ପୁଣେ,୨୮।୭ : କରୋନା ପରେ, ବର୍ତ୍ତମାନ ଭାରତୀୟ ବୈଜ୍ଞାନିକମାନେ ମଙ୍କିପକ୍ସ କ୍ଷେତ୍ରରେ ବେଶ୍ ସଫଳତା ହାସଲ କରିଛନ୍ତି। ପୁଣେ ଭିତ୍ତିକ ନ୍ୟାଶନାଲ ଇନଷ୍ଟିଚ୍ୟୁଟ ଅଫ ଭିରୋଲୋଜି (ଏନଆଇଭି)ର ଏକ ଟିମ ମଙ୍କିପକ୍ସ ଭୂତାଣୁକୁ ସଂକ୍ରମିତଙ୍କଠାରୁ ପରୀକ୍ଷା ପାଇଁ ନିଆଯାଇଥିବା ନମୁନାରୁ ପୃଥକ କରିଛନ୍ତି। ଜୀବନ୍ତ ଭୂତାଣୁ ବାହାର କରିବା ପାଇଁ ବୈଜ୍ଞାନିକମାନଙ୍କର ଏକ ଦଳ ଗଠନ କରାଯାଇଥିଲା, ଯାହା ଜୁଲାଇ ୧୪ରୁ ଦିନରାତି ଲ୍ୟାବରେ ଏହି ଭୂତାଣୁ ଖୋଜିବା ପାଇଁ ନିୟୋଜିତ ହୋଇଥିଲା। ୧୧ ଦିନ ପରେ, ଏନଆଇଭି ଆନୁଷ୍ଠାନିକ ଭାବରେ ଏହାକୁ ନିଶ୍ଚିତ କରି କହିଛି ଯେ ଆକ୍ରାନ୍ତଙ୍କ ନମୁନାରୁ ମଙ୍କିପକ୍ସ ଭୂତାଣୁ ପୃଥକ କରିବାରେ ଦଳ ସଫଳ ହୋଇଛି।
ଏହାର ଅର୍ଥ ହେଉଛି ବର୍ତ୍ତମାନ ଏହି ଭୂତାଣୁ ସାହାଯ୍ୟରେ ବୈଜ୍ଞାନିକମାନେ ଶୀଘ୍ର ସଂକ୍ରମଣ ଚିହ୍ନଟ କରିବା ପାଇଁ ଏକ ଟେଷ୍ଟ କିଟ ବିକଶିତ କରି ପାରିବେ। ଏହା ସହିତ, ସିରିଆର ମୂଷାମାନଙ୍କରେ ଜୀବନ୍ତ ଭୂତାଣୁ ବ୍ୟବହାର କରି ଏହା ଏହାର ଗମ୍ଭୀରତା ଏବଂ ଚିକିତ୍ସା ବିଷୟରେ ଗୁରୁତ୍ୱପୂର୍ଣ୍ଣ ତଥ୍ୟ ବାହାର କରିବାରେ ସକ୍ଷମ ହେବେ। ଏହା ବ୍ୟତୀତ ଆଣ୍ଟି-ମଙ୍କିପକ୍ସ ଟିକା ମଧ୍ୟ ଆବିଷ୍କୃତ ହୋଇପାରିବ । ବୈଜ୍ଞାନିକମାନେ ଏହାକୁ ଭାରତ ପାଇଁ ଏକ ଐତିହାସିକ ସଫଳତା ବୋଲି କହିଛନ୍ତି।
ଏନଆଇଭିର ବରିଷ୍ଠ ବୈଜ୍ଞାନିକ ଡାକ୍ତର ପ୍ରୟାଗ ଯାଦବ କହିଛନ୍ତି ଏହା ଏକ ବଡ଼ ସଫଳତା। ଯେତେବେଳେ ୨୦୨୦ରେ କରୋନା ମହାମାରୀ ଆରମ୍ଭ ହୋଇଥିଲା, ସେହି ସମୟ ମଧ୍ୟରେ ଆମେ ପ୍ରଥମେ କରୋନା ଭୂତାଣୁକୁ ପୃଥକ କରିଥିଲୁ । ଏହା ପରେ ଟେଷ୍ଟ କିଟ ତିଆରି କରାଯାଇଥିଲା ଏବଂ କୋଭାକ୍ସିନ ଟିକା ମଧ୍ୟ ଆବିଷ୍କୃତ ହୋଇଥିଲା। ଏଥର ମଙ୍କିପକ୍ସ ଭୂତାଣୁକୁ ଅଲଗା କରାଯାଇଛି। ଏହାର ପରୀକ୍ଷା କିଟ, ଚିକିତ୍ସା ଏବଂ ଟିକା ଇତ୍ୟାଦି ବିଷୟରେ ଅଧିକ ଅଧ୍ୟୟନ ଶୀଘ୍ର ଆରମ୍ଭ ହେବ ବୋଲି ସେ କହିଛନ୍ତି। ଏନଆଇଭିର ବରିଷ୍ଠ ବୈଜ୍ଞାନିକ ପ୍ରୟାଗ ଯାଦବ କହିଛନ୍ତି, ମଙ୍କିପକ୍ସ ଭୂତାଣୁକୁ ପୃଥକ କରିବା ପରେ ବର୍ତ୍ତମାନ ଏହାର ଅନ୍ୟ କପି ମଧ୍ୟ ପ୍ରସ୍ତୁତ କରାଯାଉଛି। ପୁଣେର ବିଏସଏଲ୍-୩ ସ୍ତରୀୟ ଲ୍ୟାବରେ ଏହି କାମ ଚାଲିଛି।