ନଭି ମୁମ୍ବାଇ,୧୪ା୧୨(ପି.ଟି.): ଟି୨୦ ସିରିଜରେ ଆଖିଦୃଶିଆ ପ୍ରଦର୍ଶନ ଦେବାରେ ବିଫଳ ହେବା ପରେ ଇଂଲଣ୍ଡ ବିପକ୍ଷରେ ଏକମାତ୍ର ଟେଷ୍ଟ ଖେଳିବା ପାଇଁ ପ୍ରସ୍ତୁତ ହେଉଛି ଭାରତୀୟ ମହିଳା କ୍ରିକେଟ ଦଳ। ଭାରତ ନିକଟରେ ଏକ ଚମତ୍କାର ସ୍ପିନ୍ ଆକ୍ରମଣ ରହିଥିବା ବେଳେ ଦଳ ଏଥିରୁ ଫାଇଦା ଉଠାଇବାକୁ ଚେଷ୍ଟା କରିବ। ଗୁରୁବାରଠାରୁ ଡି ଓ୍ବାଇ ପାଟିଲ କ୍ରିକେଟ ଷ୍ଟାଡିୟମରେ ଏକମାତ୍ର ୪ ଦିନିଆ ଟେଷ୍ଟ ମ୍ୟାଚ ଆରମ୍ଭ ହେବ। ଯଦି ଉଭୟ ଦଳ ମଧ୍ୟରେ ଓଭରଅଲ ରେକର୍ଡ ଉପରେ ନଜର ପକାଇବା ତେବେ ଏହା ଭାରତ ସପକ୍ଷରେ ରହିଛି। ଉଭୟ ଦଳ ମହିଳା ଟେଷ୍ଟ ଇତିହାସରେ ୧୪ ଥର ପରସ୍ପର ମୁକାବିଲା କରିଛନ୍ତି ା ଏହା ମଧ୍ୟରୁ ଭାରତ ୨ ଥର ବିଜୟୀ ହୋଇଥିବା ବେଳେ ଇଂଲଣ୍ଡ ମାତ୍ର ଥରୁଟିଏ ବିଜୟୀ ହୋଇଛି। ତେବେ ଇତିମଧ୍ୟରେ ଇଂଲଣ୍ଡ ନିୟମିତ ଭାବରେ ଟେଷ୍ଟ ସିରିଜ୍ ଖେଳୁଥିବା ବେଳେ ଭାରତ ଶେଷ ଥର ପାଇଁ ୨୦୨୧ରେ ଏକ ଟେଷ୍ଟ ସିରିଜ୍ ଖେଳିଥିଲା। ଇଂଲଣ୍ଡ ବିପକ୍ଷରେ ଖେଳାଯାଇଥିବା ଏହି ମ୍ୟାଚ୍ଟି ଡ୍ର’ରେ ଶେଷ ହୋଇଥିଲା। ଏହି ମ୍ୟାଚ୍ ଶେଷ ହେବାର ୧୦ ଦିନ ମଧ୍ୟରେ ଅଷ୍ଟ୍ରେଲିଆ ବିପକ୍ଷରେ ମଧ୍ୟ ଏକ ଟେଷ୍ଟ ମ୍ୟାଚ୍ ଖେଳିବ ଭାରତ। ଭାରତ ଏହାର ଶେଷ ଦୁଇଟି ଟେଷ୍ଟ ଡ୍ର ରଖିଥିବା ବେଳେ ନିକଟରେ ଇଂଲଣ୍ଡ ପରାଜିତ ହୋଇଥିଲା। ଏହା ଭାରତୀୟ ଦଳକୁ ସାମାନ୍ୟ ଆତ୍ମବିଶ୍ୱାସ ପ୍ରଦାନ କରିବ।
ଭାରତ ପକ୍ଷରୁ ଦଳରେ ବେଙ୍ଗଲ ସ୍ପିନର ସାଇକା ଇଶାକ୍ଙ୍କୁ ସାମିଲ କରାଯାଇଛି। ଓମେନ୍ସ ପ୍ରିମିୟର ଲିଗ୍ରେ ୧୫ ଉଇକେଟ ନେବା ପରେ ନିକଟରେ ତାଙ୍କୁ ଭାରତୀୟ ଦଳକୁ ଡାକରା ମିଳିଥିଲା। କର୍ନାଟକର ଟପ୍ ଅର୍ଡର ବ୍ୟାଟର ଶୁଭା ସତୀଶ ମଧ୍ୟ ପ୍ରଥମ ଥର ପାଇଁ ଟେଷ୍ଟ ଟିମ୍କୁ ଡାକରା ପାଇଛନ୍ତି। ଜେମିମା ରୋଡ୍ରିଗୁଏଜ୍ ଓ ହରଲିନ୍ ଦେଓଲ ଟେଷ୍ଟ ମ୍ୟାଚ୍ ଖେଳି ନ ଥିବା ବେଳେ ରିଚା ଘୋଷଙ୍କ ସ୍ଥାନରେ ୟାସ୍ତିକା ଭାଟିଆଙ୍କୁ ସୁଯୋଗ ମିଳିବାର ସମ୍ଭାବନା ଅଧିକ। ରେଣୁକା ସିଂ ଠାକୁରଙ୍କ ଉପରେ ପେସ୍ ବୋଲିଂର ଭାର ରହିଥିବା ବେଳେ ଅଭିଜ୍ଞ ଦୀପ୍ତି ଶର୍ମା ଓ ସ୍ନେହ ରାଣାଙ୍କ ସହିତ ସାଇକା ଇଶାକ୍ଙ୍କ କାନ୍ଧରେ ସ୍ପିନ ବୋଲିଂର ଭାର ରହିବ। ଇଂଲଣ୍ଡ ଦଳର ଏମା ଲାମ୍ବ ଆହତ ହୋଇଥିବା ବେଳେ ତାଙ୍କ ସ୍ଥାନରେ ମାୟା ବୌଚିୟର ଓ କ୍ରିଷ୍ଟି ଗର୍ଡନଙ୍କୁ ସାମିଲ କରାଯାଇଛି। ତେବେ ଅଭିଜ୍ଞ ଖେଳାଳି ନାଟାଲି ସିଭର ବ୍ରଣ୍ଟ, ହିଥର ନାଇଟ୍, ଡାନିଏଲ ଓ୍ବାୟାଟ, କେଟ୍ କ୍ରସ୍ ଓ ସୋଫି ଏକେଲଷ୍ଟୋନଙ୍କ ନିକଟରୁ ଭଲ ପ୍ରଦର୍ଶନର ଆଶା କରିବ ଇଂଲଣ୍ଡ। ମହିଳା କ୍ରିକେଟରେ ଏହା ଇଂଲଣ୍ଡର ଶତକୀୟ ଟେଷ୍ଟ ହୋଇଥିବାରୁ ଦଳ ବିଜୟୀ ହେବାକୁ ପ୍ରୟାସ କରିବ।
