ନୂଆଦିଲ୍ଲୀ,୩୦।୧୧: ଦକ୍ଷିଣ ଆଫ୍ରିକାରେ ଚିହ୍ନଟ ହୋଇଥିବା କରୋନା ଭୂତାଣୁର ନୂଆ ଭାରିଆଣ୍ଟ ଓମିକ୍ରନ ପୂରା ବିଶ୍ୱକୁ ଚିନ୍ତାରେ ପକାଇ ଦେଇଛି। କିନ୍ତୁ ଏହା ଆସନ୍ତା ମାସରୁ ଆରମ୍ଭ ହେବାକୁ ଥିବା ଭାରତୀୟ ଦଳର ଦକ୍ଷିଣ ଆଫ୍ରିକା ଗସ୍ତକୁ ପ୍ରଭାବିତ କରିବ ନାହିଁ। ଭ୍ରମଣକାରୀ ଖେଳାଳି ଓ ଘରୋଇ ଖେଳାଳିଙ୍କ ପାଇଁ ଫୁଲ ବାୟୋ ସିକ୍ୟୁର ଏନଭାରମେଣ୍ଟ ପ୍ରସ୍ତୁତ କରାଯାଇଥିବା ଦକ୍ଷିଣ ଆଫ୍ରିକାର ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ନୂଆ ଭାରିଆଣ୍ଟ ଭୟରେ ଦକ୍ଷିଣ ଆଫ୍ରିକାରେ ଥିବା ବିସିସିଆଇ ତା’ର ଏ’ ଦଳକୁ ପ୍ରତ୍ୟାହାର ନ କରିବାକୁ ନିଷ୍ପତ୍ତି ନେଇଛି। ଏହାକୁ ପ୍ରଶଂସା କରିଛି ଦକ୍ଷିଣ ଆଫ୍ରିକାର ବୈଦେଶିକ ମନ୍ତ୍ରଣାଳୟ।
ଆସନ୍ତା ୧୭ ତାରିଖରୁ ଦକ୍ଷିଣ ଆଫ୍ରିକା ସହ ୩ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳିବ ଭାରତୀୟ ଦଳ। ଏହାପରେ ଦୁଇ ଦଳ ମଧ୍ୟରେ ସମାନ ସଂଖ୍ୟକ ଦିନିକିଆ ଓ ୪ ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳାଯିବ। ଏହି ସିରିଜ୍ ଲାଗି ବିରାଟ କୋହଲିଙ୍କ ନେତୃତ୍ୱାଧୀନ ଦଳ ଡିସେମ୍ବର ୯ ତାରିଖରେ ଦକ୍ଷିଣ ଆଫ୍ରିକାରେ ପହଞ୍ଚିବାର କାର୍ଯ୍ୟସୂଚୀ ରହିଛି।
ଭାରତୀୟ ଖେଳାଳିଙ୍କ ସ୍ବାସ୍ଥ୍ୟ ଓ ସୁରକ୍ଷାକୁ ନିଶ୍ଚିତ କରିବା ପାଇଁ ଦକ୍ଷିଣ ଆଫ୍ରିକା ସମସ୍ତ ପ୍ରକାର ପଦକ୍ଷେପ ନେବ। ଭାରତ ଏ’ ସମେତ ପ୍ରତ୍ୟେକ ଦଳ ପାଇଁ ସମ୍ପୂର୍ଣ୍ଣ ବାୟୋ ସିକ୍ୟୁର ଏନଭାରମେଣ୍ଟ ପ୍ରସ୍ତୁତ କରାଯିବ ବୋଲି ଇଣ୍ଟନ୍ୟାଶନାଲ ରିଲେଶନ ଓ କୋଓପରେଶନ ବିଭାଗ (ଡିର୍କୋ) ପକ୍ଷରୁ କୁହାଯାଇଛି।
