ଲାଉସାନେ, ୧୦ା୭ (ପି.ଟି.)-ଅନ୍ତର୍ଜାତୀୟ ହକି ମହାସଂଘ (ଏଫ୍ଆଇଏଚ୍) ଦ୍ୱାରା ସଂଶୋଧିତ କାର୍ଯ୍ୟସୂଚୀ ଗୁରୁବାର ଘୋଷଣା କରାଯାଇଛି। ଆସନ୍ତା ବର୍ଷ ଏପ୍ରିଲରେ ବିଦେଶରେ ଆର୍ଜେଣ୍ଟିନା ବିପକ୍ଷ ମ୍ୟାଚ ଖେଳି ଭାରତୀୟ ପୁରୁଷ ହକି ଦଳ ଏଫ୍ଆଇଏଚ୍ ପ୍ରୋ-ଲିଗ୍ ଅଭିଯାନ ଆରମ୍ଭ କରିବ। ପ୍ରୋ-ଲିଗ୍ ଆରମ୍ଭ ହେବାପରେ ଭାରତ ଏପ୍ରିଲ ୧୦ ଓ ୧୧ରେ ଆର୍ଜେଣ୍ଟିନା ବିପକ୍ଷରେ ଖେଳିବ। ଉଭୟ ପୁରୁଷ ଓ ମହିଳା ବିଭାଗରେ ଜର୍ମାନୀ ସେପ୍ଟେମ୍ବର ୨୨ ଓ ୨୩ରେ ବେଲଜିୟମ ବିପକ୍ଷ ମ୍ୟାଚ ନିଜ ଦେଶରେ ଖେଳିବ। ଭାରତ ଏହାର ପରବର୍ତ୍ତୀ ମ୍ୟାଚ ବିଦେଶରେ ଗ୍ରେଟ୍ ବ୍ରିଟେନ ସହ ମେ ୮ ଓ ୯ ତାରିଖରେ ଖେଳିବ। ଦଳ ପରେ ସ୍ପେନ ଗସ୍ତ କରି ସେଠାରେ ଆୟୋଜକ ଦେଶକୁ ମେ ୧୨ ଓ ୧୩ରେ ଭେଟିବ। ସଂଶୋଧିତ କାର୍ଯ୍ୟସୂଚୀ ଅନୁସାରେ ଭାରତ ଆୟୋଜକ ଜର୍ମାନୀ ବିପକ୍ଷରେ ମେ ୧୮ ଓ ୧୯ ତାରିଖରେ ଖେଳିବ। ଶେଷରେ ଦଳ ନିଜ ଦେଶରେ ନ୍ୟୁଜିଲାଣ୍ଡକୁ ମେ ୨୯ ଓ ୩୦ରେ ଭେଟିବ। କୋଭିଡ୍-୧୯ ଯୋଗୁ ବିଶ୍ୱବ୍ୟପୀ ସମସ୍ତ କ୍ରୀଡ଼ା ପ୍ରଭାବିତ ହୋଇଛି। ଏଥିପାଇଁ ଏଫ୍ଆଇଏଚ୍ ନୂଆ କାର୍ଯ୍ୟସୂଚୀ ପ୍ରସ୍ତୁତ କରିବାକୁ ବାଧ୍ୟ ହୋଇଛି।
ପ୍ରକୃତ କାର୍ଯ୍ୟସୂଚୀ ଅନୁସାରେ ଚଳିତ ବର୍ଷ ଜୁନ୍ ୧୪ରେ ସ୍ପେନ ବିପକ୍ଷ ମ୍ୟାଚ ଖେଳି ଭାରତ ଏହାର ପ୍ରୋ-ଲିଗ୍ ଅଭିଯାନ ଶେଷ କରିଥାନ୍ତା। ମାର୍ଚ୍ଚ ୧୯ରେ ଟୁର୍ନାମେଣ୍ଟ ସସ୍ପେଣ୍ଡ ହେବା ପୂର୍ବରୁ ଭାରତ ବର୍ଲିନଠାରେ ଜର୍ମାନୀକୁ ଏପ୍ରିଲ ୨୫ ଓ ୨୬ରେ ଏବଂ ଲଣ୍ଡନରେ ଗ୍ରେଟ୍ ବ୍ରିଟେନକୁ ମେ ୨ ଓ ୩ରେ ଭେଟିବା କାର୍ଯ୍ୟକ୍ରମ ରହିଥିଲା। ପରେ ଜୁନ ୫ ଓ ୬ରେ ଆର୍ଜେଣ୍ଟିନା ସହ ମୁକାବିଲା ପାଇଁ ଟୁକୁମାନ ଗସ୍ତ ପୂର୍ବରୁ ନିଜ ଦେଶରେ ନ୍ୟୁଜିଲାଣ୍ଡ ବିପକ୍ଷ ମ୍ୟାଚ ମେ୨୩ ଓ ୨୪ରେ ଖେଳିଥାନ୍ତା। ବିଶ୍ୱର ଶ୍ରେଷ୍ଠ ଦଳଗୁଡ଼ିକ ମଧ୍ୟରେ ପୁଣି କେବେ ହକି ମ୍ୟାଚ ହେବ ତାହାକୁ ହକି ପ୍ରେମୀମାନେ ଉତ୍କଣ୍ଠାର ସହ ଅପେକ୍ଷା କରି ରହିଛନ୍ତି ବୋଲି ଏଫ୍ଆଇଏଚ୍ ସଭାପତି ନରିନ୍ଦର ବାତ୍ରା ପ୍ରକାଶ କରିଛନ୍ତି। ନୂଆ କାର୍ଯ୍ୟସୂଚୀ ପ୍ରସ୍ତୁତ କରିବା ପୂର୍ବରୁ ସମସ୍ତ ୧୧ଟି ଦେଶ ସହିତ ଯୋଗାଯୋଗ କରାଯାଇଥିଲା। ଯେପର୍ଯ୍ୟନ୍ତ କରୋନା ମହାମାରୀ ନ ହଟିଛି ସେ ପର୍ଯ୍ୟନ୍ତ ହକି ଖେଳ ସମୟରେ ସୁସ୍ଥ ରହିବାକୁ ଅଗ୍ରାଧିକାର ଦିଆଯିବ ବୋଲି ସେ କହିଛନ୍ତି।
