ନୂଆଦିଲ୍ଲୀ,୫ ।୧(ପି.ଟି.)-ଆଗାମୀ ଟୋକିଓ ଅଲିମ୍ପିକ୍ସରେ ଭାରତ ଶ୍ରେଷ୍ଠ ପ୍ରଦର୍ଶନ ସହ ରେକର୍ଡ ସଂଖ୍ୟକ ପଦକ ହାସଲ କରିବ ବୋଲି ଆଶାପୋଷଣ କରିଛନ୍ତି ତାରକା ଶୁଟର ଅଭିନବ ବିନ୍ଦ୍ରା। ଦେଶର ପ୍ରତ୍ୟେକ ଆଥଲେଟ୍ଙ୍କୁ ଏବେ ବାସ୍ତବ ଦୃଷ୍ଟିକୋଣରୁ ପଦକ ଦାବିଦାର ବିବେଚନା କରାଯାଉଛି ବୋଲି ଭାରତର ଏକମାତ୍ର ବ୍ୟକ୍ତିଗତ ଅଲିମ୍ପିକ୍ ସ୍ବର୍ଣ୍ଣ ପଦକ ବିଜେତା ପ୍ରକାଶ କରିଛନ୍ତି। ୨୦୧୨ ଲଣ୍ଡନ ଅଲିମ୍ପିକ୍ସରେ ଭାରତ ୬ଟି ପଦକ ପାଇଥିଲା। ଏହା ଏପର୍ଯ୍ୟନ୍ତ ଭାରତର ଶ୍ରେଷ୍ଠ ପ୍ରଦର୍ଶନ ରହି ଆସିଛି। କୋଭିଡ-୧୯ ମହାମାରୀ ଯୋଗୁ ସାମ୍ପ୍ରତିକ ସମୟ ଚ୍ୟାଲେଞ୍ଜିଂ ଥିଲେ ହେଁ ଟୋକିଓ ଅଲିମ୍ପିକ୍ସରେ ଭାରତ ସର୍ବଶ୍ରେଷ୍ଠ ପ୍ରଦର୍ଶନ କରିବା ଆଶା ରହିଛି ବୋଲି ଏଖ ଓ୍ବେବିନାରରେ ଭାଗନେଇ ସେ କହିଛନ୍ତି।
୨୦୦୮ ବେଜିଂ ଅଲିମ୍ପିକ୍ସରେ ଏକମାତ୍ର ଭାରତୀୟଭାବେ ବ୍ୟକ୍ତିଗତ ଇଭେଣ୍ଟରେ ସ୍ବର୍ଣ୍ଣ ପଦକ ଜିତି ଇତିହାସ ରଚିଥିବା ବିନ୍ଦ୍ରା ଜାପାନ ରାଜଧାନୀରେ ମଧ୍ୟ ଭାରତୀୟ ଶୁଟରମାନେ ଚମକ ସୃଷ୍ଟି କରିବେ ବୋଲି ଆଶା ରଖିଛନ୍ତି। ”ମୋ ମତରେ ପ୍ରତି ଶୁଟର ଶ୍ରେଷ୍ଠ ପ୍ରଦର୍ଶନର ଦକ୍ଷତା ରଖିଛନ୍ତି। ସେମାନେ ଗତ ଦୁଇ ତିନିବର୍ଷଧରି ତାହା ପ୍ରମାଣିତ କରିଛନ୍ତି। କେବଳ ଶୁଟିଂ ନୁହେଁ ଅନ୍ୟ ଇଭେଣ୍ଟରେ ମଧ୍ୟ ଭାରତୀୟମାନେ ପଦକ ପାଇଁ ଦାବିଦାର ରହିବେ। ମାତ୍ର ନିର୍ଦ୍ଦିଷ୍ଟ ଦିବସ ସେମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ରହିବ“ ବୋଲି ବିନ୍ଦ୍ରା କହିଛନନ୍ତି।