ନୂଆଦିଲ୍ଲୀ, ୧୫।୪(ପି.ଟି.)- ଟୋକିଓ ଅଲିମ୍ପିକ୍ସର ୧୦୦ ଦିନିଆ ଅବଗଣନା ଆରମ୍ଭ ହୋଇଥିବାବେଳେ ଏହି କ୍ରୀଡ଼ା ମହାକୁମ୍ଭରେ ଭାରତ ପଦକ ସଂଖ୍ୟା ଦୁଇଅଙ୍କ ଛୁଇଁବ ବୋଲି ଆଶା ରଖିଛନ୍ତି କ୍ରୀଡ଼ାମନ୍ତ୍ରୀ କିରେନ ରିଜିଜୁ। ଅଲିମ୍ପିକ୍ସ ପ୍ରସ୍ତୁତି ପାଇଁ ଦେଶର ଆଥ୍ଲେଟଙ୍କୁ ସରକାର ଯଥାସମ୍ଭବ ସହଯୋଗ କରୁଛନ୍ତି। ଏବେ ଆଗାମୀ ଗେମ୍ସକୁ ସ୍ମରଣୀୟ କରିବା ସେମାନଙ୍କ ଦାୟିତ୍ୱ ବୋଲି ରିଜିଜୁ କହିଛନ୍ତି। ”ଆଗାମୀ ଅଲିମ୍ପିକ୍ସକୁ ଆମେ ସ୍ମରଣୀୟ କରିବାକୁ ଚାହୁଁ। ଭାରତ ପାଇଁ ଏହା ଯେପରି ସବୁଠାରୁ ଖୁସିପ୍ରଦ ହେବ ସେ ଦିଗରେ ଆଥ୍ଲେଟମାନେ ଧ୍ୟାନଦେବା ଜରୁରୀ“ ବୋଲି ସେ ପ୍ରକାଶ କରିଛନ୍ତି। କ୍ରୀଡ଼ା ମନ୍ତ୍ରଣାଳୟ ପକ୍ଷରୁ ଅଲିମ୍ପିକ୍ସ ଯୋଗ୍ୟତା ହାସଲକାରୀ ଏବଂ କ୍ୱାଲିଫାଇଂ ଇଭେଣ୍ଟ ଖେଳିବାକୁ ଯାଉଥିବା ଆଥ୍ଲେଟଙ୍କୁ ସବୁପ୍ରକାର ସହଯୋଗ କରାଯାଉଛି। ଆଥ୍ଲେଟଙ୍କ ସବୁ ଆବଶ୍ୟକତାକୁ ପୂରଣ କରିବା ଆମ କାମ ବୋଲି ଟୋକିଓ ଗେମ୍ସ ୧୦୦ ଦିନିକିଆ ଅବଗଣନା ଅବସରରେ ଆୟୋଜିତ ଭର୍ଚୁଆଲ ଓ୍ବେବିନାରରେ ଯୋଗଦେଇ ରିଜିଜୁ ଏହା କହିଛନ୍ତି। ଚଳିତ ବର୍ଷ ଜୁଲାଇ ୨୩ରେ ଟୋକିଓ ଅଲିମ୍ପିକ୍ସ ଆରମ୍ଭ ହେବ। ”ଆମେ ତୁମ ପାଇଁ ସବୁକିଛି କରୁଛୁ। ତୁମେ ପଦକ ସଂଖ୍ୟାକୁ ଦୁଇଅଙ୍କରେ ପହଞ୍ଚାଇବା ଲକ୍ଷ୍ୟରେ ଅଗ୍ରସର ହୁଅ। ପ୍ରତିଯୋଗିତାରେ ଯେପରି ଶ୍ରେଷ୍ଠ ପ୍ରଦର୍ଶନ ହେବ ସେ ଦିଗରେ ଧ୍ୟାନ ଦିଅ“ ବୋଲି ଅଲିମ୍ପିକ୍ସରେ ଭାଗ ନେବାକୁ ଯାଉଥିତ୍ବା ଭାରତୀୟ ଆଥ୍ଲେଟଙ୍କ ଉଦ୍ଦେଶ୍ୟରେ ରିଜିଜୁ କହିଛନ୍ତି। ଆଗକୁ ଅନେକ ଚ୍ୟାଲେଞ୍ଜ ଅଛି। ଯଦି କୌଣସି ଦଳର ଜଣେ ଆଥଲେଟ୍ କୋଭିଡ୍ ପଜିଟିଭ ହୁଅନ୍ତି ତେବେ ତାହା ସମଗ୍ର ଦଳର ପ୍ରଦର୍ଶନ ଉପରେ ପ୍ରଭାବ ପକାଇବ। ତେଣୁ ଆମକୁ ଅଧିକ ସତର୍କତା ଅବଲମ୍ବନ କରିବାକୁ ହେବ। ଆମେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ ଏବଂ ନ୍ୟାଶନାଲ ସ୍ପୋଟର୍ସ ଫେଡେରେଶନର ପ୍ରୋଟୋକଲଙ୍କୁ କଡ଼ାକଡ଼ି ଭାବେ ପାଳନ କରିବା ଉଚିତ ବୋଲି ରିଜିଜୁ ପ୍ରକାଶ କରିଛନ୍ତି। ଏହି ଓ୍ବେବିନାରରେ କେନ୍ଦ୍ର କ୍ରୀଡ଼ା ସଚିବ ରବି ମିତ୍ତଲ, ଭାରତୀୟ ଅଲିମ୍ପିକ୍ ଆସୋସିଏଶନ ସଭାପତି ନରିନ୍ଦର ବାତ୍ରା ଏବଂ ମହାସଚିବ ରାଜୀବ ମେହେଟା ଭାଗ ନେଇଥିଲେ।