ଚେଙ୍ଗଡୁ, ୩।୮: ଏଠାରେ ଚାଲିଥିବା ଓ୍ବାଲର୍ଡ ୟୁନିଭର୍ସିଟି ଗେମ୍ସର ଆଥଲେଟିକ୍ସ ଇଭେଣ୍ଟରେ ବୁଧବାର ଭାରତର ଅଭିଯାନ ଆରମ୍ଭ ହୋଇଛି। ପ୍ରଥମ ଦିବସରେ ଭବାନୀ ଯାଦବ ଭଗବତୀ ମହିଳା ଲଙ୍ଗଜମ୍ପ ଇଭେଣ୍ଟରେ ବ୍ରୋଞ୍ଜ ପଦକ ପାଇଛନ୍ତି। ସେ ୬.୩୨ ମିଟର ଜମ୍ପକରି ଏହି ସଫଳତା ପାଇଥିଲେ। ପୋଲାଣ୍ଡର ନିକୋଲା ହୋରୋସ୍କା ୬.୬୦ ଓ ମାଗ୍ଦାଲେନା ବୋକୁନ ୬.୪୧ ମିଟର ସହିତ ଯଥାକ୍ରମେ ସ୍ବର୍ଣ୍ଣ ଓ ରୌପ୍ୟ ପଦକ ପାଇଛନ୍ତି।
ଶୁଟିଂ ଦଳକୁ ୮ ସ୍ବର୍ଣ୍ଣ ସହ ୧୪ ପଦକ
ଭାରତୀୟ ଶୁଟରମାନେ ଏଥର ପ୍ରତିଯୋଗିତାରେ ଚମତ୍କାର ପ୍ରଦର୍ଶନ କରିଛନ୍ତି। ଏମାନେ ୮ ସ୍ବର୍ଣ୍ଣ, ୪ ରୌପ୍ୟ ଓ ୨ ବ୍ରୋଞ୍ଜ ସହ ମୋଟ ୧୪ ପଦକ ହାସଲ କରିଛନ୍ତି। ଫଳରେ ଭାରତୀୟ ଶୁଟିଂ ଦଳ ପ୍ରତିଯୋଗିତାରେ ଚାମ୍ପିୟନ ହୋଇଛି। ଭାରତୀୟ ପ୍ରତିନିଧି ଦଳରେ ମୋଟ ୨୦ ଶୁଟର ସାମିଲ ଥିବାବେଳେ ସେମାନଙ୍କ ମଧ୍ୟରୁ ୧୮ ଜଣ ପଦକ ହାସଲ କରିଛନ୍ତି। ବୁଧବାର ଅନ୍ତିମ ଦିବସରେ ଅନୁଷ୍ଠିତ ୧୦ ମିଟର ଏୟାର ରାଇଫଲ ମିକ୍ସଡ ଟିମ୍ ଇଭେଣ୍ଟରେ ଭାରତର ଏଲାଭେନିଲ ଭାଲାରିଭାନ ଓ ଦିବ୍ୟାଂଶ ସିଂ ପନଓ୍ବର ରୌପ୍ୟ ପଦକ ହାସଲ କରିଛନ୍ତି। ଚାଇନା ପ୍ରତିଯୋଗୀ ସ୍ବର୍ଣ୍ଣ ଓ ଆମେରିକା ବ୍ରୋଞ୍ଜ ପଦକ ହାସଲ କରିଛି। ବୁଧବାର ଶେଷସୁ୍ଦ୍ଧା ଭାରତ ୧୧ ସ୍ବର୍ଣ୍ଣ, ୫ ରୌପ୍ୟ ଓ ୭ ବ୍ରୋଞ୍ଜ ସହ ମୋଟ ୨୩ଟି ପଦକ ପାଇ ପଏଣ୍ଟ ଟେବୁଲର ୪ର୍ଥ ସ୍ଥାନରେ ରହିଛି। ଚାଇନା, କୋରିଆ ଓ ଜାପାନ ପ୍ରଥମ ୩ ସ୍ଥାନ ଅଧିକାର କରିଛନ୍ତି।
ଭାରତରୁ ପ୍ରତିନିଧିତ୍ୱ କରୁଥିବା ଓଡ଼ିଶା ଖେଳାଳିଙ୍କ ମଧ୍ୟରେ ଋତପର୍ଣ୍ଣା ଓ ଶ୍ୱେତପର୍ଣ୍ଣା ମହିଳା ଡବଲ୍ସ ବ୍ୟାଡ୍ମିଣ୍ଟନ, ଋତପର୍ଣ୍ଣା ମିକ୍ସଡ ଡବଲ୍ସ ବ୍ୟାଡ୍ମିଣ୍ଟନ, କବିର ହଂସ ମିକ୍ସଡ ଡବଲ୍ସ ଟେନିସ, ବିକ୍ରାନ୍ତ ମଲିକ ଜାଭେଲିନ୍ ଥ୍ରୋ ଏବଂ ପ୍ରତ୍ୟାଶା ରାୟ ସୁଇମିଂ ଇଭେଣ୍ଟରେ ଆକ୍ସନରେ ଦେଖିବାକୁ ମିଳିବେ।