ଭାସ୍କୋ,୧୬।୧: ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ)ରେ ଶୁକ୍ରବାର ଇଷ୍ଟ ବେଙ୍ଗଲ୍ ଓ କେରଳ ବ୍ଲାଷ୍ଟର୍ସ ମଧ୍ୟରେ ଅନୁଷ୍ଠିତ ମ୍ୟାଚ୍ ୧-୧ ଗୋଲରେ ଅମୀମାଂସିତ ରହିଛି। କଡ଼ା ସଂଘର୍ଷପୂର୍ଣ୍ଣ ଏହି ମ୍ୟାଚର ପ୍ରଥମାର୍ଦ୍ଧ ଗୋଲ ଶୂନ୍ୟ ଭାବେ ଶେଷ ହୋଇଥିଲା। ତେବେ ଦ୍ୱିତୀୟାର୍ଦ୍ଧରେ ଅଷ୍ଟ୍ରେଲିଆ ଫରଓ୍ବାର୍ଡ ଜୋର୍ଡାନ ମୁରେ ୬୪ତମ ମିନିଟ୍ରେ ଏକ ଫିଲ୍ଡ ଗୋଲ ଦେଇ କେରଳକୁ ଅଗ୍ରଣୀ କରାଇଥିଲେ। ଏହାପରେ ମ୍ୟାଚ୍ ଶେଷ ହେବାର ଠିକ୍ ପୂର୍ବରୁ ଅର୍ଥାତ ଇଞ୍ଜୁରି ଟାଇମ୍ର ପଞ୍ଚମ ମିନିଟ୍ରେ ଅଷ୍ଟ୍ରେଲିଆର ଅନ୍ୟତମ ଫୁଟବଲର ସ୍କଟ ନେଭିଲେ ଇଷ୍ଟ ବେଙ୍ଗଲ ତରଫରୁ ଗୋଲ ଦେଇଥିଲେ। ଫଳରେ ମ୍ୟାଚ୍ ଅମୀମାଂସିତ ରହିଥିଲା। ଏଥିସହ ଇଷ୍ଟବେଙ୍ଗଲ ଏପର୍ଯ୍ୟନ୍ତ ୧୧ ମ୍ୟାଚ୍ ଖେଳି ୨ ବିଜୟ, ୫ ଡ୍ର ଓ ୪ ପରାଜୟ ସହ ୧୧ ପଏଣ୍ଟ ହାସଲ କରି ତାଲିକାର ନବମ ସ୍ଥାନରେ ରହିଛି। ଅନ୍ୟପଟେ କେରଳ ୧୧ ମ୍ୟାଚ୍ ଖେଳି ୨ ବିଜୟ, ୪ ଡ୍ର ଓ ୫ ପରାଜୟ ସହ ୧୦ ପଏଣ୍ଟ ପାଇ ଦଶମ ସ୍ଥାନରେ ରହିଛି।