ଓ୍ବାଶିଂଟନ,୨୭।୮ (ପି.ଟି.): ପୂର୍ବତନ ଭାରତୀୟ ଏସିଆନ୍ ଚାମ୍ପିୟନଶିପ୍ ବ୍ରୋଞ୍ଜ୍ ପଦକ ବିଜେତା ଇକ୍ବାଲ ସିଂ ଆମେରିକାରେ ଗିରଫ ହୋଇଛନ୍ତି। ନିଜ ମା’ ଓ ସ୍ତ୍ରୀଙ୍କୁ ହତ୍ୟାକରିବାର ଅଭିଯୋଗରେ ସେ ଗିରଫ ହୋଇଛନ୍ତି ବୋଲି କେତେକ ସ୍ଥାନୀୟ ଗଣମାଧ୍ୟମ ଖବର ପ୍ରକାଶ କରିଛି।
ପେନ୍ସିଲଭାନିଆର ଡେଲାଓ୍ବାର କାଉଣ୍ଟିରେ ରହୁଥିବା ୬୨ ବର୍ଷୀୟ ଇକ୍ବାଲ ରବିବାର ନିଜ ଅପରାଧ କଥା ସ୍ବୀକାର କରିଥିଲେ। ନ୍ୟୁଟାଉନ୍ ଟାଉନ୍ଶିପ୍ରେ ପୋଲସ ପହଞ୍ଚି ତାଙ୍କୁ ଗରିଫ କରିଥିଲା। ଗିରଫ ହେବା ବେହେଳ ଇକବାଲ୍ଙ୍କ ଦେହରେ ରକ୍ତର ଛିଟା ଲାଗିଥିଲା ଓ ତାଙ୍କ ଦେହରେ ଆଘାତ ମଧ୍ୟ ଦେଖିବାକୁ ମିଳିଥିଲା। ଘର ଭିତରରେ ଦୁଇ ମହିଳାଙ୍କ ମୃତଦେହ ପଡିଥିଲା। ସୋମବାର ତାଙ୍କ ବିରୋଧରେ ଫାଷ୍ଟ ଆଣ୍ଡ ଥାର୍ଡ ଡିଗ୍ରୀ ମର୍ଡର ଚାର୍ଜ ଲାଗିଥିଲା। ଜାମିନି ଆବେଦନ ଖାରଜ ହେବା ପରେ ତାଙ୍କୁ ପୋଲିସ୍ କଷ୍ଟଡିରେ ରଖାଯାଇଛି।
ଏହି ପୂର୍ବତନ ଶଟ୍ପୁଟର କୁଏତ୍ରେ ଅନୁଷ୍ଠିତ ୧୯୮୩ ଏସିଆନ ଆଥଲେଟିକ୍ସ ଚାମ୍ପିୟନଶିପ୍ରେ ବ୍ରୋଞ୍ଜ ପଦକ ହାସଲ କରିଥିଲେ। ଏହା ତାଙ୍କ କ୍ୟାରିୟରର ସବୁଠାରୁ ଶ୍ରେଷ୍ଠ ସଫଳତା ରହିଥିଲା ଓ ଏହା ପରେ ଆମେରିକା ଚାଲିଯାଇଥିଲେ। ସେଠାରେ ସେ ଟ୍ୟାକ୍ସି ଡ୍ରାଇଭର ଭାବେ କାର୍ଯ୍ୟ କରୁଥିଲେ। ଚିକିତ୍ସା ପାଇଁ ତାଙ୍କୁ ପ୍ରଥମେ ଏକ ସ୍ଥାନୀୟ ହସ୍ପିଟାଲକୁ ନିଆଯାଇଥିଲା। ରକଉଡ୍ ରୋଡ୍ସ୍ଥିତ ବାସଭବନରେ ତାଙ୍କ ମା’ ନସିବ କୌର ପ୍ରଥମ ମହଲାରେ ମରି ପଡିଥିବାର ପୋଲିସ ଦେଖିଥିଲା। ତାଙ୍କ ତଣ୍ଟି କଟାଯାଇଥିଲା। ସେହିପରି ସ୍ତ୍ରୀ ଯସପାଲ କୌର ପାହାଚ ଉପରେ ପଡିଥିବାର ଦେଖାଯାଇଥିଲା ଓ ତାଙ୍କ ଅବସ୍ଥା ମଧ୍ୟ ସମାନ ଥିଲା ପୋଲିସ ସତ୍ୟପାଠରୁ ସ୍ପଷ୍ଟ ହୋଇଛି।
ତେବେ ହତ୍ୟାର କାରଣ ସମ୍ପର୍କରେ କିଛି କୁହାଯାଇନାହିଁ। ହତ୍ୟା ସମ୍ପର୍କରେ ଇକ୍ବାଲ ପ୍ରଥମେ ପୁଅଙ୍କୁ ଜଣାଇଥିଲେ। ‘ମୁଁ ତୁମ ମା ଓ ଜେଜେମାଙ୍କୁ ହତ୍ୟା କରିଛି। ମୋତେ ଗିରଫ କରିବାକୁ ପୋଲିସକୁ କଲ୍ କର’ ବୋଲି ସେ ନିଜ ପୁଅକୁ ଫୋନ୍ କରି ଜଣାଇଥିଲେ। ଏହାପରେ ସେ ନିଜ ଝିଅକୁ ଫୋନ୍ କରି ସମାନ କଥା କହିଥିଲେ। ତେବେ ଇକ୍ବାଲ ଜଣେ ଜଣାଶୁଣା ବ୍ୟକ୍ତି ଥିଲେ। ନ୍ୟୁ ଟାଉନ୍ ସ୍କୋୟାରରେ ସେ ଚାଲିବା ଓ ଧ୍ୟାନ କରୁଥିବାର ବହୁବାର ଲକ୍ଷ୍ୟ କରାଯାଇଛି। ହତ୍ୟା ପୂର୍ବଦିନ ସେ ଅଲଗା ମନେ ହେଉଥିଲେ। ଧ୍ୟାନ କରିବା ବେଳେ ସେ ବିଚଳିତ ମନେହେଉଥିଲେ ବୋଲି ତାଙ୍କ ପଡୋଶୀ ସୁଏ ଡେଭିସନ୍ କହିଛନ୍ତି।