ନୂଆଦିଲ୍ଲୀ,୨୨।୧: ପୂରା ଦେଶରେ ଟିକାକରଣ ପ୍ରକ୍ରିୟା ଆରମ୍ଭ ହେବାର ଏକ ସପ୍ତାହ ମଧ୍ୟରେ ୧ ନିୟୁତରୁ ଅଧିକ ଭାରତୀୟ କରୋନା ଭାକ୍ସିନ ନେଇସାରିଛନ୍ତି। ପ୍ରଥମ ଦିନ ଦେଶରେ ୨ ଲକ୍ଷ ସ୍ବାସ୍ଥ୍ୟକର୍ମୀଙ୍କ ଭ୍ୟାକସିନେଟ କରାଯାଇଥିଲା। ଯେ କୌଣସି ଦେଶରେ ଟିକାକରଣ ଆରମ୍ଭ ହେବାର ପ୍ରଥମ ଦିନରେ ଏତେ ସଂଖ୍ୟାରେ ଲୋକେ ଟିକା ନେବା ଏକ ରେକର୍ଡ। ଅବଶ୍ୟ ଭାକ୍ସିନ ନେବା ପରେ ସ୍ବାସ୍ଥ୍ୟକର୍ମୀଙ୍କ ଠାରେ ପାର୍ଶ୍ୱ ପ୍ରତିକ୍ରିୟା ଦେଖା ଦେଇଥିବାବେଳେ କିଛି ବ୍ୟକ୍ତିଙ୍କ ମୃତ୍ୟୁ ହୋଇଥିବା ଅଭିଯୋଗ ବିଭିନ୍ନ ରାଜ୍ୟରୁ ଆସିଛି।
କୋଭାକ୍ସିନ ଟିକାର ତୃତୀୟ ଟ୍ରାଏଲର ରିପୋର୍ଟ ଉପଲବ୍ଧ ନ ଥିବାବେଳେ ଟିକା ନେଉଥିବା ବ୍ୟକ୍ତିଙ୍କଠାରେ ପାର୍ଶ୍ୱ ପତିକ୍ରିୟା ଦେଖାଦେଉଥିବାରୁ କିଛି ରାଜ୍ୟରେ ସ୍ବାସ୍ଥ୍ୟକର୍ମୀ ଟିକା ନେବାକୁ ମନା କରି ଦେଇଛନ୍ତି। କିନ୍ତୁ ଅନ୍ୟ ଦେଶ ତୁଳନାରେ, କୋଭିଡ୍-୧୯ ଭାକ୍ସିନ ଉପରେ ଭାରତୀୟମାନେ ଅଧିକ ଭରସା କରୁଛନ୍ତି। ୧୦ରୁ ୮ ଜଣ ଭାରତୀୟ ଭାକ୍ସିନ ନେବାକୁ ଇଛୁକ ବୋଲି ଏଡେଲମ୍ୟାନ ପିଆର ଟ୍ରଷ୍ଟ ବାରୋମିଟର ୨୦୨୧ ପକ୍ଷରୁ କରାଯାଇଥିବା ସର୍ଭେରୁ ଜଣାପଡ଼ିଛି।
ଆମେରିକା, ବ୍ରିଟେନ, ଜର୍ମାନୀ ଓ ରୁଷିଆ ସମେତ ୨୮ ଦେଶକୁ ନେଇ କରାଯାଇଥିବା ସର୍ଭେରୁ ଜଣାପଡ଼ିଛି ଭାରତରେ ସର୍ବାଧିକ ପ୍ରତିଶତ ଲୋକ କୋଭିଡ୍-୧୯ ଭାକ୍ସିନ ଉପରେ ଭରସା କରୁଛନ୍ତି। ସର୍ଭେରୁ କୁହାଯାଇଛି, ପ୍ରାୟ ୫୧ ପ୍ରତିଶତ ଲୋକେ ଯଥା ଶୀଘ୍ର ଭାକ୍ସିନ ନେବାକୁ ପ୍ରସ୍ତୁତ। ଆଉ ୨୯ ପ୍ରତିଶତ ଲୋକେ ୬ ମାସରୁ ବର୍ଷକ ମଧ୍ୟରେ ଟିକା ନେବେ। ଆମେରିକାରେ କେବଳ ୫୯ ପ୍ରତିଶତ ଲୋକେ ଟିକା ନେବାକୁ ଚାହୁଁଛନ୍ତି। କରୋନା ସୃଷ୍ଟି ହୋଇଥିବା ଚାଇନାରେ ୭୪ ପ୍ରତିଶତ ଲୋକେ ଶଟ ନେବାକୁ ଇଚ୍ଛୁକ।