ଚେଙ୍ଗଡୁ (ଚାଇନା), ୧ା୮ଚଳିତ ୩୧ତମ ଓ୍ବାଲର୍ଡ ୟୁନିଭର୍ସିଟି ଗେମ୍ସର ଚତୁର୍ଥ ଦିବସରେ ଭାରତୀୟ ୟୁନିଭର୍ସିଟି ଦଳର ପ୍ରତିଯୋଗୀମାନେ ତୀରନ୍ଦାଜୀ ଓ ଶୁଟିଂରେ ୨ଟି ଲେଖାଏ ସ୍ବର୍ଣ୍ଣ ପଦକ ଲାଭ କରିଥିବା ବେଳେ ଶୁଟିଂରେ ଗୋଟିଏ ରୌପ୍ୟ ଏବଂ ତୀରନ୍ଦାଜୀରେ ଗୋଟିଏ ରୌପ୍ୟ ପଦକ ପାଇଛି। ସଙ୍ଗମପ୍ରୀତ ସିଂ ଓ ଅଭନିତ କୌର କମ୍ପାଉଣ୍ଡ ତୀରନ୍ଦାଜୀରେ ଚାମ୍ପିୟନ ହୋଇଥିବା ବେଳେ ଭାରତ ଏହି କ୍ରୀଡ଼ାରେ ୩ ସ୍ବର୍ଣ୍ଣ, ଗୋଟିଏ ରୌପ୍ୟ ଓ ତିନୋଟି ବ୍ରୋଞ୍ଜ ହାସଲ କରିଛି। ଓଭର ଅଲ୍ ଭାରତ ୯ ସ୍ବର୍ଣ୍ଣ, ୩ ରୌପ୍ୟ ଓ ୫ ବ୍ରୋଞ୍ଜ ସହ ପଦକ ତାଲିକାରେ ଚତୁର୍ଥ ସ୍ଥାନରେ ରହିଛି। ଚାଇନା (୧୭-୫-୪) ଟେବୁଲରେ ପ୍ରଥମ ସ୍ଥାନ ଅଧିକାର କରିଥିବା ବେଳେ ଏହା ପଛକୁ ପଛ ଦ୍ୱିତୀୟ ଓ ତୃତୀୟ ସ୍ଥାନରେ କୋରିଆ (୧୦-୧୦-୪) ଓ ଜାପାନ (୧୦-୬-୭) ରହିଛନ୍ତିି। ପୂର୍ବରୁ ଭାରତୀୟ ଦଳ ଏହାର ଶ୍ରେଷ୍ଠ ପ୍ରଦର୍ଶନ ୨୦୧୫ ଓ୍ବାଲର୍ଡ ୟୁନିଭର୍ସିଟି ଗେମ୍ସରେ କରିଥିଲା। ସେଥିରେ ୧ ସ୍ବର୍ଣ୍ଣ, ୧ ରୌପ୍ୟ ଏବଂ ୩ ବ୍ରୋଞ୍ଜ ପାଇଥିଲା। ମାତ୍ର ଚଳିତ ସଂସ୍କରଣରେ ଭାରତ ଏହି ସଂଖ୍ୟାକୁ ଅତିକ୍ରମ କରିଯାଇଛି। ସମସ୍ତ ୩ ସ୍ବର୍ଣ୍ଣ କମ୍ପାଉଣ୍ଡ ବିଭାଗରୁ ଆସିଛି। ବ୍ୟକ୍ତିଗତ ପୁରୁଷ ବିଭାଗରେ ବିସ୍ଲା, ମହିଳାରେ ଅଭିନୀତ ଏବଂ ମିକ୍ସଡ ଟିମ୍ରେ ସାଇନି ଓ ପ୍ରଗତି ସମସ୍ତ ୩ ସ୍ବର୍ଣ୍ଣ ଜିତିଛନ୍ତି। କମ୍ପାଉଣ୍ଡ ତୀରନ୍ଦାଜମାନେ ଆହୁରି ମଧ୍ୟ ଦୁଇଟି ବ୍ରୋଞ୍ଜ ପଦକ ପୁରୁଷ ଟିମ୍ (ରିଷଭ ଯାଦବ, ସାଇନି ଓ ବିସ୍ଲା) ଏବଂ ପୁରୁଷ ବ୍ୟକ୍ତିଗତ ବିଭାଗରେ ହାସଲ କରିଛି। ରିକର୍ଭ ତୀରନ୍ଦାଜମାନଙ୍କ ପ୍ରଦର୍ଶନ ନୈରାଶ୍ୟଜନକ ରହିଥିଲା। ତେବେ ସଙ୍ଗୀତା, ତନିଶା ବର୍ମା ଓ ରୀତା ସାଓ୍ବାନ୍ଙ୍କୁ ନେଇ ମହିଳା ଦଳ ଏକ ବ୍ରୋଞ୍ଜ ଜିତିଛି।
