ନୂଆଦିଲ୍ଲୀ,୨୫।୬: ଇଂଲଣ୍ଡ ବିପକ୍ଷ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପୂର୍ବରୁ ପ୍ରସ୍ତୁତି ଲାଗି ଡରହାମଠାରେ ଏକତ୍ରିତ ହେବେ ଭାରତୀୟ ଦଳର ଖେଳାଳିମାନେ। ସେଠାରେ ଟିମ୍ ଇଣ୍ଡିଆର ଖେଳାଳିମାନେ ଦୁଇ ଭାଗରେ ବିଭକ୍ତ ହୋଇ ପରସ୍ପର ବିରୋଧରେ ଦୁଇଟି ମ୍ୟାଚ୍ ଖେଳିବେ। ବୁଧବାର ସାଉଥାମ୍ପଟଠାରେ ବିଶ୍ୱ ଟେଷ୍ଟ ଚାମ୍ପିୟନଶପ୍ ଫାଇନାଲରେ ପରାଜୟ ପରେ ଖେଳାଳିମାନେ ଲଣ୍ଡନରେ ଅଛନ୍ତି। ଫାଇନାଲ ଲାଗି ଭାରତୀୟ ଦଳରେ ସ୍ଥାନ ପାଇ ନ ଥିବା ୮ ଖେଳାଳି ଗତ ସପ୍ତାହରୁ ଲଣ୍ଡନ ଚାଲି ଆସିଥିଲେ।
ଅଗଷ୍ଟ ୪ ତାରିଖରୁ ନଟିଂହାମଠାରେ ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟ ପୂର୍ବରୁ ଭାରତୀୟ ଦଳ ଡରହାମ ସ୍ଥିତ ରିଭରସାଇଡ୍ ଗ୍ରାଉଣ୍ଡରେ ଦୁଇଟି ଇଣ୍ଟ୍ରା-ସ୍କାଡ୍ ମ୍ୟାଚ୍ ଖେଳିବ। ଏହି ଗୁରୁତ୍ୱପୂର୍ଣ୍ଣ ସିରିଜ୍ ପୂର୍ବରୁ ଭାରତୀୟ ଦଳକୁ କୌଣସି ପ୍ରଥମ ଶ୍ରେଣୀ ଦଳ ସହ ଖେଳିବାକୁ ସୁଯୋଗ ଦେଇ ନାହିଁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି)। କୋଭିଡ୍ ପ୍ରୋଟୋକୋଲକୁ ଦୃଷ୍ଟିରେ ରଖି ଭାରତୀୟ ଦଳ ପାଇଁ ଅଭ୍ୟାସ ମ୍ୟାଚ୍ ବ୍ୟବସ୍ଥା କରାଯାଇ ନାହିଁ। କାଉଣ୍ଟି ଦଳକୁ ଭାରତୀୟ ଦଳ ସହ ଗୋଟିଏ ବବଲ୍ରେ ରଖିବା ସହଜ ନୁହେଁ। ଇସିବି ଖେଳାଳିଙ୍କ ସୁରକ୍ଷା ଲାଗି ବେଶ୍ ଜତ୍ନବାନ ବୋଲି ବିସିସିଆଇ ପକ୍ଷରୁ କୁହାଯାଇଛି।
