ନୂଆଦିଲ୍ଲୀ,୧୮।୩ : ଭାରତର ସ୍ବାଧୀନତା ଆନ୍ଦୋଳନରେ ମହିଳାମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ବାସ୍ତବରେ, ରାଣୀ ଲକ୍ଷ୍ମୀ ବାଈ ହିଁ ସ୍ବାଧୀନତା ଆନ୍ଦୋଳନର ମୂଳଦୁଆ ପକାଇଥିଲେ। ବହୁ ସଂଖ୍ୟାରେ ମହିଳାଙ୍କ ଅଂଶଗ୍ରହଣ ଯୋଗୁ ଆମର ସ୍ବାଧୀନତା ସଂଗ୍ରାମ ସଫଳ ହୋଇଥିଲା। ଶନିବାର ଦିଲ୍ଲୀ ବିଶ୍ୱବିଦ୍ୟାଳୟର ଦୌଲତ ରାମ ମହାବିଦ୍ୟାଳୟର ଛାତ୍ରୀମାନଙ୍କୁ ସମ୍ବୋଧିତ କରିବାବେଳେ ଲୋକସଭା ବାଚସ୍ପତି ଓମ ର୍ବିଲା ଏହା କହିଛନ୍ତି। ଓମ ର୍ବିଲା କହିଛନ୍ତି ଯେ ମହିଳା ଶକ୍ତି ପ୍ରତି ସମ୍ମାନ ଭାରତୀୟ ପରମ୍ପରା ଏବଂ ସଂସ୍କୃତିର ଏକ ଅଂଶ। ଜ୍ୟୋତିବା ଫୁଲେ, ସାବିତ୍ରୀ ବାଈ ଫୁଲେ, ବାବା ସାହେବ ଆମ୍ବେଦକରଙ୍କ ପରି ସାମାଜିକ ସଂସ୍କାରକଙ୍କୁ ମନେ ପକାଇ ସେ କହିଛନ୍ତି ଯେ ମହିଳା ସଶକ୍ତିକରଣରେ ସେମାନଙ୍କର ଅବଦାନ ସର୍ବଦା ସ୍ମରଣୀୟ ହୋଇ ରହିବ।
ଦେଶର ବିକାଶରେ ମହିଳାମାନଙ୍କର ଅଂଶଗ୍ରହଣକୁ ନେଇ ଓମ ର୍ବିଲା କହିଛନ୍ତି ଯେ ଆଜି ଦେଶର ମହିଳାମାନେ ପ୍ରତ୍ୟେକ କ୍ଷେତ୍ରରେ ଏକ ପ୍ରମୁଖ ଭୂମିକା ଗ୍ରହଣ କରୁଛନ୍ତି। ଯୁଦ୍ଧ ବିମାନ ଠାରୁ ଆରମ୍ଭ କରି ସୀମା ଯୁଦ୍ଧ ପର୍ଯ୍ୟନ୍ତ, ମହିଳାମାନେ ଆଗ ଧାଡ଼ିରେ ଠିଆ ହୋଇଛନ୍ତି। ଲକ୍ଷ ଲକ୍ଷ ମହିଳା ସେଲ୍ଫ ହେଲ୍ପ ଗ୍ରୁପ ମାଧ୍ୟମରେ ସେମାନଙ୍କର ଛୋଟ ଶିଳ୍ପ ଚଳାଇ ସମାଜରେ ଏକ ବଡ ପରିବର୍ତ୍ତନ ଆଣିଛନ୍ତି। ଅଲ ଇଣ୍ଡିଆ ସେବାର ଅଧିକାରୀମାନେ ସଂସଦକୁ ଶିକ୍ଷାଗତ ଯାତ୍ରା ପାଇଁ ଆସନ୍ତି, ସେତେବେଳେ ଦେଖାଯାଏ ମହିଳା ପ୍ରଶିକ୍ଷକଙ୍କ ସଂଖ୍ୟା ପୁରୁଷଙ୍କ ତୁଳନାରେ ଅଧିକ।
ସମୟ ସହିତ ମହିଳାଙ୍କ ରାଜନୈତିକ ଅଂଶଗ୍ରହଣ ମଧ୍ୟ ବୃଦ୍ଧି ପାଇଛି। ଯେତେବେଳେ ଆମ ଦେଶ ସ୍ବାଧୀନ ହେଲା, ଦେଶର ସଂସଦରେ ମହିଳାଙ୍କ ସଂଖ୍ୟା ୧୫ ଥିଲା। ଆଜି ୧୧୫ ଜଣ ମହିଳା ଭାରତ ସଂସଦରେ ଦେଶର ପ୍ରତିନିଧିତ୍ୱ କରୁଛନ୍ତି। ଆଜି ୧୪ ଲକ୍ଷରୁ ଅଧିକ ମହିଳା ନେତୃତ୍ୱ ନେଇ ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ ସମସ୍ତ ଗଣତାନ୍ତ୍ରିକ ଅନୁଷ୍ଠାନରେ ସାମାଜିକ ତଥା ଅର୍ଥନୈତିକ ପରିବର୍ତ୍ତନ ଆଣିଛନ୍ତି।
