ନୂଆଦିଲ୍ଲୀ,୩୦।୫: ବିଗତ ଦିନର ଜର୍ସି ପ୍ରତି ଟିମ୍ ଇଣ୍ଡିଆର ଉତ୍ସାହ ବଢିବାରେ ଲାଗିଛି। ଦିନିକିଆ ଓ ଟି୨୦ ପରେ କ୍ରିକେଟର ପାରମ୍ପରିକ ଫର୍ମାଟରେ ମଧ୍ୟ ଭାରତୀୟ ଖେଳାଳିଙ୍କୁ ଦେଖିବାକୁ ମିଳିବ ରେଟ୍ରୋ ଲୁକ୍ରେ। ସାଉଥାମ୍ପଟନରେ ଜୁନ୍ ୧୮ରୁ ଆରମ୍ଭ ହେବାକୁଥିବା ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲ୍ରେ ଭାରତୀୟ ଖେଳାଳିମାନେ ୯୦ ଦଶକର ଜର୍ସି ପିନ୍ଧି ପଡିଆକୁ ଓହ୍ଲାଇବେ।
ଭାରତୀୟ ଅଲ୍ରାଉଣ୍ଡର ରବୀନ୍ଦ୍ର ଜାଡେଜା ଏହି ଜର୍ସିର ଫଟୋ ସୋସିଆଲ ମିଡିଆରେ ଛାଡ଼ିଛନ୍ତି। ଜାଡେଜା ଯେଉଁ ସ୍ବେଟର ପିନ୍ଧିଛନ୍ତି ତାହାର ନେକ୍ ନୀଳ ରଙ୍ଗର ଭି ଶେପରେ ରହିଛି। ୯୦ ଦଶକରେ ଭାରତୀୟ ଖେଳାଳିମାନେ ଏହି ଜର୍ସି ପିନ୍ଧି ଟେଷ୍ଟ ଖେଳୁଥିଲେ। ଉଲ୍ଲେଖଥାଉ କି, ଗତବର୍ଷ ଅଷ୍ଟ୍ରେଲିଆରେ ଖେଳାଯାଇଥିବା ଦିନିକିଆ ଓ ଟି୨୦ ସିରିଜରେ ଭାରତୀୟ ଖେଳାଳିମାନେ ୧୯୯୨ ବିଶ୍ୱକପ୍ର ଜର୍ସି ପିନ୍ଧିଥିଲେ।
