ମୁମ୍ବାଇ, ୧୮।୧୨: ମୁମ୍ବାଇର ହମିଦା ବାନୋ ୨୨ ବର୍ଷ ପରେ ଭାରତ ଫେରିଛନ୍ତି। ୨୦୦୨ରେ ଦୁବାଇରେ ଚାକିରି ଦେବାର ଲାଳସା ଦେଖାଇ ଜଣେ ଟ୍ରାଭେଲ ଏଜେଣ୍ଟ ତାଙ୍କୁ ପାକିସ୍ତାନ ପଠାଇ ଦେଇଥିଲେ। ଦୁବାଇରେ ଜଣେ ରୋଷେୟା ଭାବେ ତାଙ୍କୁ ନିଯୁକ୍ତି ମିଳିବ ବୋଲି ହମିଦାଙ୍କୁ ପ୍ରତିଶ୍ରୁତି ଦିଆଯାଇଥିଲା। କିନ୍ତୁ ଏହା ବଦଳରେ ତାଙ୍କୁ ପାକିସ୍ତାନର ସିନ୍ଧ୍ ରାଜ୍ୟ ହାଇଦ୍ରାବାଦ ଜିଲାକୁ ନିଆଯାଇଥିଲା। ସୋମବାର ହମିଦା କରାଚିରୁ ଫ୍ଲାଇଟ ଯୋଗେ ଲାହୋର ଆସିଥିଲେ ଓ ପରେ ସେ ଓ୍ବାଘା ବର୍ଡର ଦେଇ ଭାରତ ଫେରିଥିଲେ। ପାକିସ୍ତାନର ବହିର୍ବ୍ୟାପାର ମନ୍ତ୍ରାଳୟର ଅଧିକାରୀମାନେ ତାଙ୍କୁ ବିଦାୟ ଦେଇଥିଲେ।
ପୂର୍ବରୁ ହମିଦା ମୁମ୍ବାଇର କୁର୍ଲା ରେଲଓ୍ବେ ଷ୍ଟେଶନ ନିକଟରେ ରହୁଥିଲେ। ହମିଦା ୪ ପିଲାଙ୍କ ମା’ ଥିଲେ ଏବଂ ସ୍ବାମୀଙ୍କ ମୃତ୍ୟୁ ପରେ ସେ ପରିବାରର ଖର୍ଚ୍ଚ ସମ୍ଭାଳୁଥିଲେ। ତେଣୁ ବେଶି ରୋଜଗାର କରିବା ପାଇଁ ସେ ଦୁବାଇ ଯିବାକୁ ଇଚ୍ଛା ପ୍ରକାଶ କରିଥିଲେ। ହମିଦାଙ୍କ ଅନୁପସ୍ଥିତିରେ ପରିବାରର ଅନ୍ୟ ସଦସ୍ୟ ତାଙ୍କ ଝିଅ ମାନଙ୍କର ଲାଳନପାଳନ କରିଥିଲେ। ଭାରତ ଫେରିବା ପରେ ହମିଦା କହିଛନ୍ତି, ସେ କେବେ ଭାରତ ଫେରିବାକୁ ସକ୍ଷମ ହେବେ ବୋଲି ଭାବି ନ ଥିଲେ। ୨୨ ବର୍ଷ ପରେ ନିଜ ପରିବାର ଓ ଝିଅମାନଙ୍କୁ ପାଇ ସେ ବେଶ୍ ଖୁସି। ପ୍ରକାଶ ଯେ, ହମିଦା ପାକିସ୍ତାନରେ ଜଣେ ବ୍ୟକ୍ତିଙ୍କୁ ବିବାହ ମଧ୍ୟ କରିଥିଲେ। ତାଙ୍କର କୋଭିଡ୍ରେ ମୃତ୍ୟୁ ହୋଇଯାଇଥିଲା। ଏହାପରେ ସେ କରାଚୀରେ ତାଙ୍କ ସାବତ ପୁଅଙ୍କ ସହ ରହୁଥିଲେ।
