୟତମ। ଉଦ୍ଦିପନା ସୃଷ୍ଟିକାରୀ ଲାଇଭ୍ ପ୍ରଦର୍ଶନ ଏବଂ ଭାରତୀୟ ସଙ୍ଗୀତର ଗଭୀର ମୂର୍ଚ୍ଛନା ସହିତ ଜଡ଼ିତ ସ୍ବର ପାଇଁ ଅଗ୍ନି ବେଶ୍ ଜଣାଶୁଣା। ବିଶେଷକରି ମୂଳ ସଙ୍ଗୀତର ଭାବ ନ ବଦଳାଇ ଏହାକୁ ଏକ ନୂତନ ଢଙ୍ଗରେ ପରିବେଷଣ କରିବା ଅଗ୍ନି ବ୍ୟାଣ୍ଡର ଲକ୍ଷ୍ୟ। ‘ସାଧୋ ରେ’ ଏବଂ ‘କବିରା’ ସଙ୍ଗୀତରେ ସେମାନଙ୍କ ଗାୟନ ଶୈଳୀ କମ୍ ସମୟ ମଧ୍ୟରେ ବେଶ୍ ଲୋକପ୍ରିୟ ହୋଇପାରିଥିଲା। ହିନ୍ଦୀ ଫିଲ୍ମ ଯଥା ଦିଲ୍ ଦୋସ୍ତି…ଏବଂ ସାଲାରେ ମଧ୍ୟ ସେମାନଙ୍କ ଗୀତ ସ୍ଥାନ ପାଇଛି। ସଙ୍ଗୀତ ପରିବେଷଣ ସହ ପରିବେଶ ସୁରକ୍ଷା ପାଇଁ ସଚେତନତା ସୃଷ୍ଟି କରିବାରେ ଅଗ୍ନି ବ୍ୟାଣ୍ଡ ମଧ୍ୟ ସକ୍ରିୟ ଭାବେ କାର୍ଯ୍ୟ କରି ଆସୁଛି। ଜଳବାୟୁ ପରିବର୍ତ୍ତନ ଯୋଗୁ ନଷ୍ଟ ହେଉଥିବା ଜୈବ ବିବିଧତାକୁ କିପରି ରୋକାଯାଇପାରିବ ସେଦିଗରେ ଏହା କାର୍ଯ୍ୟ କରୁଛି। ଏହି ବ୍ୟାଣ୍ଡର ମୁଖ୍ୟ ଗାୟକ ମୋହନ କାନନ୍ ଜଳବାୟୁ ପରିବର୍ତ୍ତନ ସଚେତନତା ପାଇଁ ବାର୍ତ୍ତା ବଣ୍ଟୁଥିବା ଜଣେ ଅଗ୍ରଦୂତ। ଏହି ଟିମ୍ ସକାରାତ୍ମକ ପରିବର୍ତ୍ତନର ପ୍ରେରଣା ଦେଇଥାଏ। ବିଶେଷକରି ପୃଥିବୀର ଭବିଷ୍ୟତ ସମ୍ପର୍କରେ ଚିନ୍ତା କରିବାକୁ ଏହା ଆମକୁ ପ୍ରେରିତ କରିଥାଏ। ଅଗ୍ନି ଆଲବମ୍ରୁ ଯାତ୍ରା ଆରମ୍ଭ କରିଥିବା ଏହି ବ୍ୟାଣ୍ଡ ଏବେ ଟିଭିରେ ପ୍ରସାରିତ ବହୁ ସଙ୍ଗୀତଭିତ୍ତିକ କାର୍ଯ୍ୟକ୍ରମ ସହ ଯୋଡ଼ିହୋଇଯାଇଛି। ସୋନି ବିଏମ୍ଜି ସହିତ ଏହାର ଚୁକ୍ତି ସ୍ବାକ୍ଷରିତ ହୋଇଛି। ୨୦୧୨ରେ ଦ’ ଆଭେଞ୍ଜର୍ସ ଫିଲ୍ମରେ ସଙ୍ଗୀତ ରଚନା କରିଥିଲା। ଏହି ବ୍ୟାଣ୍ଡ ଇତିମଧ୍ୟରେ ଏମ୍ଟିଭି ଭିଡିଓ ସଙ୍ଗୀତ ପୁରସ୍କାର, ଗ୍ଲୋବାଲ ଇଣ୍ଡିଆନ୍ ମ୍ୟୁଜିକ ଆଓ୍ବାର୍ଡ ଏବଂ ସ୍ପାଇକ୍ସ ଏସିଆ ଆଓ୍ବାର୍ଡ ଭଳି ଅନେକ ପୁରସ୍କାର ସାଉଁଟିଛି।