ରାଉରକେଲା,୧୫।୨(ଦିନେଶ ମିଶ୍ର): ରାଉରକେଲା ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ମହିଳା ହକି ପ୍ରୋ ଲିଗ୍ର ବୁଧବାର ଦ୍ୱିତୀୟ ମ୍ୟାଚ୍ରେ ଭାରତ ୦-୧ ଗୋଲରେ ନେଦରଲାଣ୍ଡ୍ସଠାରୁ ହାରି ଯାଇଛି। ଫଳରେ ଚଳିତ ପ୍ରୋ ଲିଗ୍ରେ ଭାରତୀୟ ମହିଳା ଦଳ ୬ ମ୍ୟାଚରୁ ୫ମ ପରାଜୟ ବରଣ କରିଛି। ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ୪ ମ୍ୟାଚରୁ ୧ ବିଜୟ ଓ ୩ ପରାଜୟ ଲଭିଥିବା ଭାରତୀୟ ଦଳ ଏଠାରେ କ୍ରମାଗତ ଦ୍ୱିତୀୟ ମ୍ୟାଚ ହାରିଛି। ଭୁବନେଶ୍ୱରରେ ଅନୁଷ୍ଠିତ ପ୍ରଥମ ଚରଣରେ ମଧ୍ୟ ଭାରତ ୧-୩ ଗୋଲରେ ନେଦରଲାଣ୍ଡ୍ସଠାରୁ ହାରି ଯାଇଥିଲା। ଭାରତ ଏପର୍ଯ୍ୟନ୍ତ ଖେଳିଥିବା ୬ ମ୍ୟାଚରୁ ମାତ୍ର ୩ ପଏଣ୍ଟ ପାଇ ଟେବୁଲର ୫ମ ସ୍ଥାନରେ ରହିଛି। ଅନ୍ୟପକ୍ଷରେ ନେଦରଲାଣ୍ଡ୍ସ ୧୦ ମ୍ୟାଚରୁ ୧୦ ବିଜୟ ସହ ୩୦ ପଏଣ୍ଟ ପାଇ ଟେବୁଲରେ ନିଜର ଶୀର୍ଷସ୍ଥାନକୁ ମଜଭୁତ କରିଦେଇଛି।
ଏଠାରେ ପୂରା ମ୍ୟାଚରେ ନେଦରଲାଣ୍ଡ୍ସ ପ୍ରାଧାନ୍ୟ ବିସ୍ତାର କରି ଖେଳିଥିଲା। ଭାରତୀୟ ଖେଳାଳିମାନେ ପ୍ରଥମ କ୍ୱାର୍ଟରକୁ ଗୋଲଶୂନ୍ୟ ରଖିବାରେ ସକ୍ଷମ ହୋଇଥିଲେ ହେଁ ଦ୍ୱିତୀୟ କ୍ୱାର୍ଟରରେ ଅର୍ଥାତ୍ ୨୭ତମ ମିନିଟ୍ରେ ନେଦରଲାଣ୍ଡ୍ସର ଫରଓ୍ବାର୍ଡ ଖେଳାଳି ଫେଲିସ୍ ଆଲବେର୍ସ ଗୋଲ ଦେଇ ଦଳକୁ ୧-୦ ଗୋଲରେ ଆଗୁଆ ରଖିଥିଲେ। ତୃତୀୟ ଓ ଚତୁର୍ଥ କ୍ୱାର୍ଟରରେ ଉଭୟ ଦଳ ଅନେକ ସୁଯୋଗ ପାଇଥିଲେ ମଧ୍ୟ ଗୋଲ ହୋଇପାରି ନ ଥିଲା। ମ୍ୟାଚରେ ନେଦରଲ୍ୟାଣ୍ଡ୍ସ ୭ଟି ପେନାଲ୍ଟି ସୁଯୋଗ ପାଇଥିବାବେଳେ ଗୋଲ କରି ପାରି ନ ଥିଲା। ସେହିପରି ୫ଟି ପେନାଲ୍ଟି ସୁଯୋଗ ମିଳିଥିଲେ ମଧ୍ୟ ଭାରତ ଗୋଲ ପରିଶୋଧ କରିବାରେ ଅସମର୍ଥ ରହିଥିଲା। ପୂର୍ବରୁ ଚାଇନା ସହିତ ହୋଇଥିବା ତ୍ରୁଟିକୁ ପୁଣିଥରେ ଦୋହରାଇ ଭାରତ ପରାଜିତ ହୋଇଥିଲା। ଭାରତୀୟ ଦଳର ଅଧିନାୟିକା ସବିତା ପୁନିଆ ୪୩ତମ ମିନିଟରେ ୟେଲୋ କାର୍ଡ ପାଇଥିଲେ। ଉନ୍ନତ ପ୍ରଦର୍ଶନ ପାଇଁ ଏହି ମ୍ୟାଚ୍ରେ ନେଦରଲାଣ୍ଡ୍ସ ଦଳର ଫେଲିସ୍ ଆଲବେର୍ସ ପ୍ଲେୟ୍ର ଅଫ୍ ଦି ମ୍ୟାଚ୍ ପୁରସ୍କାର ପାଇଥିଲେ।
