ଓ୍ବାଶିଂଟନ, ୧୬।୭: ଆଗାମୀ ୨୧୦୦ ବେଳକୁ ଭାରତର ଜନସଂଖ୍ୟା ୩୨ ପ୍ରତିଶତ କମିଯିବ। ଏନେଇ ଲାସେଣ୍ଟ୍ ପ୍ରତିକାରେ ଏକ ରିପୋର୍ଟ ପ୍ରକାଶ ପାଇଛି। ୨୦୪୮ ବେଳକୁ ଭାରତର ଜନସଂଖ୍ୟା ୧୬୦ କୋଟିରେ ପହଞ୍ଚିବାର ସମ୍ଭାବନା ରହିଛି। ତେବେ ପରବର୍ତ୍ତୀ ସମୟରେ ଏହା କମିବାରେ ଲାଗିବ। ୫୨ ବର୍ଷ ପରେ ୨୧୦୦ବେଳକୁ ଜନସଂଖ୍ୟା ବର୍ତ୍ତମାନର ୧୩୫ କୋଟିରୁ ହ୍ରାସ ପାଇବ। ଏହା ୨୬ କୋଟି କମି ୧୦୯ କୋଟିରେ ପହଞ୍ଚିବ। ଜନସଂଖ୍ୟା କମିଗଲେ ଏହା ମାନବ ସମ୍ବଳ ଉପରେ ନକାରାତ୍ମକ ପ୍ରଭାବ ପକାଇବାର ଆଶଙ୍କା କରାଯାଉଛି। ଚାଇନା,ଆମେରିକା, ଜାପାନ ଆଦି ଦେଶରେ ମଧ୍ୟ ଜନସଂଖ୍ୟା କମିବାରେ ଲାଗିବ। ପୃଥିବୀର ୧୮୩ଟି ଦେଶରେ ଏନେଇ ଅଧ୍ୟୟନ ହୋଇଛି। ରିପୋର୍ଟରେ ଜନ୍ମହାର ଏବଂ ମୃତ୍ୟୁହାରର ପୂର୍ବାନୁମାନ କରାଯାଇଛି। ଜନସଂଖ୍ୟା କମିବା ଦ୍ୱାରା ପୃଥିବୀରେ ବିଭିନ୍ନ ଶକ୍ତିଶାଳୀ ରାଷ୍ଟ୍ରଙ୍କ ମଧ୍ୟରେ ଭାରତ, ଆମେରିକା, ଚାଇନା ଏବଂ ନାଇଜେରିଆ ସ୍ଥାନ ପାଇବାର ଯଥେଷ୍ଟ ସମ୍ଭାବନା ଥିବା ରିପୋର୍ଟରେ ଉଲ୍ଲେଖ ହୋଇଛି। ୨୦୧୭ରେ ଭାରତରେ କାମ କରୁଥିବା ଲୋକଙ୍କ ସଂଖ୍ୟା ୭୬ କୋଟି ୨ ଲକ୍ଷରୁ ଅଧକ ଥିଲା। ୨୧୦୦ ବେଳକୁ ଏହା ୫୭ କୋଟି ୮ ଲକ୍ଷକୁ ହ୍ରାସ ପାଇବ। ଚାଇନାରେ ୨୦୧୭ରେ କମା କରୁଥିବା ଲୋକଙ୍କ ସଂଖ୍ୟା ୯୫ କୋଟି ଥିଲା। ୨୧୦୦ବେଳକୁ ସେମାନଙ୍କ ସଂଖ୍ୟା ହ୍ରାସ ପାଇ ୩୫ କୋଟି ୭ ଲକ୍ଷରେ ପହଞ୍ଚିବ। ରିପୋର୍ଟରେ କୁହାଯାଇଛି ଯେ, ୨୦୨୦ ମଧ୍ୟ ଭାଗ ବେଳକୁ ଭାରତ ଶ୍ରମଶକ୍ତି ଚାଇନାକୁ ଟପିଯିବ।
