ଭୁବନେଶ୍ୱର,୧୫।୫ (ସ୍ପୋଟର୍ସ ବ୍ୟୁରୋ): ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ର ଅଷ୍ଟମ ସଂସ୍କରଣ ଆରମ୍ଭ ହେବା ପୂର୍ବରୁ ଓଡ଼ିଶା ଏଫ୍ସି ଦୁଇ ତାରକା ଖେଳାଳିଙ୍କୁ ଦଳରେ ସାମିଲ କରିଛି। ଡିଫେଣ୍ଡର ସାହିଲ ପାନଓ୍ବାର ଓ ସେବାଷ୍ଟିଆନ ଥଙ୍ଗମୁଆନସଙ୍ଗ ଓଡ଼ିଶା ଏଫ୍ସି ସହ ଚୁକ୍ତି କରିଛନ୍ତି।
ହାଇଦ୍ରାବାଦ ଏଫ୍ସି ବୋର୍ଡରେ ୨୧ ବର୍ଷୀୟ ସାହିଲ ଆସି ଓଡ଼ିଶା ସହ ୨ ବର୍ଷୀୟା ଚୁକ୍ତି କରିଛନ୍ତି। ଆଉ ଗୋଟିଏ ବର୍ଷ ଚୁକ୍ତି ବଢାଇବାକୁ ତାଙ୍କ ପାଖରେ ବିକଳ୍ପ ମଧ୍ୟ ରହିଛି। ଏହି ଗ୍ରୀଷ୍ମ ସେସନରେ ଭାରତୀୟ ଖେଳାଳିଙ୍କ ଟ୍ରାନ୍ସଫର ଥରେ ଖୋଲିବା ପରେ ଆନୁଷ୍ଠାନିକ ଭାବେ ଏହି ଟ୍ରାନ୍ସଫର ସମ୍ପନ୍ନ ହେବ ବୋଲି କୁହାଯାଇଛି। ଡୋରାଡୁନ୍ର ଏହି ଲେଫ୍ଟ ବ୍ୟାକ୍ ପ୍ଲେୟର ଆଇଏସ୍ଏଲ୍ର ଚତୁର୍ଥ ସଂସ୍କରଣରେ ଏଫ୍ସି ପୁଣେ ସିଟି ତରଫରୁ ପଦାର୍ପଣ କରିଥିଲେ। ଏହାପରେ ସେ ହାଇଦ୍ରାବାଦ ଏଫ୍ସିରେ ସାମିଲ ହୋଇଥିଲେ। ୨ଟି କ୍ଲବ ତରଫରୁ ସେ ୩୭ଟି ମ୍ୟାଚ୍ ଖେଳିଛନ୍ତି। ବିଭିନ୍ନ ବୟସବର୍ଗ ଟୁର୍ନାମେଣ୍ଟରେ ସେ ଭାରତ ପାଇଁ ପ୍ରତିନିଧିତ୍ୱ କରିବାର ସୁଯୋଗ ପାଇଛନ୍ତି। ୨୦୧୭ ସାଉଥ୍ ଏସିଆନ ଫୁଟବଲ ଫେଡେରେଶନ (ସାଫ୍) ୧୮ ବର୍ଷରୁ କମ୍ ଚାମ୍ପିୟନଶିପ୍ରେ ସେ ଟିମ୍ ଇଣ୍ଡିଆର ନେତୃତ୍ୱ ନେଇଥିଲେ।
ସେହିପରି ଉତ୍ତରପୂର୍ବାଞ୍ଚଳ ରାଜ୍ୟ ମଣିପୁରର ୨୨ ବର୍ଷୀୟ ସେବାଷ୍ଟିଆନଙ୍କୁ ଓଡ଼ିଶା ଏଫ୍ସି ଆପଣେଇଛି। ସେ କିଛିଦିନ ତଳେ ଗୋକୁଳମ କେରଳ ଏଫ୍ିସି ତରଫରୁ ପ୍ରତିନିଧିତ୍ୱ କରି ଆଇ- ଲିଗ୍ ଟାଇଟଲ ଜିତିଛନ୍ତି। ସେ ମଧ୍ୟ ଓଡ଼ିଶା ସହ ୨ ବର୍ଷୀୟା ଚୁକ୍ତିରେ ସ୍ବାକ୍ଷର କରିଛନ୍ତି। ସେ ମଧ୍ୟ ପୂର୍ବରୁ ନେରୋକା ଓ ଚେନ୍ନାଇ ସିଟି ଏଫ୍ସି ତରଫରୁ ଆଇ- ଲିଗ୍ରେ ପ୍ରତିନିଧିତ୍ୱ କରିଥିଲେ। ନିଜ ୟୁଥ୍ କ୍ୟାରିୟରରେ ସେ ପୁଣେ ସହିତ ଜଡିତ ଥିଲେ।
ସାହିଲ ଓ ସେବାଷ୍ଟିଆନଙ୍କୁ ଆମେ ଦଳକୁ ସ୍ବାଗତ କରୁଛୁ ବୋଲି ଓଡ଼ିଶା ଏଫ୍ସି ମୁଖ୍ୟ କାର୍ଯ୍ୟନିର୍ବାହୀ ରୋହନ ଶର୍ମା କହିଛନ୍ତି। ଆଇଏସ୍ଏଲ୍ରେ ସାହିଲ ଗତ କିଛିବର୍ଷ ହେବ ପ୍ରଭାବୀ ପ୍ରଦର୍ଶନ କରିଛନ୍ତି। ଯୁବ ଖେଳାଳି ହୋଇଥିଲେ ମଧ୍ୟ ସେ ଅଭିଜ୍ଞ ଭଳି ପ୍ରଦର୍ଶନ କରିଛନ୍ତି। ସାହିଲ ଓ ସେବାଷ୍ଟିଆନ ଦେଶର ଦୁଇ ଉଦୀୟମାନ ଡିଫେଣ୍ଡର ରୂପେ ଜଣାଶୁଣା। ଦଳ ଏମାନଙ୍କ ପ୍ରତିଭାରୁ ଫାଇଦା ଉଠାଇବ। ଓଡ଼ିଶା ଏଫ୍ସି ସବୁବେଳେ ଯୁବ ଖେଳାଳିଙ୍କୁ ଆଗକୁ ବଢିବାର ସୁଯୋଗ ଦେଇଥାଏ ଓ ଅଗ୍ରାଧିକାର ଦେଇଥାଏ। ଆଗାମୀ ସେସନରେ ଏହି ଦୁଇ ଖେଳାଳି ଦଳ ପାଇଁ ଉପଯୋଗୀ ସାବ୍ୟସ୍ତ ହେବେ ବୋଲି ଆଶା କରୁଛୁ ବୋଲି ରୋହନ କହିଛନ୍ତି।