ନୂଆଦିଲ୍ଲୀ,୩୦।୧ : ପଡୋଶୀ ଦେଶ ପାକିସ୍ତାନରେ ଅଟା ସଙ୍କଟ ମଧ୍ୟରେ ଏହାର ମୂଲ୍ୟ ଭାରତରେ ମଧ୍ୟ ଆକାଶଛୁଆଁ ହେବା ଆରମ୍ଭ କରିଛି। ଜାନୁୟାରୀ ମାସରେ ଅଟାର ଦାମ ଦୁଇଥର ବୃଦ୍ଧି ପାଇଛି। ସରକାରୀ ତଥ୍ୟ ଅନୁଯାୟୀ ଅଟା ଖୋଲା ବଜାରରେ କିଲୋଗ୍ରାମ ପିଛା ୩୮ ଟଙ୍କାରେ ବିକ୍ରି ହେଉଥିବାବେଳେ ପ୍ୟାକେଟରେ ଏହାର ମୂଲ୍ୟ କିଲୋଗ୍ରାମ ୪୫-୫୫ ଟଙ୍କା ରହିଛି।
ରିପୋର୍ଟ ଅନୁଯାୟୀ, ଗତ ବର୍ଷ ତୁଳନାରେ ଅଟାର ଦାମ ଚଳିତ ବର୍ଷ ୪୦ ପ୍ରତିଶତ ବୃଦ୍ଧି ପାଇଛି। ଜାନୁୟାରୀ ୨୦୨୨ ରେ, ଅଟାର ଦାମ କିଲୋଗ୍ରାମ ପିଛା ୨୫-୨୭ ଟଙ୍କା ଥିବାବେଳେ ପ୍ୟାକରେ ବ୍ରାଣ୍ଡେଡ ଅଟା କିଲୋଗ୍ରାମ ପିଛା ୩୫ ଟଙ୍କାରେ ବିକ୍ରି ହେଉଥିଲା। ରପ୍ତାନି ଉପରେ ନିଷେଧାଦେଶ ସତ୍ତ୍ୱେ ଗହମ ଏବଂ ଅଟା ଦର ବୃଦ୍ଧି ଯୋଗୁଁ ସରକାରଙ୍କ ଚିନ୍ତା ବଢ଼ିବାରେ ଲାଗିଛି।
ବିଶ୍ୱର ଦ୍ୱିତୀୟ ବୃହତ୍ତମ ଗହମ ଉତ୍ପାଦନକାରୀ ହେବା ସତ୍ତ୍ୱେ ଭାରତରେ ଅଟା ଦର ବୃଦ୍ଧି ପାଇବା ନେଇ ସରକାର ବିଭିନ୍ନ ପଦକ୍ଷେପ ଗ୍ରହଣ ଉପରେ ଗୁରୁତ୍ୱାରୋପ କରୁଛନ୍ତି।
