ଭୁବନେଶ୍ୱର,୧।୯:ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସିକ (ଏପ୍ରିଲରୁ ଜୁନ୍) ମଧ୍ୟରେ ଭାରତର ଗ୍ରସ୍ ଡୋମୋଷ୍ଟିକ ପ୍ରଡକ୍ଟ (ଜିଡିପି)ର ଅଭିବୃଦ୍ଧି ହାର ପୂର୍ବ ତ୍ରୈମାସିକ ଅପେକ୍ଷା ବେଶ୍ ଭଲ ରହିଥିବା ଗୁରୁବାର ଅର୍ଥ ମନ୍ତ୍ରଣାଳୟ ପକ୍ଷରୁ ବିସ୍ତୃତ ଭାବେ ତଥ୍ୟ ଜାରି କରାଯାଇଛି। ଏପରିକି ୨୦୨୩-୨୪ ଆର୍ଥିକ ବର୍ଷର ପ୍ରଥମ ତ୍ରୈମାସରେ ଦେଶର ଜିଡିପି ୭.୮% ରହିଛି। ଗତ ଆର୍ଥିକ ବର୍ଷର ଶେଷ (ଜାନୁୟାରୀରୁ ମାର୍ଚ୍ଚ) ତ୍ରୈମାସିକରେ ଭାରତର ଅଭିବୃଦ୍ଧି ହାର ୬.୧% ରହିଥିଲା। ୨୦୨୨-୨୩ ଆର୍ଥିକ ବର୍ଷର ଜିଡିପି ଅଭିବୃଦ୍ଧି ହାର ୭.୨% ରହିଥିଲା। ସେହିଭଳି ନ୍ୟାଶନାଲ ଷ୍ଟାଟିଷ୍ଟିକାଲ ଅଫିସ(ଏନ୍ଏସ୍ଓ) ପକ୍ଷରୁ ଗୁରୁବାର ଜାରି ତଥ୍ୟ ଅନୁଯାୟୀ, ଗତ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଦେଶର ଜିଡିପି ଅଭିବୃଦ୍ଧି ହାର ୧୩.୧% ରହିଥିଲା ବେଳେ ଉକ୍ତ ଜିଡିପି ଅଭିବୃଦ୍ଧି ସହ ଭାରତ ପ୍ରମୁଖ ଅର୍ଥ ବ୍ୟବସ୍ଥାରେ ସବୁଠୁ ଦ୍ରୁତ ଭାବେ ବୃଦ୍ଧି କରୁଥିବା ଦେଶ ହୋଇଛି। ଉଲ୍ଲେଖଯୋଗ୍ୟ, ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ନିକଟରେ ଚଳିତ ଆର୍ଥିକ ବର୍ଷ ପାଇଁ ଦେଶର (ଭାରତ)ର ଜିଡିପି ଅଭିବୃଦ୍ଧି ୬.୫% ରହିବା ନେଇ ପୂର୍ବ ଆକଳନ କରିଥିଲା। ସେହିଭଳି ଆର୍ବିଆଇର ଆକଳନ ରିପୋର୍ଟରେ ଦେଶର ଜିଡିପି ଅଭିବୃଦ୍ଧି ହାର ୨୦୨୩-୨୪ ଆର୍ଥକ ବର୍ଷର ପ୍ରଥମ ତ୍ରୈମାସିକରେ ୮% ରହିବା ନେଇ ଅନୁମାନ କରାଯାଇଥିଲା। ସେହିପରି ଆଇଏମ୍ଏଫ୍ର ଆକଳନ ଅନୁଯାୟୀ ଚଳିତ ବର୍ଷ ଭାରତର ଆର୍ଥିକ ଅଭିବୃଦ୍ଧି ହାର ୬.୧% ରହିବ ବୋଲି କୁହାଯାଇଛି। ଅପରପକ୍ଷରେ ୨୦୨୩ ଜୁଲାଇରେ ଦେଶର କୋର୍ ସେକ୍ଟରଗୁଡ଼ିକର ଅଭିବୃଦ୍ଧିରେ ମଧ୍ୟ ହ୍ରାସ ଦେଖିବାକୁ ମିଳିଛି। ସରକାରୀ ତଥ୍ୟ ଅନୁଯାୟୀ ୨୦୨୩ ଜୁଲାଇରେ କୋର୍ ସେକ୍ଟର ଅଭିବୃଦ୍ଧି ହାର ୮% ରହିଥିଲା। ଏପରିକି ୨୦୨୨ ଜୁଲାଇରେ କୋର୍ ସେକ୍ଟର ଅଭିବୃଦ୍ଧି ୪.୮% ଥିଲା। ସେହିଭଳି ଚଳିତ ଆର୍ଥିକ ବର୍ଷର ଜୁନ୍ ମାସରେ ୮ ମୌଳିକ ଉଦ୍ୟୋଗର ଅଭିବୃଦ୍ଧି ହାର ୮.୩% ରହିଥିଲା। ଚଳିତ ଆର୍ଥିକ ବର୍ଷର ପ୍ରଥମ ୪ମାସରେ ଭାରତର ରାଜ କୋଷୀୟ କ୍ଷତି ୬.୦୬ ଲକ୍ଷ କୋଟି ଟଙ୍କାରେ ପହଞ୍ଚତ୍ଛି। ସରକାରଙ୍କ ପକ୍ଷରୁ ଜାରି ତଥ୍ୟ ଅନୁଯାୟୀ ବର୍ତ୍ତମାନ ସୁଦ୍ଧା ରାଜକୋଷୀୟ କ୍ଷତି ୩୩.୯% ରହିଛି।