ପୋଖରନ, ୨୪।୯ : ସ୍ବଦେଶୀ ଅସ୍ତ୍ରଶସ୍ତ୍ର ପ୍ରସଙ୍ଗରେ ଭାରତ ଆତ୍ମନିର୍ଭରଶୀଳ ହେବା ଦିଗରେ ଆଗେଇବାରେ ଲାଗିଛି। ପ୍ରତିରକ୍ଷା କ୍ଷେତ୍ରରେ ଦେଶରେ ଘଟୁଥିବା ନୂତନତ୍ୱ ମଧ୍ୟ ବିଶ୍ୱକୁ ଆଶ୍ଚର୍ଯ୍ୟ କରିଛି। ବର୍ତ୍ତମାନ ଭାରତ ଜୈସଲମେରର ପୋଖରାନ ଫିଲ୍ଡ ଫାୟାରିଂ ରେଞ୍ଜରେ ଏଏଲ୍ଏସ୍-୫୦ ଡ୍ରୋନକୁ ସଫଳତାର ସହ ପରୀକ୍ଷଣ କରିଛି।
ଟାର୍ଗେଟରେ ସଠିକ ଭାବରେ ଲକ୍ଷ୍ୟ ରଖୁଥିବା ଡ୍ରୋନ କ୍ୟାମେରା ସହିତ ଏଏଲ୍ଏସ୍-୫୦ ସଜ୍ଜିତ ହୋଇଛି। ଏହା ପୂର୍ବରୁ ଲଦାଖରେ ମଧ୍ୟ ଏହାର ପରୀକ୍ଷା କରାଯାଇଥିଲା। ଉଭୟ ପରୀକ୍ଷଣର ସଫଳତା ପରେ ଭାରତୀୟ ସେନାରେ ଏହାକୁ ସାମିଲ କରାଯିବା ନେଇ ପ୍ରସ୍ତୁତି ଆରମ୍ଭ ହୋଇଛି।
ଏହା ଟାଟା ଆଡଭାନ୍ସ ସିଷ୍ଟମ ଲିମିଟେଡ ଦ୍ୱାରା ବିକଶିତ କରାଯାଇଛି। ଗଣମାଧ୍ୟମ ସୂଚନା ଅନୁଯାୟୀ, ଏହି ଅସ୍ତ୍ର ଭର୍ଟିକାଲ ଟେକ ଅଫ ଏବଂ ଲ୍ୟାଣ୍ଡିଂ କରିବାକୁ ସକ୍ଷମ। ସଂକୀର୍ଣ୍ଣ ଉପତ୍ୟକା, ପର୍ବତ, ଜଙ୍ଗଲ ଏବଂ ଅପହଞ୍ଚ ଅଞ୍ଚଳରେ ବ୍ୟବହାର ପାଇଁ ଏହା ପରିକଳ୍ପନା କରାଯାଇଛି ।
ଏଏଲ୍ଏସ୍-୫୦ର ମୂଲ୍ୟ କ୍ଷେପଣାସ୍ତ୍ର କିମ୍ବା ଅନ୍ୟ ଡ୍ରୋନ ତୁଳନାରେ ବହୁତ କମ ଥିବାବେଳେ ଏହା ଶତ୍ରୁଙ୍କ ପାଇଁ ଅଧିକ ଘାତକ ହୋଇପାରିବ। ଏହାର ଏକ ସ୍ବଂୟଚାଳିତ ଟାର୍ଗେଟ ସିଷ୍ଟମ ଅଛି। ତାହା ହେଉଛି, ଏହା ପୂର୍ବରୁ ସ୍ଥିର ହୋଇଥିବା ଲକ୍ଷ୍ୟକୁ ସହଜରେ ଚିହ୍ନଟ କରି ନଷ୍ଟ କରିପାରିବ। ଏହା ସହିତ, ଏହା ଶତ୍ରୁ ପାଖରେ ପହଞ୍ଚିବା ପୂର୍ବରୁ ଏହାର ନିୟନ୍ତ୍ରକଙ୍କୁ ଯିବା ବାଟ ବିଷୟରେ ମଧ୍ୟ ସୂଚନା ଦେଇଥାଏ ।