ଶୁଟିଂରେ ଐଶ୍ୱରିଙ୍କୁ ହ୍ୟାଟ୍ରିକ ସ୍ବର୍ଣ୍ଣ
ସୋମବାର ଭାରତୀୟ ଶୁଟରମାନେ ୨ ସ୍ବର୍ଣ୍ଣ ଓ ଗୋଟିଏ ରୌପ୍ୟ ଜିତିଛନ୍ତି। ଐଶ୍ୱରୀ ପ୍ରତାପ ସିଂ, ଦିବ୍ୟାଂଶ ସିଂ ପନଓ୍ବାର, ଅର୍ଜୁନ ବବୁତାଙ୍କୁ ନେଇ ଭାରତୀୟ ପୁରୁଷ ଦଳ ୧୦ମିଟର ଏୟାର ରାଇଫଲ ଇଭେଣ୍ଟରେ ସ୍ବର୍ଣ୍ଣ ପଦକ ହାସଲ କରିଛି। ଏଥି ସହିତ ଦଳ ବିଶ୍ୱରେକର୍ଡ ଭଙ୍ଗ କରିଛି। ଭାରତୀୟ ୟୁନିଭର୍ସିଟି ଟିମ୍ ୧୮୯୪.୭ ପଏଣ୍ଟ ସ୍କୋର କରି ଟାଇଟଲ ଜିତିଛି। ୨୦୧୮ରେ ଚାଇନା ଏହାଠାରୁ ୭.୩ ପଏଣ୍ଟ କମ୍ ସ୍କୋର କରି ବିଶ୍ୱ ରେକର୍ଡର ଅଧିକାରୀ ଥିଲା। ଏଠାରେ ଚାଇନା (୧୮୮୧.୯) ରୌପ୍ୟ ଏବଂ କାଜାଖସ୍ତାନ (୧୮୭୮.୨) ବ୍ରୋଞ୍ଜ ପାଇଛି। ଅନ୍ୟପକ୍ଷରେ ପୁରୁଷ ୧୦ ମିଟର ରାଇଫଲରେ ଭାରତର ଐଶ୍ୱରି ପ୍ରତାପ ସିଂ ତୋମାର (୨୫୨.୬) ସ୍ବର୍ଣ୍ଣ ଜିତିଥିବା ବେଳେ ରୌପ୍ୟପଦକ ଭାରତର ଦିବ୍ୟାଂଶ ସିଂ ପନଓ୍ବାର (୨୫୧.୦) ରୌପ୍ୟ ଏବଂ ଚାଇନାର ସଙ୍ଗ ଉହାନ (୨୨୯) ବ୍ରୋଞ୍ଜ ପାଇଥିଲେ। ଭାରତୀୟ ଶୁଟିଂ ଟିମ୍ ସଦସ୍ୟ ଐଶ୍ୱରି ପ୍ରତାପ ସିଂ ତୋମାର ଚଳିତ ଓ୍ବାଲର୍ଡ ୟୁନିଭର୍ସିଟି ଗେମ୍ସରେ ୩ ସ୍ବର୍ଣ୍ଣ ଓ ଗୋଟିଏ ବ୍ରୋଞ୍ଜ ଜିତି ଚହଳ ସୃଷ୍ଟି କରିଛନ୍ତି। ସେ ପୁରୁଷ ୧୦ ମିଟର ଏୟାର ରାଇଫଲ, ପୁରୁଷ ୫୦ ମିଟର ରାଇଫଲ ୩ ପୋଜିଶନ, ପୁରୁଷ ୧୦ମିଟର ଏୟାର ରାଇଫଲ ଟିମ୍ ଇଭେଣ୍ଟରେ ହାସଲ କରିଥିବା ବେଳେ ୫୦ମିଟର ରାଇଫଲ ୩ ପୋଜିଶନ ଟିମ୍ ଇଭେଣ୍ଟରେ ବ୍ରୋଞ୍ଜ ପାଇଛନ୍ତି।