ଦୁବାଇ,୬ା୧୨(ପି.ଟି.):ଭାରତର ମୁଣ୍ଡପିଛା ଅଙ୍ଗାରକାମ୍ଳ ଉତ୍ସର୍ଜନ ୨୦୨୨ରେ ୫ ପ୍ରତିଶତ ବୃଦ୍ଧି ପାଇ ୨ ଟନ୍ରେ ପହଞ୍ଚତ୍ଥିଲେ ମଧ୍ୟ ଏହା ବୈଶ୍ୱିକ ହାରାହାରିର ୫୦ ପ୍ରତିଶତରୁ କମ୍ ରହିଛି। ମଙ୍ଗଳବାର ପ୍ରକାଶିତ ରିପୋର୍ଟରୁ ଏହା ଜଣାପଡ଼ିଛି। ଗ୍ଲୋବାଲ କାର୍ବନ ପ୍ରୋଜେକ୍ଟ ଅନୁଯାୟୀ ମୁଣ୍ଡପିଛା ଅଙ୍ଗାରକାମ୍ଳ ଉତ୍ସର୍ଜନରେ ଆମେରିକା ଶୀର୍ଷରେ ରହିଛି। ସେଠାରେ ପ୍ରତ୍ୟେକ ବ୍ୟକ୍ତି ୧୪.୯ ଟନ୍ କାର୍ବନ ଡାଇଅକ୍ସାଇଡ୍ ଉତ୍ସର୍ଜନ କରୁଛନ୍ତି। ଏହା ପଛକୁ ରୁଷିଆ (୧୧.୪ ଟନ୍) ରହିଥିବାବେଳେ ଜାପାନ (୮.୫ ଟନ୍), ଚାଇନା (୮ ଟନ), ୟୁରୋପୀୟ ୟୁନିୟନ (୬.୨ ଟନ୍) ରହିଛି। ବୈଶ୍ୱିକ ହାରାହାରି ଅଙ୍ଗାରକାମ୍ଳ ନିର୍ଗମନ ୪.୭ ଟନ୍ ଥିବା ଉକ୍ତ ରିପୋର୍ଟରେ ପ୍ରକାଶ ପାଇଛି। ଶିଳ୍ପ ବିପ୍ଳବ ସମୟରୁ ଆମେରିକା ସର୍ବାଧିକ ଅଙ୍ଗାରକାମ୍ଳ ନିର୍ଗମନକାରୀ ଦେଶ ଭାବେ ପରିଚିତ ହୋଇଆସିଚି। ୧୮୫୦ରୁ ୨୦୨୨ ମଧ୍ୟରେ ଆମେରିକାର ମୋଟ ଅଙ୍ଗାରକାମ୍ଳ ନିର୍ଗମନ ପରିମାଣ ୧୧୫ ଗିଗାଟନ୍, ଯାହାକି ବିଶ୍ୱର ମୋଟ ନିର୍ଗମନର ୨୪ ପ୍ରତିଶତ। ୟୁରୋପୀୟ ୟୁନିୟନର ଏହି ସମୟର ଅଙ୍ଗାରକାମ୍ଳ ନିର୍ଗମନ ୮୦ ଗିଗାଟନ୍ ହୋଇଥିବାବେଳେ ଚାଇନାର ୭୦ ଗିଗାଟନ୍। ଭାରତ ୧୮୫୦ରୁ ୨୦୨୨ ମଧ୍ୟରେ ୧୫ ଗିଗାଟନ୍ କାର୍ବନ ଡାଇଅକ୍ସାଇଡ୍ ଉତ୍ସର୍ଜନ କରିଛି, ଯାହା ମୋଟ ବିଶ୍ୱରେ ହୋଇଥିବା ଉତ୍ସର୍ଜନର ମାତ୍ର ୩ ପ୍ରତିଶତ।