ଦୁବାଇ,୬।୨: ୨୦୨୨ରେ ଭାରତୀୟମାନେ ଦୁବାଇରେ ଘର କିଣିବାରେ ୩୫,୫୦୦ କୋଟି ଟଙ୍କା (୧୬ ବିଲିୟନ ଡିରହାମ୍) ବିନିଯୋଗ କରିଥିବା ରିଅଲ ଇଷ୍ଟେଟ୍ ତଥ୍ୟରୁ ଜଣାପଡ଼ିଛି। ୨୦୨୧ ତୁଳନାରେ ଏହା ଦୁଇଗୁଣ। ୨୦୨୧ରେ ଭାରତୀୟମାନେ ଦୁବାଇରେ ଘର କିଣାରେ ୯ ବିଲିୟନ ଡିରହାମ୍ ବିନିଯୋଗ କରିଥିଲେ। ଦୁବାଇରେ ଘର କିଣିଥିବା ବିଦେଶୀଙ୍କ ମଧ୍ୟରୁ ପ୍ରାୟ ୪୦ ପ୍ରତିଶତ ହେଉଛନ୍ତି ଭାରତୀୟ। ଗୃହ କ୍ରେତାଙ୍କ ମଧ୍ୟରୁ ଅଧିକାଂଶ ଦିଲ୍ଲୀ-ଏନ୍ସିଆର୍, ଅହମଦାବାଦ, ସୁରଟ, ହାଇଦ୍ରାବାଦ ଏବଂ ପଞ୍ଜାବର ଧନୀ ବ୍ୟବସାୟୀ, ଶିଳ୍ପପତି ଏବଂ ପ୍ରଭାବଶାଳୀ ବ୍ୟକ୍ତି।
ପ୍ରଚୁର ଅର୍ଥ ସହ ବିଳାସପୂର୍ଣ୍ଣ ଜୀବନଶୈଳୀ ଆଶାରେ ସେମାନେ ଦୁବାଇରେ ରହିବାକୁ ଆଗ୍ରହ ପ୍ରକାଶ କରୁଛନ୍ତି। ଦୁବାଇ ସହ ସାରା ବିଶ୍ୱର ଯୋଗାଯୋଗ ଥିବାରୁ ଅନ୍ତର୍ଜାତୀୟ ସ୍ତରର ବିଭିନ୍ନ ଦାୟିତ୍ୱରେ ଅବସ୍ଥାପିତ କେତେଜଣ ବରିଷ୍ଠ ଅଫିସର ମଧ୍ୟ ସେଠାର ସମ୍ପତ୍ତି ଉପରେ ନଜର ପକାଉଥିବା ଏକ ରିଅଲ ଇଷ୍ଟେଟ୍ କନ୍ସଲ୍ଟାନ୍ସିର ସିଇଓ କହିଛନ୍ତି। ଅନେକ ଧନୀ ଭାରତୀୟ ନିଜ ଦେଶର ମେଟ୍ରୋ ମହାନଗରୀକୁ ପଛରେ ପକାଇ ଦୁବାଇରେ ଅତ୍ୟାଧୁନିକ ଭଡ଼ାଘରେ ରହୁଛନ୍ତି। ମହାମାରୀ ବେଳେ ଦୁବାଇର ଘରଭଡ଼ା ବଜାର ୩୦% ହ୍ରାସ ପାଇଥିବାବେଳେ ଏବେ ୨୦୧୫-୧୬ ସ୍ତରକୁ ଫେରିଛି।
ଯୁବ ଭାରତୀୟ ଉଦ୍ୟୋଗୀମାନଙ୍କୁ ଦୁବାଇ ଆକର୍ଷଣ କରିବାର ଅନ୍ୟତମ କାରଣ ହେଲା ସେଠାର ଅନ୍ତର୍ଜାତୀୟ ଫାଇନାନ୍ସିଆଲ ସେଣ୍ଟର ଫିନ୍ଟେକ୍ ଇକୋସିଷ୍ଟମ ପ୍ରଦାନ କରୁଛି ବୋଲି ଜେଭି ଭେଞ୍ଚର୍ସର ସହ ପ୍ରତିଷ୍ଠାତା ବିଶାଳ ଗୋଏଲ କହିଛନ୍ତି। ଭାରତୀୟମାନେ ଦୁବାଇରେ କିଣୁଥିବା ଘରଗୁଡ଼ିକର ହାରାହାରି ଦାମ୍ ୩.୬ କୋଟିରୁ ୩.୮ କୋଟି ଟଙ୍କା ହୋଇଥିବାବେଳେ ମାସିକ ଘରଭଡ଼ା ୩ରୁ ୩.୫ ଲକ୍ଷ ଟଙ୍କା ରହିଛି।