ନୂଆଦିଲ୍ଲୀ, ୨୧।୭: ଭାରତୀୟ ଜାଭେଲିନ ଥ୍ରୋ ଖେଳାଳି ଅନୁ ରାଣୀ ପୁଣି ଥରେ ବିଶ୍ୱ ଆଥଲେଟିକ୍ସ ଚାମ୍ପିୟନଶିପ ୨୦୨୨ ଇଭେଣ୍ଟର ଫାଇନାଲରେ ପ୍ରବେଶ କରିଛନ୍ତି। ସେ ଗ୍ରୁପ ବି’ର ଯୋଗ୍ୟତା ପର୍ଯ୍ୟାୟରେ ଗୁରୁବାର ୫୯.୬୦ ମିଟର ଜାଭେଲିନ ଫିଙ୍ଗି ଫାଇନାଲରେ ପ୍ରବେଶ କରିଛନ୍ତି। କ୍ରମାଗତ ଦ୍ୱିତୀୟ ଥର ପାଇଁ ଜାଭେଲିନ ଥ୍ରୋ ଇଭେଣ୍ଟର ଫାଇନାଲରେ ପ୍ରବେଶ କରିବାରେ ସେ ହେଉଛନ୍ତି ପ୍ରଥମ ଭାରତୀୟ। ବର୍ତ୍ତମାନ ଫାଇନାଲରେ ୧୨ ଜଣ ଖେଳାଳି ପରସ୍ପର ସହିତ ପ୍ରତିଦ୍ୱନ୍ଦ୍ୱିତା କରୁଥିବା ଦେଖିବାକୁ ମିଳିବ।
ଯୋଗ୍ୟତା ରାଉଣ୍ଡରେ ଅନୁଙ୍କର ଖରାପ ପ୍ରଦର୍ଶନ ଆରମ୍ଭ ହୋଇଥିଲା। ସେ ପ୍ରଥମ ପ୍ରୟାସରେ ଏକ ଖରାପ ଥ୍ରୋ ଫିଙ୍ଗିଥିଲେ। ଦ୍ୱିତୀୟ ପ୍ରୟାସରେ ସେ ୫୫.୩୫ ମିଟର ଜାଭେଲିନ ଥ୍ରୋ ସହିତ ପ୍ରତ୍ୟାବର୍ତ୍ତନ କରିଥିଲେ ଏବଂ ତା’ପରେ ୫୯.୬୦ ମିଟର ଦୂରତା ସହିତ ଶେଷ ପ୍ରୟାସରେ ସେ ଗ୍ରୁପ ବି’ରେ ପଞ୍ଚମ ସ୍ଥାନ ହାସଲ କରିଥିଲେ। ଏହିପରି ଗ୍ରୁପ-ଏ ଏବଂ ଗ୍ରୁପ-ବିକୁ ମିଶାଇ ସେ ଅଷ୍ଟମ ସ୍ଥାନରେ ରହି ଫାଇନାଲକୁ ଟିକେଟ ପାଇଥିଲେ।
ଏହି ସିଜନରେ ୨୯ ବର୍ଷୀୟ ଅନୁଙ୍କ ସର୍ବୋତ୍ତମ ପ୍ରଦର୍ଶନ ହେଉଛି ୬୩.୬୨ ମିଟର। ଏହା ମଧ୍ୟ ତାଙ୍କର ସାମଗ୍ରିକ ଶ୍ରେଷ୍ଠ ପ୍ରଦର୍ଶନ। ବିଶ୍ୱ ଚାମ୍ପିୟନଶିପରେ ସେ ଏହି ରେକର୍ଡଠାରୁ ବହୁ ପଛରେ ଥିଲେ ମଧ୍ୟ ଏହା ସତ୍ତ୍ୱେ ସେ ଫାଇନାଲରେ ପହଞ୍ଚତ୍ବାରେ ସଫଳ ହୋଇଥିଲେ।
ଅନୁ ରାଣୀ ଏହା ପୂର୍ବରୁ ୨୦୧୯ରେ ଦୋହାଠାରେ ଅନୁଷ୍ଠିତ ବିଶ୍ୱ ଚାମ୍ପିୟନଶିପର ଫାଇନାଲରେ ପ୍ରବେଶ କରିଥିଲେ। ତା’ପରେ ସେ ୬୧.୧୨ ମିଟର ଥ୍ରୋ ସହିତ ଫାଇନାଲରେ ଅଷ୍ଟମ ସ୍ଥାନ ହାସଲ କରିଥିଲେ।
